«My prosta razyšlisia» — Taćciana Karatkievič pra zapałochanych biełarusaŭ, kadebiscki «falksvahien» i Andreja Dźmitryjeva

U traŭni 2017-ha «Havary praŭdu» atrymała aficyjnuju rehistracyju. Ruch, jaki pravioŭ dźvie prezydenckija kampanii i zajaŭlaŭ pra namier stać palityčnaj partyjaj, ciapier maje status respublikanskaha daśledča-aśvietnickaha abjadnańnia. Nia mienšy rozhałas atrymała i navina pra toje, što praz dva hady paśla vybaraŭ eks-kandydatka ŭ prezydenty ad «Havary praŭdu» Taciana Karatkievič raźviałasia z mužam.

Radyjo Svaboda pahavaryła ź liderkaj ruchu pra toje, z kim svaryłasia «Havary praŭdu», čamu abjadnańnie nie padtrymała pratesty suprać Dekretu № 3 i kali pakliča ludziej «na płošču».

— Taciana, ja ŭžo navat nie zhadaju, kali apošni raz rehistravali tych, chto nazyvaje siabie apanentami ŭłady. Badaj, ruch «Za svabodu» byŭ zarehistravany ŭ 2008 hodzie. Moža, paśla padziejaŭ 25 sakavika ŭładzie dziela čarhovaj demanstracyi liberalizacyi zachaciełasia zarehistravać samaha lajalnaha apanenta? Nie adčuvajecie siabie raźmiennaj manetaj?

— Nie! Kali b ja na vybarach atrymała 4 adsotki, to ja b skazała — nu, tak, zarehistravali. Ale ŭ mianie inšaje pačućcio. Ciapier usio stała na svaje miescy.

My adna z arhanizacyj — apanentaŭ ułady. My isnujom užo 7 hadoŭ. U nas było pryznańnie de-fakta, bo ja navat u svaich ulotkach padčas prezydenckaj i parlamenckaj kampanij pisała, što ja siabra «Havary praŭdu». Ale nie było pryznańnia de-jure. Ciapier jany spałučylisia.

My nie čakali, što budzie rehistracyja. Ale my pracavali na heta i ŭnutry krainy, i vonki. Paśla vybaraŭ my šmat sustrakalisia z palitykami ŭ Eŭropie, Amerycy, dzie my kazali — voś toj paradak dnia, jaki my prapanujem dziela zbližeńnia Zachadu i Biełarusi. My bieśpierapynna padavali na rehistracyju. Šosty raz my navat padavali ŭ Viarchoŭny sud, abskardžvali admoŭnaje rašeńnie. Nielha kazać, što my prosta siadzieli ŭ kustach i čakali.

— Ci vaša rehistracyja nie padziaka ad uładaŭ za toje, što «Havary praŭdu» tak ścipła ŭdzielničała ŭ pratestach suprać dekretu ab darmajedztvie?

— Heta nie źviazana. My ŭ svajoj pazycyi da pratestaŭ padyšli pradumana z ulikam dośviedu, jaki ŭ nas jość, i zapatrabavańniaŭ hramadzian. Ludzi majuć prava vyjści na vulicu, kali nakipieła, a haradzkija ŭłady pavinny zabiaśpiečyć ich biaśpieku, a nie nakiroŭvać svaju moc na toje, kab zakryć hetym ludziam rot.

Ja čytała novaje daśledavańnie pra toje, što čałaviek chutčej za ŭsio navučajecca strachu. Nie chaču skazać, što ŭ nas zanadta zapałochanyja ludzi, ale jany ŭsio ž vybirajuć pieraściarohu ŭ takich pytańniach, jak «ci iści na vulicu», «ci pisać list u administracyju». Tamu my ŭličvali faktar biaśpieki, uličvali, što ludzi bajacca stracić navat apošniaje miesca aficyjnaj pracy z małym zarobkam.

