Rasijskija ŚMI ab sustrečy Łukašenki i Parašenki: «Sproba abduryć durnych maskaloŭ»
26 krasavika kiraŭniki Biełarusi i Ukrainy Alaksandr Łukašenka i Piatro Parašenka praviali sustreču ŭ Čarnobyli, a potym užo pieramovy na terytoryi Biełarusi. Rasijskija ŚMI nie nadali hetaj temie šmat uvahi, ale štości cikavaje ŭsio ž źjaviłasia.
Na sajcie «Kołokoł Rośsii» źjaviŭsia artykuł z krasamoŭnaj nazvaj «Łukašenka i Parašenka kreślać vakoł Rasii «voś dabra». Ekśpiertam u materyjale vystupiŭ były hramadzianin Biełarusi, rasijski čarnasocieniec Kirył Avierjanaŭ-Minski. Źviartaje ŭvahu, što jon pradstaŭleny jak ekśpiert Fonda raźvićcia hramadzianskaj supolnaści «Narodnaja dypłamatyja». Pomnicca, što Juryj Barančyk pa pierajeździe ŭ Maskvu niejki čas pradstaŭlaŭsia kiraŭnikom Instytuta infarmacyjnych vojnaŭ.
«Łukašenka padčas sustrečy z Parašenkam pastaraŭsia zapeŭnić jaho ŭ tym, što padtrymlivaje kijeŭskija ŭłady i nahadaŭ pra svaje ŭkrainskija karani, a niadaŭniaje abvinavačvańnie ŭ datyčnaści da teraktaŭ u krainie — heta niejkaja šyrma dla taho, kab «abduryć durnych maskaloŭ», — ličyć Avierjanaŭ-Minski.
«Minsk nie pryznaje terytaryjalnuju cełasnaść RF, ličačy Krym častkaj Ukrainy. Prezident Biełarusi zdolny ŭ isteryčnaj formie vinavacić RF u zachopnickaj i ahresiŭnaj palitycy», — dadaje ekśpiert.
Urešcie Avierjanaŭ-Minski miarkuje, što Ukraina budzie rabić usio, kab pieraciahnuć na svoj bok, «kab maksimalna vykarystoŭvać jaje ŭ baraćbie suprać Rasiei. U svaju čarhu, Biełaruś budzie z radaściu heta rabić, kali ŭ hetym pracesie adčuje svaju vyhadu».
Sajt «Svobodnaja Priessa», jaki redahuje viadomy rasijski piśmieńnik Zachar Prylepin, piša: «Lidary Ukrainy i Biełarusi znoŭ braty-słavianie. Ci nadoŭha?»
Starejšy vykładčyk kafiedry zamiežnaha rehijonaznaŭstva i źniešniaj palityki RHHU Vadzim Truchačoŭ ličyć, što «Łukašenka sprabuje atrymać vyhadu z svajho stanovišča, handlujučy z usimi, padtrymlivajučy suviazi z usimi. Inakš biełaruskaje kiraŭnictva prosta nie moža siabie pavodzić». Pry hetym Truchačoŭ ćviaroza ŭśviedamlaje, što biełaruskaja hramadstva nie adnarodnaje. Chapaje tych, chto padtrymlivaje ŭ kanflikcie i Rasiju, i Ukrainu.
Na sajcie Russia Today ekśpiertam vystupiła Volha Karač, mienavita ŭ jaje najčaściej biaruć kamientary adyjoznyja rasijskija vydańni pa temie Biełarusi, Karač nie admaŭlajecca nikoli.
«Ciapier pačynajecca vialikaja hulnia, jakaja ŭ tym liku pradvyznačyć palityčny vybar Biełarusi ŭ bližejšyja niekalki hadoŭ. I ŭ hetaj hulni aficyjny Minsk sprabuje vykarystoŭvać Ukrainu ŭ niekalkich metach.
Pa-pieršaje, siabravać suprać kahości zaŭsiody lahčej. Pa-druhoje, dla Łukašenki važny vychad na jeŭrapiejcaŭ i amierykancaŭ, i jamu patrebnyja łabisty dla hetych kantaktaŭ. Ukraina idealna padychodzić dla hetaj roli», — upeŭnienaja Karač. Faktyčna pradstaŭnica hramadskaj kampanii «Naš dom» praciahvaje dumku niekatorych rasijskich prapahandystaŭ, što Biełaruś «sychodzić na Zachad», chacia nijakich realnych padstavaŭ tak mierkavać niama.
Abureńnie rasijskich ŚMI vyklikała damova ab nakiravańni biełaruskaj humanitarnaj dapamohi na Danbas. Antybiełaruski sajt EurAsia Daily ŭspaminaje: «Biełaruś źjaŭlajecca lidaram pa pastaŭkach Kijevu dyzielnaha paliva. Akramia hetaha, u zonu «ATA» pastaŭlajucca biełaruskija MAZy dla pieravozki asabovaha składu ŭkrainskich karnych padraździaleńniaŭ. Akramia taho, biełaruskija śpiecyjalisty ŭdzielničajuć u sumiesnych vajennych raspracoŭkach z ukrainskimi kalehami. Taksama nahadajem, u studzieni 2017 hoda Łukašenka zajaviŭ: «Nam niezaležnaść vielmi tanna dastałasia: usie narody vajavali, siońnia vajuje naša braterskaja Ukraina».
Sajt «Ruskaja viasna» vynies u zahałovak słovy Łukašenki: «Piatro Alaksiejevič, u treci raz kažu, my — rodnyja ludzi». Sajt telekanała Ministerstva abarony «Źviezda» nazvaŭ Parašenku «radyjeaktyŭnym».
«U Čarnobyli prezident Ukrainy byŭ samoj «miralubnaściu». «Ja ŭpeŭnieny, što ukrainska-biełaruskaja miaža była, jość i zaŭsiody budzie miažoj družby, dobrasusiedstva, našaha nadziejnaha partniorstva. Padkreślivaju, miažoj mira, — adznačyŭ Parašenka. — Nichto i nikoli nie zmoža ŭciahnuć Biełaruś u vajnu suprać Ukrainy. Hetaha nie dapuścić miralubivy lud Biełarusi i jaje vopytny i hodny prezident Alaksandr Łukašenka». A ŭ svaich kurataraŭ z Vašynhtona jon pacikaviŭsia nakont ich płanaŭ na «mirnuju» jeŭrapiejskuju budučyniu?» — zadajecca pytańniem aficyjnaja «Rośsijskaja hazieta».
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza14
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii1616
Kamientary