Vizavy prahres. U MUS paviedamlajuć ab źniaćci adnoj ź dźviuch pieraškod na pieramovach ź ES

ES papiarednie pahadziŭsia dać Biełarusi pierachodny pieryjad nakont pahadnieńnia ab readmisii, paviedamiŭ načalnik Departamienta pa hramadzianstvie i mihracyi MUS Alaksiej Biahun pa vynikach aŭtorkavych vizavych pieramovaŭ pamiž Minskam i Bruselem. Heta zdymaje adnu ź dźviuch astatnich pieraškod na šlachu spraščeńnia vizavaha režymu dla biełarusaŭ.

Minsk i Brusel viaduć pieramovy ab dvuch pahadnieńniach — ab spraščeńni vizavych pracedur i ab readmisii. Abodva dakumienty pavinny być padpisany ŭ pakiecie. Da aŭtorkavych pieramoŭ było dva roznahałośsi, u tym liku — niežadańnie ES davać Biełarusi trochhadovy pierachodny pieryjad pa pahadnieńni ab readmisii (termin, pakul jano nie dziejničaje). Hety pieryjad chacieŭ atrymać Minsk, jak u 2000-ja atrymali Maskva i Kijeŭ.

Pavialičyć

— Pieramovy prajšli vielmi pazityŭna, - paviedamiŭ Alaksiej Biahun. — Ja mahu adkazvać tolki za readmisiju. Papiarednie nam dajuć pierachodny pieryjad. Jeŭrapiejcy ŭziali paŭzu, kab źjeździć dadomu i hetaje pytańnie vyrašyć.

Pierachodny pieryjad patrebien Biełarusi, kab acanić svaje mahčymaści pa vykanańni pahadnieńnia ab readmisii. Jano ŭklučaje abaviazak krainy samastojna prymać usich nielehalnych mihrantaŭ, jakija z našaj krainy patrapili ŭ ES, i svaimi siłami viartać ich u krainy ich pražyvańnia.

Razam z tym pierachodny pieryjad budzie «troški mienš» tych troch hadoŭ, pra jakija prasiła Biełaruś, dadaŭ Biahun, ustrymalisia ad kankretnych ličbaŭ.

— Ekśpiertnych pieramovaŭ bolš nie budzie. Dalej my vychodzim na kansultacyi i na parafiravańnie. Usio što možna, ekśpierty ŭžo zrabili.

Na pytańnie ab terminach Biahun adkazaŭ: «Pa hatoŭnaści, jeŭrapiejcy prapanoŭvajuć zrabić heta (parafiravać, h.zn. aficyjna ŭzhadnić tekst dakumientaŭ) užo vosieńniu. Jość zdahadka, što ŭ hetym hodzie ŭsio moža być parafiravana».

Druhuju častku pieramovaŭ, ułasna — ab spraščeńni vizavych pracedur, kuryruje MZS. Tut asnoŭnym roznahałośsiem da siońniašniaha dnia było patrabavańnie ES ab bolš surjoznych harantyjach biaśpieki biełaruskich dyppašpartoŭ. Raniej paviedamlałasia, što vyrašyć akramia inšaha hetuju prablemu pavinna ŭviadzieńnie ŭ Biełarusi bijamietryčnych pašpartoŭ, jakoje zapłanavana z 2019 hoda.

Navinaŭ pra toje, jak prajšła hetaja, druhaja častka pieramovaŭ, pakul niama.

Paśla padpisańnia pahadnieńniaŭ i ŭstupleńnia ŭ siłu sproščanaha vizavaha režymu šenhienskaja viza dla biełarusaŭ budzie kaštavać 35 jeŭra zamiest siońniašnich 60. Skarocicca śpis dakumientaŭ, jakija treba padavać na vizu. Bolš katehoryj biełarusaŭ, u tym liku studentaŭ, zmohuć atrymlivać biaspłatnyja vizy i šmatrazovyja doŭhaterminovyja vizy (na piać hadoŭ). Uładalniki dyppašpartoŭ zmohuć naviedvać krainy ES bieź viz.

Vizavyja pieramovy Biełarusi ź ES iduć užo bolš za try hady. Paviedamlałasia, što baki byli hatovyja parafiravać pahadnieńnie jašče viasnoj 2015 hoda, ale napiaredadni Ryžskaha samitu «Uschodniaha partniorstva» ŭ Jeŭrasajuza paŭstali novyja patrabavańni.

• 0
• 0
• 0
• 0
• 0
• 0
• 0
• 0