My pracavali sa zvarotami, pravodzili lehalnyja schody, jeździli pa rehijonach, tłumačyli, što ludziam varta rabić. Zaklikali, kab ludzi nie płacili [«padatak na darmajedztva». — RS] — heta taksama pratest. Jak vyśvietliłasia, 90% ludziej i nie zapłaciła. My im kazali, jakija kroki jany jašče mohuć zrabić, kab ich hołas byŭ pačuty. Heta zvaroty ŭ administracyju, apratestoŭvańnie, listy ŭ padatkovuju. I my vychodzili tudy, dzie akcyi dazvolenyja, spryjali dyjalohu — kazali, što treba akcyi dazvalać.

— A sami vy byli na niejkaj akcyi suprać dekretu?

— Mnie padajecca, što i nie. Nia skłałasia ŭ mianie. Ale našy siabry byli ŭ Babrujsku, Harodni. My kazali, što heta niebiaśpiečna, što reakcyja našaj ułady nieadekvatnaja, tamu vy całkam biarycie na siabie adkaznaść i budźcie vielmi aściarožnyja. My viedali, što nia zmožam pryjechać ź Miensku i abaranić hetych ludziej. Usio ž ludzi prymali takoje rašeńnie i vychodzili.

— Ci aznačaje heta, što pazycyja «Havary praŭdu» — nie zaklikać ludziej na vulicy?

— My budziem zaklikać ludziej na vulicy na dazvolenyja mierapryjemstvy. Rabić tak, kab hetyja mierapryjemstvy byli dazvolenyja, kab heta było pačuta. Bo kali jość napruha nakont taho, što heta niesankcyjanavanaja akcyja, heta zaŭsiody pryvodzić da taho, što mienš ludziej na ich prychodzić…

— Jakraz naadvarot, na dazvolenyja akcyi prychodziła mienš ludziej…

— Heta pakul što… Jość jašče asablivaści našaj demakratyčnaj supolnaści, zaanhažavanaj na sto adsotkaŭ. My pavinny vyvučycca palityčnaj kultury. Lepš pryjści na arhanizavanuju akcyju, kab nichto nia trapiŭ va ŭmovy ahresii i kab być pačutym, čym potym tydzień chadzić pa sudach, rychtavać pieradačy… Tady fokus na paradku dnia — dziela čaho ludzi vyjšli na akcyju, — jon hublajecca. A heta adna ź jarkich častak palityčnaha žyćcia. Ty buduješ svaju dziejnaść, farmuluješ paradak dnia, pracuješ ź ludźmi ŭ kabinetach, na pikietach, u padpisnych kampanijach. I pikiety, masavyja akcyi — heta praciah, adna z častak. A ahresija ssoŭvaje fokus adrazu ŭ pravaabarončy, i my hublajem toj dyjalohavy patencyjał, kab nas ludzi pačuli kapitalna.

— Vy aceńvajecie jak nieefektyŭnyja dziejańni palitykaŭ, jakija zaklikali na akcyi? U tym liku Mikałaja Statkieviča, Anatola Labiedźki, inšych?

— Zališniaja palityzavanaść u hetym była. Heta byŭ vidavočny intuityŭny sacyjalny pratest u rehijonach. Vielmi važny momant, bo takoha nie było ŭ historyi. Ale kali b byŭ sfarmulavany adzin mesydž — admiena dekretu, usie astatnija dziejańni i palityčnych partyj, i tych ludziej, jakija vyjšli, byli b bolš efektyŭnyja.

A ź inšaha boku, nielha zdymać z rachunku i taho, kolki hetaja tema padymałasia ŭsimi palityčnymi partyjami, palitykami na praciahu dvuch hadoŭ da hetych pratestaŭ. Była niaspynnaja praca. I pieršyja listy [pra spłatu padatku. — RS] pastavili kropku ŭ razumieńni ludziej pra spraviadlivaść, pra ŭładu. Tak heta spracavała.

— Ci zastałosia ŭ ludziej adčuvańnie, što jany čahości damahlisia?

