Minčancy prapanavali pieranieści staradaŭni dom pradzieda z centra Davyd-Haradka praz «Dažynki»

Minčanka Nadzieja Turaŭskaja ŭžo niekalki miesiacaŭ viadzie baraćbu za dvuchpaviarchovy dom u centry Davyd-Haradka. Budynak u 1936 hodzie pabudavaŭ jaje pradzied Siamion Kułaha dla svajoj siamji. U 1939 hodzie, paśla prychodu Savietaŭ, dom zabrali. Z tych časoŭ siamja tam nie žyła.

U apošnija hady tut mieściłasia haścinica na 10 numaroŭ, jakaja znachodziłasia na bałansie Stolinskaha ŽKH. Sioleta ŭletku Nadzieja daviedałasia, što staradaŭni dom płanujuć źnieści. Jak havaryłasia ŭ liście sa Stolinskaha rajvykankama, budynak «maje častkovaje razbureńnie padmurka», «nieprezientabielny vyhlad, pazbaŭleny jakoj-niebudź estetyčnaj pryhažości» i «nie maje histaryčnaj kaštoŭnaści».

Nadzieja z rašeńniem rajonnaj viertykali nie pahadziłasia i prapanavała čynoŭnikam nie znosić staradaŭni dom, a pradać joj. Jana hatovaja była addać usie hrošy, kab adramantavać i zachavać budynak. Paśla nieadnarazovych jaje zvarotaŭ u roznyja instancyi ŭłady pajšli na sastupki. U novym liście za podpisam namieśnika kiraŭnika rajonnaj viertykali Ivana Jaromiča havaryłasia, što Stolinski ŽKH daŭ daručeńnie padrychtavać usie nieabchodnyja materyjały i vystavić budynak byłoj haścinicy dla prodažu z aŭkcyjonu. Adnak išoŭ čas, a pra prodaž doma tak i nie było nijakich abjavaŭ.

«Ja čakała aŭkcyjonu. Miesiaca paŭtara ŭžo prajšło, ale nijakich ruchaŭ nie było. My napisali kalektyŭny zvarot u Administracyju prezidenta, dzie paprasili pravieści acenku doma i pradać jaho nam. Tam mnie paraili źviarnucca ŭ Dziaržmajomaść (Dziaržaŭny kamitet pa majomaści. — red.). Dakumienty tam uziali, ale praź niekatory čas patelefanavali i skazali, što hetaje pytańnie nie pa ich častcy, tamu što budynak u kamunalnaj ułasnaści, a nad kamunalnaj ułasnaściu hałoŭnaja — miascovaja administracyja. Mnie paviedamili, što Dziaržmajomaść adpravić moj zvarot u rajon i vobłaść», — patłumačyła Nadzieja Turaŭskaja.

Vynikam biurakratyčnych pakut žančyny staŭ čarhovy list sa Stolinskaha rajvykankama. U papiery havorycca, što ŭ 2017 hodzie Davyd-Haradok stanie stalicaj abłasnych Dažynak.

«Adnym ź mierapryjemstvaŭ praduhledžana dobraŭparadkavańnie płoščy Vyzvalicielaŭ z rekanstrukcyjaj pomnika zahinułym voinam pry vyzvaleńni Davyd-Haradka. Pobač z płoščaj raźmieščany budynak byłoj haścinicy, jaki vychodzić za čyrvonuju liniju zabudovy i znachodzicca ŭ niezdavalniajučym stanie. Historyka-kulturnaj kaštoŭnaści budynak nie ŭjaŭlaje. Z metaj palapšeńnia estetyčnaha vyhladu płoščy Vyzvalicielaŭ, biaśpieki darožnaha ruchu pa vulicy Kalinina, prylehłaj da płoščy, <…> prajektnym instytutam razhladajecca pytańnie ab jaje (haścinicy — red.) znosie. Prymalnaje rašeńnie ab mahčymaści prodažu Vam dadzienaha budynka z abaviazkovym jaho pieranosam ŭ inšaje miesca», — havorycca ŭ liście.

Adkaz rajvykankama ździviŭ Nadzieju:

«Hety budynak pieražyŭ niemcaŭ, Saviety, i ciapier jaho znosiać dziela taho, kab adzin dzień adznačyć «Dažynki», — ździŭlajecca dziaŭčyna.

Pavialičyć

Zamiest doma — parkoŭka?

Los budynka jašče nie vyrašany, paviedamiŭ namieśnik staršyni Stolinskaha rajvykankama Ivan Jaromič. Jak adznačyŭ surazmoŭca, budynak byłoj haścinicy ŭ novuju kancepcyju nie ŭpisvajecca.

«Było pryniata rašeńnie abłvykankama ab praviadzieńni «Dažynak». Siońnia idzie rekanstrukcyja Davyd-Haradka, buduć pravodzić rekanstrukcyju płoščy, škoły, pomnika zahinułym. My zaprasili prajekciroŭščykaŭ, jany nam adrazu skazali, što kali my budziem rabić płošču, to jany napišuć, što hety budynak nieabchodna znosić», — adznačyŭ Ivan Jaromič, padkreśliŭšy, što dom nie maje histaryčnaj kaštoŭnaści.

Pytańnie, što dalej budzie z budynkam, usio jašče na stadyi abmierkavańnia. Adzin z varyjantaŭ — znos i budaŭnictva na jaho miescy parkoŭki.

• 0
• 0
• 0
• 0
• 0
• 0
• 0
• 0