Rasijski televiadučy Uładzimir Poźnier u efiry Pieršaha kanała prakamientavaŭ prysud «łaŭcu pakiemonaŭ» Rusłanu Sakałoŭskamu za abrazu pačućciaŭ viernikaŭ. Tak Poźnier zaviaršyŭ svaju pieradaču, pakazanuju ŭ efiry ŭviečary 15 maja.
«Pavažanyja hledačy, liču nieabchodnym papiaredzić vas pra toje, što mianie, mahčyma, pryciahnuć da suda i pakarajuć na termin», — zajaviŭ Poźnier, nahadaŭšy, što ŭ matyvujučaj častcy prysudu Sakałoŭskamu fihuravali słovy ab admaŭleńni isnavańnia boha. Sam Poźnier źjaŭlajecca ateistam.
Poźnier zajaviŭ, što «chacieŭ by atrymać vyčarpalnyja tłumačeńni», parušaje ateizm Kryminalny kodeks ci nie. Z hetym pytańniem jon źviarnuŭsia da patryjarcha Kiryła, kiraŭnika Kanstytucyjnaha suda Valeryja Zorkina i prezidenta Rasii Uładzimira Pucina.
«Moža, kiraŭnik dziaržavy ŭniasie jasnaść: ci nie čakaje mianie sud i, daść boh (prabačcie za kałambur), «miakki «prysud», — reziumavaŭ Poźnier.
***
11 maja sud u Jekaciarynburhu prysudziŭ Sakałoŭskaha da 3,5 hoda ŭmoŭnaha terminu za abrazu pačućciaŭ viernikaŭ, raspalvańnie nianaviści i niezakonny abarot techniki dla schavanaha nazirańnia. Spravu suprać Sakałoŭskaha raspačali paśla publikacyi rolika, dzie jon łović pakiemonaŭ u chramie praz hulniu Pokemon Go.
U tekście prysudu sudździ Kaciaryny Šapaniak jość cytata z ekśpiertnaha zaklučeńnia ab tym, što Sakałoŭski hruba adklikajecca pra ludziej, bo sam admaŭlaje isnavańnie Isusa Chrysta i praroka Muchamieda. Tak apisany adzin sa składaŭ złačynstva pa artykule ab abrazie pačućciaŭ viernikaŭ.
Poźnier paśladoŭna vystupaŭ suprać źjaŭleńnia ŭ Kryminalnym kodeksie artykuła ab abrazie pačućciaŭ viernikaŭ z momantu, kali hetaja inicyjatyva tolki abmiarkoŭvałasia ŭ Dziaržaŭnaj dumie.
Kamientary