— Składana skazać. Dumaju, što prostyja ludzi, jakija vyjšli na vulicu i jakim potym pa televizii jasna skazali, što «my zamarozili hety dekret, a tym, chto ŭładkavaŭsia, my vierniem hrošy», — jany atrymali pazytyŭnuju zvarotnuju suviaź. Ale kali abjektyŭna pahladzieć, što kala 90% nie zapłaciła [«padatak na darmajedztva». — RS], a 10 tysiač usiaho za hety peryjad vyjšli [na akcyi pratestu. — RS], to niašmat ludziej adčuvajuć hetaje zadavalnieńnie. I heta jašče, na žal, nia skončanaja praca.

— Vy čakajecie niejkaha sacyjalnaha vybuchu bližejšym časam?

— Ja nie čakaju. U mianie niama takich adčuvańniaŭ. My atrymali tranš ad Rasiei z Eŭrazijskaha fondu stabilizacyi i raźvićcia, sytuacyja tryvaje, niama syhnałaŭ, što budzie horš. Siońnia ludzi zaniatyja svaimi asabistymi spravami — dzie znajści pracu, dzie padzarabić jašče hrošaj. Ułada pracuje tak nieefektyŭna, što da jaje ŭžo ludzi navat nie źviartajucca. U palityčnych partyj jość paradak dnia, ale realnaha planu, jak heta realizavać, niama.

Z boku ŭłady była ahresija, i častka ludziej vyvučyła heta vielmi chutka. «Havary praŭdu» svaju siońniašniuju dziejnaść buduje nie na tym, kab vyvieści ludziej na vulicy. My pracujem na inšaje.

— Vy šmat kamunikujecie z uładaj. Jakija tam nastroi? Ci chočuć tam bolšaha zbližeńnia z Eŭropaj? Ci tam bolš ludziej z prarasiejskimi nastrojami?

— Ludzi ŭnutry systemy mała viedajuć pra Eŭropu i mahčymaści, jakija adkryvajucca. Heta samaje hałoŭnaje. Niekatoryja, kaniečnie, viedajuć — ministerstvy i mienski isteblišment. Ale hłybiej heta nie pajšło. Kab heta było bolš zrazumieła, nie chapaje prostych čałaviečych stasunkaŭ, biznes-stasunkaŭ, adukacyjnych. Navat tyja prahramy padtrymki, jakija siońnia dziejničajuć — i adbudova miažy, i ekalahičnaja ekanomika, i miascovyja prajekty, jakija padtrymlivajucca praz Eŭraźviaz, — nie dajuć pazytyŭnaha efektu.

Pa-druhoje, dyjaloh i stasunki nia mohuć zbudavacca za adzin kantakt, za adnu razmovu. Pavinien prajści peŭny čas.

Ale jość inšaja sytuacyja: i našy čynoŭniki, i našy deputaty majuć bolš adładžanyja suviazi z Rasiejaj. Jany tam bačać prykłady, znachodziać ludziej, jakija im niešta prapanoŭvajuć. Navat u ramkach sankcyj u ich jość niejkaja ŭnutranaja mabilizacyja.

My ŭ «Havary praŭdu» kažam, što bolš Eŭropy pavinna być tut, u Biełarusi.

Pavialičyć

— Za siem hadoŭ isnavańnia «Havary praŭdu» abviaščała pra mnostva raznastajnych kampanij — ad vulicy Bykava da Narodnaha referendumu. Jakija ź ich dasiahnuli vyniku, jakija — nie?

— Pačniom ź pieršaj akcyi — «Vulica Bykava ŭ Miensku». Zdajecca, usio było dobra: i sama ideja klasnaja, i zroblena było šmat. Ale ŭsio raźbiłasia vielmi prosta: ułada spałochałasia, što heta vielmi palityzavanaja akcyja i što źjaŭlajecca palityčnaja kankurencyja. Mnie zdajecca, nas tam nie pačuli i hramadztva nas nie pačuła. My nie zmahli hodna pradstavić tysiačy sabranych podpisaŭ u Miensku i bolš za 10 tysiač u Harodni. My sami, mahčyma, heta palityzavali. Adsutnaść dyjalohu pryviała da taho, što hetaje pytańnie zastałosia zamarožanym. Ale my jaho nia kidajem. Jość Bykaŭ, Baradulin, Buraŭkin, i naš abaviazak — zrabić tak, kab ich imiony byli bolš hučnymi i zastalisia dla našych dziaciej.

