Vybuchovaje prystasavańnie, jakoje nie ŭzarvałosia, było znojdziena ŭ časie kancertu la steły «Miensk —horad‑hieroj» za dźvie hadziny da vybuchu. Heta pryznaŭ pieršy namieśnik ministra ŭnutranych spraŭ, načalnik kryminalnaj milicyi Alaksandar Ščurko — praz čatyry dni paśla zdareńnia, paśla taho jak ananimnyja siłaviki raskazali hety fakt niezaležnym ŚMI.
Vybuchovaje prystasavańnie, jakoje nie ŭzarvałosia, było znojdziena ŭ časie kancertu la steły «Miensk —horad‑hieroj» za dźvie hadziny da vybuchu. Pra heta paviedamiŭ pieršy namieśnik ministra ŭnutranych spraŭ — načalnik kryminalnaj milicyi Alaksandar Ščurko ŭ interviju hazecie «Komsomolskaja pravda» v Biełoruśsii», apublikavanym 9 lipienia.
Pavodle słoŭ sp. Ščurko, «pojeršaje prystasavańnie było ŭ dva razy bolšym za toje, što vybuchnuła», mienčuki, jakija śviatkavali Dzień Niezaležnaści, znajšli jaho prykładna a 22:30, ale nie adrazu addali milicyjantam.
«Hramadzianie padniali ź ziamli dvuchlitrovuju ŭpakoŭku z‑pad soku. Złačynca skarystaŭsia tym, što było pakinuta šmat pakietaŭ z‑pad soku, i hetkim čynam zamaskiravaŭ vybuchovaje prystasavańnie. Pakiet adkryli i, skažam tak, ubačyli elementy vybuchovaha prystasavańnia. Adnieśli supracoŭnikam milicyi», — raskazaŭ namieśnik ministra.
Supracoŭniki milicyi, pavodle słoŭ spadara Ščurko, pakłali pakiet «u biaśpiečnaje miesca».
«Nie było dumki, što heta štości surjoznaje. Mahčyma, iłžyvaja tryvoha, — patłumačyŭ pradstaŭnik MUS. — I, uvohule, stabilizacyja kryminahiennaj sytuacyi apošnim časam krychu rassłabiła siły pravaparadku. Jak u boksie — rassłabilisia j atrymali ŭdar. Hety pakiet byŭ neŭtralizavany, jon nie vybuchaŭ».
Prystasavańnie, jakoje ŭzarvałosia praź dźvie hadziny, taksama znachodziłasia ŭ pakiecie z‑pad soku, jaki, pavodle słoŭ Alaksandra Ščurko, byŭ udvaja mienšym za pieršy.
«My možam dapuścić, što prystasavańnie, jakoje ŭzarvałosia, identyčnaje vyjaŭlenamu i abiasškodžanamu. Takim čynam u nas jość uzor, jość dastatkova infarmacyi dla pravierki, jość śled čałavieka, jaki, vierahodna, nyčyniaŭ i sprabavaŭ pryvieści ŭ dziejańnie prystasavańnie, jakoje nie vybuchnuła», — skazaŭ namieśnik ministra.
Čutki pra znojdzieny a 1:30 jašče adzin «padazrony skrutak» sp. Ščurko nie paćvierdziŭ. «Takoj infarmacyi niama», — skazaŭ jon.
Namieśnik ministra paviedamiŭ, što fotarobat padazravanaha «ŭžo jość, ale ŭvieś čas źjaŭlajucca novyja śviedki».
«Naprykład, maładyja ludzi, jakija ačuniali ŭ balnicach, — udakładniŭ sp. Ščurko. — Jany dajuć novyja dla śledztva pakazańni. Jašče treba budzie sabrać asnoŭnych śviedkaŭ razam, pasadzić za ahulnym stałom, pahavaryć… Nia ŭsim pakul dazvalaje stan zdaroŭja. A apublikavaŭšy adzin fotarobat, my možam źvieści śledztva zusim u inšy, u niasłušny bok. Dla nas važnaje praviadzieńnie aktyŭnych vyšukovych mierapryjemstvaŭ, a nie nadzieja na apaznańnie pa fotarobacie», — skazaŭ namieśnik ministra.
Na pytańnie, ci moža złačynca znachodzicca siarod paciarpiełych, Alaksandar Ščurko adkazaŭ:
«Heta nie vyklučajecca. Ale vy razumiejecie, što nia ŭsie paciarpiełyja źviarnulisia da medykaŭ. Złačynca moh być paranienym, ale nie špitalizavanym».
Pradstaŭnik MUS nia vyklučyŭ, što ŭ časie raśśledavańnia mahčymaja pierakvalifikacyja spravy na «teraryzm» albo «zamach na žyćcio». Nahadajem, kryminalnaja sprava była ŭsčataja 4 lipienia pa častcy 3 artykułu 339 (złosnaje chulihanstva).
Varta adznačyć, što pra fakt znachodžańnia vybuchoŭki za dźvie hadziny da teraktu sp. Ščurko paviedamiŭ tolki paśla taho jak ananimnyja siłaviki raskazali pra heta niezaležnym ŚMI, praz 4 dni paśla zdareńnia.
Kamientary