SK admoviŭ u adkryćci spravy doktaru, čyju kvateru šturmavaŭ AMAP

Upraŭleńnie Śledčaha kamiteta pa horadzie Minsku admoviła ŭ adkryćci kryminalnaj spravy ŭ dačynieńni da supracoŭnikaŭ milicyi, jakija paśla šturmu kvatery siłaj zatrymali minčuka Dźmitryja Sieradu. Takija vyniki daśledčaj pravierki, jakuju pa zajavie paciarpiełaha boku pravodziŭ SK.

Fota: Jaŭhien Jerčak, tut.by

U pastanovie paviedamlajecca, što padčas pravierki było vyjaŭlena, što zatrymańnie Sierady pravodziłasia ŭ adpaviednaści z zakanadaŭstvam, paviedamlaje sajt spring96.

U dakumiencie ŭkazvajecca, što rašeńnie ab pryciahnieńni da zatrymańnia supracoŭnikaŭ AMAPa «było pryniataje abhruntavana», a kajdanki i fizičnaja siła vykarystoŭvalisia «dla pieraadoleńnia mahčymaha supracivu» z boku Sierady.

Taksama ŭ pastanovie paviedamlajecca, što dyjahnazy — «zakrytaja čerapna-mazhavaja traŭma lohkaj stupieni: strasieńnie hałaŭnoha mozhu, udar miakkich tkanak hałavy, udar piaredniaj brušnoj ścienki», pastaŭlenyja Haradskoj kliničnaj balnicaj № 10, i «strasieńnie hałaŭnoha mozhu», pastaŭleny 17-j haradskoj kliničnaj paliklinikaj, pryznanyja nieabhruntavanymi, a cialesnyja paškodžańni i ranki, zafiksavanyja zaklučeńniem sudova-miedycynskaj ekśpiertyzy, adniesienyja «da katehoryi lohkich, jakija nie paciahnuli karotkačasovaha rasstrojstva zdaroŭja».

Dźmitryj Sierada maje namier abskardzić dadzienaje pastanovu ŭ prakuratury i ŭ kiraŭnictva SK.

Nahadajem, 4 žniŭnia ŭ 8 ranicy ŭ Minsku ŭ kvateru da siamji piedyjatra i dziciačaha chirurha-traŭmatołaha Dźmitryja Sierady ŭvarvaŭsia AMAP. Mužčyna pračnuŭsia ad udaraŭ taranam u žaleznyja dźviery i vyjšaŭ u kalidor. U hety čas na kuchniu, raźbiŭšy škło ŭ bałkonnaj dźviery, pranikli bajcy ŭ čornym sa zbrojaj u rukach. Žycharam zahadali lehčy na padłohu. Jak potym vyśvietliłasia, Dźmitryja padazravali ŭ złačynstvie. Paźniej na vočnaj staŭcy sa śviedkaj i paciarpiełaj padazreńni adpali — u momant ździajśnieńnia chulihanstva Dźmitryj ź siabrami rybačyŭ za 80 km ad Minska. Adpuścili piedyjatra tolki na druhija sutki.

Na padstavie skarhi siamji na dziejańni supracoŭnikaŭ pry zatrymańni Śledčy kamitet pačaŭ pravierku.

7 vieraśnia Dźmitryj Sierada pabyvaŭ na asabistym pryjomie ŭ kiraŭnika staličnaj milicyi Alaksandra Barsukova.

Kiraŭnik HUUS zajaviŭ Dźmitryju Sieradzie, što prasić prabačeńnia za dziejańni svaich padnačalenych da atrymańnia vynikaŭ pravierki nie budzie. A taksama paviedamiŭ, što toj moža źviarnucca da ich z nahody ramontu paškodžanych voknaŭ i dźviarej u kvatery — pry jaho žadańni heta budzie zroblena.

• 0
• 0
• 0
• 0
• 0
• 0
• 0
• 0