Adnoj z paśpiachovych była kampanija Narodnaha referendumu pa piaci vielmi aktualnych pytańniach. I hetaja kampanija mieła važnuju rolu i ŭ majoj prezydenckaj kampanii, bo ź jaje była sfarmulavanaja prahrama.

Z taho, što my zrabili, dla mianie važnyja niekalki rečaŭ. Pa-pieršaje, nia kidać ani ŭ jakim razie i dziejničać zaŭsiody, navat nasupierak niejkim svaim stereatypam. Pa-druhoje, šukać prychilnikaŭ paŭsiul i razmaŭlać z kožnym.

— Ale ŭ vypadku z Narodnym referendumam kryter paśpiachovaści vielmi prosty — adbudziecca referendum ci nie? Ničoha nie pakazvaje, što jon adbudziecca. A ŭ vyniku vy jak kampanija bolš stracili, čym atrymali: svajoj mety vy nie dasiahnuli, rassvarylisia z usimi paplečnikami pa kampanii… (Partyja BNF, ruch «Za svabodu», BSDH «Hramada», jakija byli inicyjatarami kampanii razam z «Havary praŭdu», zajavili praz dva hady, što vychodziać ź jaje. — RS)

— «Havary praŭdu» ni z kim nie svaryłasia (śmiajecca). I ja chaču heta padkreślić. Dla nas heta byŭ prykład kaaperacyi. Kali inšyja arhanizacyi paličyli, što ŭ nas inšyja mety, i jany nie žadajuć bolš u hetym kirunku kaaperavacca, i toje, što referendum nie adbyŭsia, taksama paŭpłyvała… — my prosta razyšlisia… I my ni z kim nie svarylisia, i, spadziajusia, nikoli nia budziem, bo nia čas.

Dla nas hetaja kampanija była paśpiachovaja. My šmat čaho zrabili ŭnutry našaj arhanizacyi, sfarmulavali klasny aktualny paradak dnia i pajšli ź im dalej. I heta pryviało da pośpiechu kampanii «Mirnych pieramienaŭ». Nie mahu pra heta nie skazać. Usio ž prezydenckaja kampanija i prahrama «Mirnych pieramienaŭ» nabrali šmat hałasoŭ — i heta pośpiech. Kali paraŭnoŭvać z tym, što my ŭ 2010 hodzie išli z zanadta revalucyjnaj kampanijaj i kandydatam, to tut my źmianili svaju stratehiju ŭ kirunku «nia važna chto, a važna, što my prapanujem». I heta pośpiech i dla ŭsich siabraŭ našaj kamandy. Heta mabilizuje ludziej vakoł nas.

Pavialičyć

— U Mikałaja, syna Alaksandra Łukašenki, i Jelisieja, syna Taciany Karatkievič, roznyja dziacinstvy ŭ Biełarusi?

— Kaniečnie.

— Jelisiej choča da 9 hadziny chadzić u škołu?

— My heta navat nie abmiarkoŭvali. Jamu hetaje pytańnie nia važnaje. A što ahułam tyčycca dziaciej, to hałoŭnyja prablemy — heta adukacyja i medycyna. U nas, dziakuj bohu, usio dobra, ale ja baču šmat prablemaŭ, jakija, na žal, nie vyrašalnyja. U nas šmat ankazachvorvańniaŭ u krainie. Maje zamiežnyja siabry pabačyli ŭ nas sacyjalnuju reklamu pra toje, što idzie zbor hrošaj na aperacyju. I pieršaje pytańnie, jakoje jany zadali: «U vas ža biaspłatnaja medycyna?!». Čamu treba źbirać hrošy, jakich čaściej za ŭsio ŭ ludziej niama?

I ŭ medycynie, i ŭ adukacyi jość adna ahulnaja prablema — rečaisnaść adroźnivajecca ad taho, što deklarujecca. Časam prablema, mnie padajecca, i ŭ tym, jak da hetaha staviacca sami hramadzianie. Čaściej za ŭsio my idziem i płacim.

