Fiłosafu Rudkoŭskamu admovili ŭ arendzie kvatery, bo jon biełaruskamoŭny. Haspadar: «Usio nie tak»
Dyrektar Biełaruskaha instytuta stratehičnych daśledavańniaŭ Piotra Rudkoŭski śćviardžaje, što jamu admovili ŭ arendzie kvatery tolki praz toje, što jon havaryŭ pa-biełarusku.
«Za 20 hadoŭ užyvańnia ŭ Biełarusi biełaruskaj movy tolki zredku davodziłasia sutykacca z adčuvalnaj dyskryminacyjaj pa pryznaku biełaruskamoŭja. I nie ŭ maim styli skardzicca na «ciažkuju dolu» biełaruskamoŭnych. Ale časam heta dyskryminacyja ŭsio ž daje ab sabie znać, i to baluča. Niejki Andrej, jaki praz sajt neagent.by zdaje kvateru, admoviŭsia mieć sa mnoj dačynieńnie pa toj tolki pryčynie, što havaru pa-biełarusku. Navat zapeŭnivańnie ŭ pavazie da jaho zvyčaju havaryć pa-rasiejsku nie dapamahło, i abiacańnie, što budu pierachodzić — u vypadku nieabchodnaści — na rasiejskuju. Dastatkova taho, što ty zahavaryŭ pa-biełarusku. Pakolki staronka neagent.by — publičnaja prastora, ludzi, jakija praź jaje dziejničajuć, abaviazany trymacca zakonaŭ i zachoŭvać Kanstytucyju. Kali chtoś choča absłuhoŭvać tolki rasiejskamoŭnych, to chaj zasnoŭvaje svoj pryvatny sajt i sielekcyjanuje ludziej pa moŭnym pryncypie. Napisaŭ administracyi. Ale, mahčyma, patrebny bolš vyraznyja formy napaminu pra zakony i pryncypy», — napisaŭ Rudkoŭski ŭ svaim fejsbuku.
Žurnalist «Našaj Nivy» źviazaŭsia z haspadarom kvatery, Andrejem. Jon u chodzie razmovy nie pryznaŭ svaich pretenzij da nośbitaŭ movy.
«Ja razhledzieŭ jaho [Piatro Rudkoŭskaha] jak patencyjnaha najmalnika i ŭ miakkaj siabroŭskaj formie skazaŭ, što jon nie padychodzić. Ale nie pa pryčynie taho, što jon havaryŭ pa-biełarusku. Prablemy moŭnaj niama. Ja ž razhladaju roznych najmalnikaŭ, ja mušu svaje intaresy taksama nie zabyvać. Što tut niezvyčajnaha? Źviartajucca dziasiatki ludziej, abiaru ja adnaho. Kali ŭ jaho svajo niejkaje bačańnie, to što ž. U mianie voś takoje», — skazaŭ nam Andrej.
My taksama paprasili acanić hetuju situacyju jurysta-pravaabaroncu Valancina Stefanoviča.
Toj patłumačyŭ, što kali ŭjavić admovu mienavita z arhumientacyjaj «nie zdaju biełaruskamoŭnym», to heta budzie źjaŭlacca dyskryminacyjaj. Praŭda, isnuje pytańnie, ci možna budzie navat pry najaŭnaści aŭdyjozapisu abiarnuć spravu na svaju karyść u sudzie — u Biełarusi, kaža Stefanovič, niama antydyskryminacyjnaha zakanadaŭstva i stałaj praktyki jaho prymianieńnia.
Ciapier čytajuć
U Tajłandzie źnikła anlifanščyca ź Pinska. Jaje mahli pradać u Mjanmu3
Kamientary