Sudździa ŭ Rymie Paoła dzi Nikoła ŭniesła niečakany dadatak da prysudu 35-hadovaha asudžanaha za piedafiliju: pavodle vierdykta, mužčyna, jakomu pryjdziecca pravieści za kratami dva hady, pavinien budzie kupić svajoj achviary, 15-hadovaj prastytutcy, 30 knih fieministyčnaj prozy i paezii i dva filmy na tuju ž tematyku.
Dzi Nikoła nazvała prysudžanamu aŭtaraŭ i kankretnyja tvory, jakija jon pavinien nabyć i pieradać svajoj achviary: u ich liku «Dziońnik Hanny Frank» i paezija Emili Dzikinsan.
Jak zaŭvažyła sudździa, hetyja knihi dapamohuć dziaŭčynie zrazumieć, jakaja škoda była naniesienaja jaje žanočaj hodnaści.
Pry hetym adna ź piśmieńnic, čyja kniha trapiła ŭ śpis dzi Nikoły, skazała ŭ hutarcy z hazietaj Corriere della Sera, što było b lepš dać pačytać hetyja knihi samomu asudžanamu.
«Padletkavy ŭzrost — nie lepšaja para dla razvažańniaŭ. A voś toje, što zrabiŭ hety mužčyna, kudy horš: darosły śviadoma zapłaciŭ za seks ź niepaŭnaletniaj», — patłumačyła svaju pazicyju prafiesarka fiłasofii Vieronskaha ŭniviersiteta Adryjana Kavarera, jakaja napisała ese «Niahledziačy na Płatona» pra myślicielek Antyčnaści. Kniha ŭvachodzić u padborku rymskaj sudździ.
Palicyja try hady rasśledavała spravu ab sietcy piedafiłaŭ, jakija ustupali ŭ seksualnyja kantakty z 14-15-hadovymi dziaŭčatami ŭ fiešenebielnym pryharadzie Ryma Paryjoli. Arhanizatar sietki atrymaŭ dzieviać hadoŭ turmy.
Pavodle dadzienych italjanskaj prakuratury, niepaŭnaletnim dziaŭčynkam prapanoŭvałasia ščodraja apłata za seks-pasłuhi, jakuju, jak vyśvietliła śledstva, jany vydatkoŭvali na modnuju vopratku i najnoŭšyja smartfony.
Kamientary