Ja pryjšła 15 sakavika z Maršu niedarmajedaŭ — i atrymlivaju paviedamleńnie, što mnie treba skinucca na vokny ŭ himnazii. I ja takaja dumaju: my płacim za padručniki, za charčavańnie, za alimpijady navat, kali my kažam pra intelektualnaje raźvićcio. My prapłačvajem haspadarčyja patreby — papieru, vadu, kuplajem pracoŭnyja sšytki. A paśla treba jašče i adramantavać klasy. Kali heta ŭsio padličyć, mnie zdajecca, što my i apłačvajem hety darmajedzki padatak. Heta niespraviadliva.

Toje samaje i ŭ medycynie. I škada, što heta tyčycca dziaciej.

Siońnia navat siarod školnikaŭ mała dziaciej, jakija matyvavanyja na dasiahnieńni. I heta nia tolki tamu, što škoła drennaja. Ale i tamu, što darosłaje žyćcio nia vielmi pryvabnaje. Dzicia žyvie nazirańniami za svaimi blizkimi: ci paśpiachovyja jany, ci nie, pra što jany havorać, dumajuć, što jany vybirajuć. Mnie padajecca, heta bolš upłyvaje, čym niajakasnaja systema adukacyi.

Vy byli hatovyja da taho, što navina pra vaš razvod budzie na topavych staronkach u ŚMI? Pry tym, što ŭ 2016 hodzie ŭ Biełarusi na 64 tysiačy šlubaŭ było 32 tysiačy razvodaŭ?

— Ja publičny čałaviek. Heta ŭžo častka majho žyćcia, i ja hatovaja da taho, što heta moža być. Kali ŭ mianie brali interviju i zapytalisia pra siamju, ja nie mahła nie raskazać, što ŭ mianie adbylisia pieramieny. Tak atrymałasia. A što ŭ hramadztvie lubiać niečaje asabistaje žyćcio prapałaskać, heta viadoma.

— Nina Stužynskaja ŭ svaim fejsbuku źviarnuła ŭvahu na charaktar kamentaroŭ, jakija byli pad hetaj publikacyjaj na adnym z resursaŭ. Ja taksama pajšła ich pačytać i była ŭražanaja tym, kolki kamentataraŭ zrabili vas vinavataj, a taksama ahulnym žančynanienaviśnickim tonam hetych dopisaŭ. Vy adčuvajecie, što svaim prykładam niešta pamianiali ŭ staŭleńni da žančyny?

Ja patelefanavała i padziakavała spadaryni Stužynskaj, bo sapraŭdy heta padtrymka. Pa-druhoje, jana pradstaŭlaje žanočuju arhanizacyju, jana sama lider, mocny čałaviek. Toje, što jana vykazała svaju pazycyju, taksama paŭpłyvaje na ludziej, schilnych da rezkich acenak. Da taho, što hramadztva budzie vinavacić žančynu, ja była hatovaja. Mahčyma, maja adkrytaja pazycyja, toje, što ja raskazała [pra razvod], moža heta źmianić. Ja zaniała adkaznuju pazycyju ŭ dačynieńni da svajho žyćcia, žyćcia i budučyni svajho dziciaci i navat svajho muža.

Z prajavami žančynanienaviśnictva ja sustrakajusia redka. Čaściej ja sustrakajusia z pazycyjaj niedaaceńvańnia žanočych kampetencyj. Chacia statystyka ŭ nas takaja, što žančyny šmat kirujuć, zajmajuć pasady. Prosta jany nia bačnyja. Jany, moža, takija ścipłyja, nia tak lubiać raskazvać pra svaje pośpiechi, jak mužčyny. U mužčyny luby pośpiech — i jon adrazu hieroj z šaškaj. A žančyny, u maim ujaŭleńni, bolš ścipłyja, bolš «pra spravu», mahčyma, buduć bolš sumniavacca, čym raskazvać pra svaje dasiahnieńni. Hetaha nie chapaje.

