Vice-premjer Žarko pra try vypadki anafiłaktyčnaha šoku: Situacyja niestandartnaja, ale nie treba zapałochvać nasielnictva

«Try vypadki anafiłaktyčnaha šoku za taki karotki pramiežak času — situacyja niestandartnaja, ale nie treba zapałochvać nasielnictva», — zajaviŭ žurnalistam 25 studzienia vice-premjer Biełarusi, były ministr achovy zdaroŭja Vasil Žarko. U paraŭnańni z suśvietnaj praktykaj vypadkaŭ alerhičnaj reakcyi na miedpreparaty nie tak i šmat, dadaŭ jon.

Pavodle słoŭ Žarko, letaś u Biełarusi było zafiksavana 25 vypadkaŭ alerhičnaj reakcyi na ceftryjakson — preparat u asnoŭnym rasijskaj i polskaj vytvorčaści. Jon taksama padkreśliŭ, što lačeńnie antybijotykami pavinna prachodzić tolki pad nahladam doktara.

Pieršy namieśnik ministra achovy zdaroŭja Dźmitryj Pinievič, razmaŭlajučy z žurnalistami 25 studzienia pierad pačatkam kalehii Ministerstva achovy zdaroŭja, źviarnuŭ uvahu na toje, što vypadki alerhičnaj reakcyi na antybijotyki, jak i inšyja leki, rehistrujucca va ŭsim śviecie.

U 2016 hodzie, paviedamiŭ jon, u Biełarusi było zafiksavana 254 vypadki alerhičnaj reakcyi na lekavyja preparaty. «U hod u śviecie fiksujecca ad adnaho da troch vypadkaŭ na 10 tysiač čałaviek alerhii na leki. Hetyja prablemy byli zaŭsiody», — padkreśliŭ čynoŭnik.

Jon adznačyŭ, što realizacyja ceftryjaksonu ŭ Biełarusi prypynienaja, ciapier hety antybijotyk praviarajuć. Pinievič upeŭnieny «praktyčna na 100%», što vyniki pravierki paćvierdziać adpaviednaść preparata ŭsim nieabchodnym standartam jakaści.

Pieršy namieśnik ministra taksama paviedamiŭ, što dola prymianieńnia ceftryjaksonu ŭ Biełarusi składaje 35-40%. Mienavita z hetaj pryčyny, vykazaŭ mierkavańnie jon, zafiksavanaja takaja kolkaść reakcyj — try vypadki za karotki termin.

Z 16 pa 20 studzienia ŭ Biełarusi ad anafiłaktyčnaha šoku paśla ŭviadzieńnia ceftryjaksonu ź lidakainam pamierła žančyna i paciarpieli dvoje dziaciej.

31-hadovaja žycharka Maładziečanskaha rajona (Minskaja vobłaść) pamierła paśla ŭkołu antybijotyku, ampułu jakoha pryniesła z saboj u fielčarska-akušerski punkt. Pa fakcie śmierci raspačataja kryminalnaja sprava, pryznačanaja sudova-miedycynskaja ekśpiertyza, pravodziacca łabaratornyja daśledavańni.

20 studzienia ŭ Barysavie (Minskaja vobłaść) 11-hadovy chłopčyk byŭ špitalizavany paśla ŭviadzieńnia ŭ chatnich umovach ceftryjaksonu rasijskaj vytvorčaści, nabytaha nie ŭ Biełarusi. Školniku byŭ pastaŭleny dyjahnaz — anafiłaksija na ŭviadzieńnie ceftryjaksonu abo lidakainu, anafiłaktyčny šok. U toj ža dzień u Hancavičach (Bresckaja vobłaść) u reanimacyju miascovaj balnicy była dastaŭlenaja 12-hadovaja dziaŭčynka, jakoj maci ŭviała ceftryjakson dla lačeńnia hnojnaj anhiny. U ciapierašni čas žyćcio dziaciej pa-za niebiaśpiekaj.

Paśla śmierci žycharki Maładziečanskaha rajona realizacyja ceftryjaksonu (parašok dla hatavańnia rastvoru dla injekcyj 1 h u fłakonach, sieryja 210215) i lidakainau hidrachłarydu (rastvor dla injekcyj 10 mh/mł u ampułach 5 mł, sieryja 50910) vytvorčaści AAT «Barysaŭski zavod miedycynskich preparataŭ» była prypynienaja. Časovaja zabarona budzie dziejničać da vyśviatleńnia pryčyn, z-za jakich u žančyny raźviŭsia anafiłaktyčny šok.

• 0
• 0
• 0
• 0
• 0
• 0
• 0
• 0