Prejhierman patłumačyŭ, čamu apazicyjnych palitykaŭ nie zaprasili na «Minski dyjałoh»

Kiraŭnik ekśpiertnaj inicyjatyvy «Minski dyjałoh» Jaŭhien Prejhierman, jaki 18-19 maja ładzić mižnarodnuju kanfierencyju «25 hadoŭ zamiežnaj palityki Respubliki Biełaruś», ličyć, što apazicyjnyja palityki nie pavysiać vartaści dyskusijaŭ, jakija majuć adbycca.

«Inicyjatyva paŭstała dva z pałovaj hady tamu. Z samaha pačatku my padkreślivali, što heta ekśpiertnaja placoŭka. My znarok chočam paźbiahać palityzavanaj dyskusii, kab stvaryć prafiesijnuju ekśpiertnuju dyskusiju. Niachaj palityki zajmajucca svaimi spravami. My ŭvohule bačym prablemu ŭ tym, što ŭ Biełarusi da hetaha času niama prafiesijnaj ekśpiertnaj placoŭki ŭ pytańniach mižnarodnych adnosin i biaśpieki ŭ rehijonie. Najaŭnaść palitykaŭ, jaki prafiesijna nie zajmajucca hetymi pytańniami, naŭrad ci pavysić vartaść našaj dyskusii», — skazaŭ Jaŭhien Prejhierman.

Pavodle prahramy kanfierencyi, u joj voźmuć udzieł ministr zamiežnych spraŭ Biełarusi Uładzimir Makiej, a taksama Siarhiej Rachmanaŭ, jaki ŭznačalvaje pastajannuju kamisiju Savieta Respubliki pa mižnarodnych spravach i nacyjanalnaj biaśpiecy. U jakaści śpikieraŭ zajaŭlenyja byłyja ministry zamiežnych spraŭ Piatro Kraŭčanka, Uładzimir Siańko, Ivan Antanovič i Michaił Chvastoŭ. U dyskusii buduć udzielničać kiraŭnik ofisa ABSIE Hans Johan Šmit, kiraŭniki ekśpiertnych supolnaściaŭ Dzianis Mieljancoŭ, Andrej Kazakievič, Jury Šaŭcoŭ dy inšyja.

U pačatku tydnia stała viadoma, što zaprašeńni na kanfierencyju atrymali Uładzimir Niaklajeŭ i Pavieł Sieviaryniec. Zaprašeńni byli adpraŭlenyja z «levych» elektronnych adrasoŭ, ale adkaz treba było vysłać na aficyjny adras «Minskaha forumu».

Jaŭhien Prejhierman ličyć, što takim čynam niechta chacieŭ arhanizavać miedyjny zryŭ kanfierencyi, bo zaprošanyja z fejkavych akaŭntaŭ palityki daviedalisia, što nasamreč ich nichto nie zaprašaŭ, i vykłali hetuju infarmacyju ŭ sacyjalnyja sietki, dzie jana była padchoplenaja ŚMI.

«Praz 2 z pałovaj hady, jak my pracujem, niechta vyrašyŭ zrabić skandalnuju situacyju praz rassyłku z fejkavaha mejła. My pakul dakładna nie viedajem, chto i ź jakoj metaj heta zrabiŭ, choć hipotezy jość. Budziem spadziavacca, što ŭsio ž daviedajemsia. Ahułam situacyja takaja. My stvarali hetuju placoŭku dla taho, kab u joj udzielničali ludzi, jaki prafiesijna zajmajucca mižnarodnymi dačynieńniami. Prafiesijna — heta značyć ci dypłamaty, ci analityki.

A ŭ palitykaŭ, jakija naviedvajuć takija mierapryjemstvy, kab rabić palityčnyja zajavy, pavinny prychodzić na inšyja placoŭki. Nam treba stanavicca bolš prafiesijnymi. A to atrymlivajecca, što na kožnaje mierapryjemstva — tyčycca jano kultury, mižnarodnych adnosin ci pravoŭ čałavieka — vystupajuć adny i tyja ž ludzi i robiać adny i tyja ž zajavy».

Prejhierman ličyć, što metaj fejkavaj rassyłki było sarvać kanfierencyju:

«My ŭžo pačali demanstravać niejkija vyniki. Ja padkreślu, što naša placoŭka abjadnoŭvaje pradstaŭnikoŭ roznych punktaŭ hledžańnia. U nas jość i zamiežnyja dypłamaty, i pradstaŭniki Ministerstva zamiežnych spraŭ Biełarusi, a taksama pradstaŭniki niezaležnaj ekśpiertnaj supolnaści — buduć Andrej Kazakievič, Valer Karbalevič, Alaksandar Kłaskoŭski, Andrej Fiodaraŭ. A ŭ nas chapaje tych, chto nie zadavoleny tym, što ŭ nas jość abjadnalnyja placoŭki, jakija nie pracujuć u styli «siadzim u akopach i zakidvajem adzin adnaho».

Padčas kanfierencyi planujecca razhladzieć niekalki temaŭ, siarod jakich historyja zamiežnapalityčnych dačynieńniaŭ Biełarusi, raźvićcio dyplamatyčnych adnosin Biełarusi, a taksama jaje rola ŭ vyrašeńni vajenna-palityčnych kanfliktaŭ u rehijonie.

Kanfierencyja projdzie ŭ hateli Double Tree by Hilton ŭ Miensku.

• 0
• 0
• 0
• 0
• 0
• 0
• 0
• 0