I kankurencyja nia vielmi zdarovaja. Kali b u nas byli adkrytyja konkursy na pasady, vakansii ŭ ministerstvach, universytetach — my b pahladzieli, jakija kampetencyi i mahčymaści jość u mužčyn i žančyn.

— Nie mahu nie zaŭvažyć, što abiedźvie apazycyjnyja kandydatki, jakija prajšli ŭ parlament, — žančyny. Tut jość kolkasny patencyjał, kab prademanstravać hiendernuju roŭnaść, ale jaje niama.

— A mahła b być adna Karatkievič (śmiajecca).

— Sočycie za tym, jak spadaryni Anisim i Kanapackaja dziejničajuć jak deputatki?

— Kali atrymlivajecca, tak. Jany abiedźvie dosyć aktyŭnyja. U tym liku dziakujučy medyjam. Jany svaim prykładam upłyvajuć na dziejnaść inšych deputataŭ. Moža, heta ciapier nia bačna, ale jany starajucca być publičnymi, vykazvacca. A heta važny krok. Bo kali ty publičny, vykazvajeśsia, robiš prapanovy, ty robiśsia bolš adkaznym. Navat kali ciabie pryznačyli, a nie abrali.

U abiedźviuch deputatak roznyja stratehii taho, jak jany pracujuć z parlamentam. Mnie bolš padabajecca, jak heta robić Anisim. Jana nie śpiašajecca, bolš karektnaja, i mnie heta blizka. Ja razumieju, što možna adnoj frazaj zakryć mahčymaść zajmieć prychilnikaŭ siarod deputataŭ. 1-2 deputaty — heta ŭsio ž taki mała. Kab inicyjavać niešta, treba pahadnieńnie, supraca ź inšymi deputatami. Heta hałoŭnaje. My ŭ «Havary praŭdu» skazali, što nia budziem dzialić hetych deputataŭ na apazycyjnych i nieapazycyjnych. Varta z usimi pracavać.

Pavialičyć

— Vy prapanoŭvali im supracu?

— Z Kanapackaj my ŭdzielničajem u ahulnaj dyskusii demsiłaŭ pa vybarčym zakanadaŭstvie. Sa spadaryniaj Anisim pakul što nie sutykalisia. Ale ŭ mianie byŭ dośvied, kali da mianie źviarnulisia ludzi, treba było zrabić deputacki zapyt, i jana chutka adhuknułasia. Mnie heta było pryjemna. Jana ŭvachodzić u skład kamisii pa adukacyi i kultury, i ŭ «Havary praŭdu» jość svaje prapanovy pra źmieny ŭ Kodeks, i my planujem abmiarkoŭvać ich ź joj i z kamisijaj.

— Što vam asabista dała liberalizacyja, pra jakuju my kažam užo dva hady?

— Ja mahu praciahvać. Dzień vybaraŭ skončyŭsia, a ja mahu dalej pracavać sa svajoj prahramaj, raźvivać svaju arhanizacyju. My zarehistravanyja, i dla nas heta mabilizacyjny enerhietyčny ŭsplosk. My ad ludziej nie čakali takoj reakcyi — telefanavali susiedzi, adnaklaśniki vinšavali. Paśla vybaraŭ prajšło dva hady, a heta adbyłosia tolki ciapier.

— Vy paśla vybaraŭ nie bajalisia, što vas aryštujuć? U nas ža heta zvyčajna: spačatku ty trapiŭ u vybarčy biuleteń, paśla ŭ turmu.

— Viedajecie, ja kali pryjšła ŭ «Havary praŭdu», my sustrelisia ź Niaklajevym, pahavaryli, i paśla mnie kažuć: «Nu, Taciana, praz tydzień niedzie tabie patelefanujuć z KDB i zaprosiać na razmovu». Heta byŭ dla mianie vyprabavalny momant: ty sabie žyvieš, pracuješ u dziaržaŭnaj ustanovie, a zaŭtra ty ŭžo na ałoŭku. U nas systema pakazvaje, što jana moža luboha čałavieka, navat blizkaha da ŭłady, aryštavać u luby momant. Hatovaść da hetaha jość. Ale ja dziejničaju biaz strachu, bo kaliści pierastupiła praz hetuju rysu. A paśla vybaraŭ — napeŭna, nie.

