Sud vynies rašeńnie pa spravie mieniedžara Burger King, jaki adkazaŭ klijentu pa-rusku
Sud Centralnaha rajona Minska pastaviŭ kropku ŭ kanflikcie minčuka Anatola Novikava i kiraŭnika adnaho z restaranaŭ Burger King. Sprava spynienaja za adsutnaściu składu administracyjnaha pravaparušeńnia, piša Tut.by.
Nahadajem, u pačatku leta ŭ adnym z restaranaŭ Burger King minčuk Anatol Novikaŭ źviarnuŭsia da kasira na biełaruskaj movie. Adnak supracoŭnik zamovu ŭ jaho nie pryniaŭ: skazaŭ, što nie razumieje. Klijent paprasiŭ dapamahčy administratara, ale taja zajaviła — viedać movu rabotniki nie abaviazanyja.
Tady ŭ knizie skarhaŭ i prapanoŭ mužčyna pakinuŭ zapis na biełaruskaj movie. Voś tolki adkaz na jaho jon atrymaŭ pa-rusku. A heta — parušeńnie zakona «Ab zvarotach hramadzian i jurydyčnych asob».
U vyniku na kiraŭnika restaranam skłali pratakoł ab administracyjnym parušeńni — v. 9.22 KoAP (Publičnaja abraza, hańbavańnie dziaržaŭnych i inšych nacyjanalnych moŭ, stvareńnie pieraškod i abmiežavańniaŭ u karystańni imi, propaviedź varožaści na moŭnaj hlebie). Suma štrafu u dadzienym vypadku — ad čatyroch da dziesiaci bazavych vieličyń (ad 92 da 230 rubloŭ). Spravu nakiravali ŭ sud.
— Za adsutnaściu ŭ dziei kiraŭnika Burger King składu administracyjnaha pravaparušeńnia, sprava ŭ dačynieńni da jaho spynienaja, — paviedamiła Nasta Šylvian, pamočnik staršyni Minskaha haradskoha suda.
Atrymać apieratyŭny kamientar u Burger King nie ŭdałosia. Anatol Novikaŭ taksama raspavioŭ, što za sudom nie sačyŭ: «niecikava, nie było žadańnia tudy chadzić».
— Mnie nie vielmi cikava, jakoje rašeńnie pryniaŭ sud, meta tut była inšaja, — kaža Anatol. — Skarhi ja pišu nie dla sudoŭ, a kab kiraŭnictva kampanii daviedałasia, što da ich zachodziŭ biełaruskamoŭny čałaviek, što jaho niejak dziŭna absłuhoŭvali i jość padstava padumać ab čarhovaj markietynhavaj stratehii. Naprykład, zrabić mieniu pa-biełarusku.
Pa słovach Anatola, historyja z Burger King — heta nie pieršy vypadak, kali jon pakidaŭ u knizie skarhaŭ i prapanoŭ zapis na biełaruskaj movie. Da hetaha taksama zdarałasia, što adkaz prychodziŭ pa-rusku, ale kampanii paźniej za heta pieraprašali.
— Dy i tady ja jašče nie viedaŭ, što pa zakonie mnie abaviazkova pavinny adkazvać pa-biełarusku, — praciahvaje surazmoŭca. — Ciapier, kali budu atrymlivać adkazy pa-rusku, praciahnu źviartacca ŭ vykankamy rajonaŭ, dzie znachodzicca miaścina, dyrektar jakoj dasłaŭ mnie list pa-rusku.
Kamientary