Abjadnany kaardynacyjny centr Irana, Rasii i hrupovak, što padtrymlivajuć Bašara Asada, paabiacaŭ adkazać na «novyja akty ahresii» suprać Siryi, «ad kaho b jany nie zychodzili». Pra heta, paviedamlaje Reuters, havorycca ŭ zajavie, apublikavanaj kaardynacyjnym centram.
ZŠA, havorycca ŭ dakumiencie, «pierajšli čyrvonuju liniju», naniosšy ŭdar pa siryjskaj uradavaj avijabazie ŭ pravincyi Choms.
«Z hetaha momantu my budziem adkazvać siłaj lubomu ahresaru i na luboje parušeńnie «čyrvonaj linii», ad kaho b jano nie zychodziła. Amieryka viedaje, što my zdolnyja hodna adkazać», - cytuje Reuters zajavu kaardynacyjnaha centra.
Amierykanski ŭdar pa bazie ŭ Siryi abmiarkoŭvaŭsia i ŭ čas telefonnaj razmovy pamiž prezidentam RF Uładzimiram Pucinym i prezidentam Irana Chasanam Ruchani. «Z abodvuch bakoŭ była adznačanaja niedapuščalnaść ahresiŭnych dziejańniaŭ ZŠA suprać suvierennaj dziaržavy ŭ parušeńnie normaŭ mižnarodnaha prava», — paviedamiła pres-słužba Kramla.
ZŠA 7 krasavika nanieśli rakietny ŭdar pa siryjskaj uradavaj bazie ŭ pravincyi Choms. Udar, jak abviaściŭ Vašynhton, staŭ adkazam na vykarystańnie vojskami Asada chimičnaj zbroi ŭ pravincyi Idlib, dzie 4 krasavika zahinuli bolš za 80 čałaviek i bolš za 500 atrymali atručańnie. Siryja ŭžyvańnie chimičnaj zbroi admaŭlaje. Iran i Rasija raniej asudzili ŭdar ZŠA pa bazie ŭ Siryi.
Kaardynacyjny centr Irana, Rasii, Iraka i hrupovak, što padtrymlivajuć Bašara Asada, byŭ stvorany vosieńniu 2015 hoda. Centr znachodzicca ŭ Bahdadzie.
Kamientary