— A z KDB pazvanili?

— Nie, ni razu. Navat była takaja sytuacyja, kali my išli ŭsie razam, spyniŭsia KDBšny «falksvahien», i maich kalehaŭ zabrali, a mianie pakinuli na vulicy. I ja nia viedała, što mnie rabić (śmiajecca).

— Časta davodzicca čuć mierkavańni pra toje, što vy nibyta nie samastojny palityk, a ŭsiaho tolki vykonvajecie rasparadžeńni inšych siabraŭ «Havary praŭdu», siarod jakich najbolš nazyvajuć Andreja Dźmitryjeva. Jak vy reahujecie na takoje staŭleńnie da siabie?

— Ja čuju roznyja mierkavańni. Častka ludziej kažuć, što ja niesamastojnaja. Častka — što zanadta samastojnaja. Ale dumaju, što bolšaść usprymaje nas jak palityčnuju siłu, jak arhanizacyju, u jakoj jość kultura prymańnia rašeńniaŭ.

— Na vašy asabistyja stasunki z Andrejem Dźmitryjevym heta ŭpłyvaje?

— My tolki možam pažartavać nakont hetaha, kali kažuć, što «Taciana — heta surjozna, a Andrej — heta niesurjozna», ci «chto ahient, a chto nie ahient». Pra palitykaŭ treba mierkavać pa tym, čaho jany dasiahnuli.

— Što vy budziecie rabić u 2020 hodzie?

— Usio budzie zaležać ad 2018-ha (vybary deputataŭ miascovych savietaŭ pavinny adbycca nie paźniej za 20 lutaha 2018 hodu. — RS). My vyrašyli, što budziem udzielničać u palityčnych padziejach. Heta maraton. Spadziajomsia, što ŭ 2018-m nie adbudziecca referendum, jaki adniasie naš 2020-y u 2025-y i 2023-i.

— Vy bačycie takuju mahčymaść?

— Jość takaja vierahodnaść. Ale spadziajusia, što hetaha nia budzie. U «Havary praŭdu» nakont hetaha admoŭnaja pazycyja. My ličym, što kali i pravodzić referendum, to nie pa hetych pytańniach. I tak palityčnym partyjam, aktyvistam składana pracavać pa-za vybarnymi kampanijami. Šmat čaho nie dazvalajuć — i sustrečy, i kampanii, i pikiety. Cikavaść hramadztva da palityčnaha žyćcia vielmi nizkaja, kali niama vybaraŭ. Tamu, kali ich nia budzie jašče 5—7 hadoŭ, heta budzie aznačać zamarozku palityčnaha žyćcia.

— Chto budzie vašym kandydatam u 2020-m?

— Pakul jašče nia viedajem. Viedajem, što ŭ nas budzie kandydat, jakoha my budziem padtrymlivać i vieści. Prajšoŭšy dźvie prezydenckija kampanii i padrychtavaŭšy dvuch kandydataŭ, my ŭpeŭnienyja, što heta maje sens.

— Vy pahodziciesia z rašeńniem arhanizacyi, navat kali heta budziecie nia vy?

— Kaniečnie.

— A svaje ambicyi ŭ vas jość?

— Jość. Ale ŭ pieršuju čarhu jość meta. Kali my prymali rašeńnie pra kandydactva ŭ 2015 hodzie, było padrabiaznaje abmierkavańnie. Heta spałučeńnie stratehičnych metaŭ, jakaściaŭ kandydataŭ, mahčymaściaŭ arhanizacyi. My pryzvyčailisia da taho, što varta hladzieć napierad, pierš čym iści ŭ boj. Budziem hladzieć, jakaja budzie sytuacyja, kandydaty, zapatrabavańni ŭ hramadztvie. Heta važniej, čym asabistyja ambicyi.

• 0
• 0
• 0
• 0
• 0
• 0
• 0
• 0