Prahres Biełarusi ŭ adstojvańni demakratyčnych kaštoŭnaściaŭ źjaŭlajecca niedastatkovym, havorycca ŭ pryniataj 24 listapada Jeŭraparłamientam rezalucyi pa Biełarusi.
U dakumiencie adznačajecca, cytuje BiełaPAN, što ŭ Biełarusi pa-raniejšamu źjaŭlajucca palitviaźni, pieraśledujecca apazicyja, prymianiajecca śmiarotnaje pakarańnie.
Taksama, na dumku jeŭraparłamientaryjaŭ, Biełaruś nie ŭ stanie vyrašyć sumnieńni adnosna biaśpieki atamnaj stancyi, jakaja budujecca ŭ Astraŭcy.
U rezalucyi padkreślivajecca, što z 1994 hoda ŭ krainie nie było svabodnych i sumlennych vybaraŭ, a sproby damahčysia hetaha pry praviadzieńni prezidenckich i parłamienckich vybaraŭ u 2015 hodzie i 2016-m akazalisia niedastatkovymi. Klučavyja siektary biełaruskaj ekanomiki pa-raniejšamu znachodziacca pad dziaržaŭnym kantrolem, nivodnaj novaj palityčnaj partyi nie było stvorana ŭ krainie z 2000 hoda, ułady znajšli novyja šlachi dla pieraśledu i navat źniavoleńnia ŭ turmu apazicyi, zajaŭlajuć jeŭraparłamientaryi.
Jany zaklikali biełaruskija ŭłady spynić padobnuju praktyku, a taksama znoŭ zajavili pra hatoŭnaść Jeŭraparłamienta padtrymlivać prademakratyčnyja pamknieńni biełaruskaha naroda.
Deputaty taksama zaklikali Jeŭrapiejskuju słužbu źniešnich dziejańniaŭ i Jeŭrakamisiju pradoŭžyć i ŭzmacnić padtrymku biełaruskich arhanizacyj hramadzianskaj supolnaści jak u Biełarusi, tak i za jaje miežami.
U rezalucyi taksama ŭtrymlivajecca zaklik da Biełarusi dałučycca da maratoryja na śmiarotnaje pakarańnie ŭ jakaści pieršaha kroku na šlachu da jaho poŭnaj admieny.
Akramia taho jeŭradeputaty vykazali zaniepakojenaść u suviazi ź biaśpiekaj budaŭničych rabot na placoŭcy Biełaruskaj AES, jakaja znachodzicca mienš jak za 50 km ad litoŭskaj stalicy. Jany zaklikali da mižnarodnaha kantrolu za budaŭnictvam AES, kab harantavać adpaviednaść prajekta ŭsim normam jadziernaj biaśpieki i achovy navakolnaha asiarodździa.
Za pryniaćcie rezalucyi prahałasavali 468 deputataŭ, 21 suprać i 93 ustrymalisia.
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary