U Biełarusi razumiejuć nieadnaznačnaść acenak padziej XX stahodździa ŭ sučasnaj polskaj historyi, ale nie mohuć źmirycca z sprobami cynična pastavić znak roŭnaści pamiž savieckimi voinami-vyzvalicielami i nacysckimi akupantami. Pra heta 6 lipienia na bryfinhu zajaviŭ pres-sakratar MZS Dźmitryj Mirončyk. Tak jon prakamientavaŭ uchvaleny polskim parłamientam zakon ab demantažy pomnikaŭ savieckim sałdatam, piša Tut.by.
Na dumku pradstaŭnika MZS, niahledziačy na toje, što kančatkovaje rašeńnie jašče nie pryniataje (zakon pavinien padpisać prezident Polščy), takija naviny kožny biełarus usprymaje z ščyrym bolem.
«U toj vajnie, raźviazanaj nacystami, naša kraina straciła kožnaha treciaha. My prosta nie možam inakš stavicca da losu miemaryjałaŭ, ustanoŭlenych u pamiać ab podźvihach ludziej, jakija vyzvalili Jeŭropu ad «karyčnievaj čumy». Savieckija voiny adkryli bramu Aśviencyma, viarnuli palakam prava mieć ułasnuju dziaržavu, raźvivać nacyjanalnuju kulturu, navuku, adukacyju. My razumiejem usiu nieadnaznačnaść acenak padziej XX stahodździa ŭ sučasnaj polskaj histaryjahrafii, ale nijak nie možam źmirycca z sprobami cynična pastavić znak roŭnaści pamiž savieckimi voinami-vyzvalicielami i nacysckimi akupantami», — adznačyŭ Dźmitryj Mirončyk.
U MZS taksama padkreślili, što «vajna z pomnikami» — heta elemient pierapisvańnia historyi Druhoj suśvietnaj vajny i sproba «ścierci» histaryčnuju pamiać ab tym, što narody Uschodniaj Jeŭropy — palaki, ruskija, biełarusy, ukraincy i inšyja — zmahalisia suprać ahulnaha voraha ŭ składzie adnoj — antyhitleraŭskaj — kaalicyi razam z anhličanami, amierykancami, francuzami i inšymi.
«Na hetym fonie trochi supiarečliva vyhladajuć zakliki polskaha boku da raźvićcia biełaruska-polskaha histaryčnaha dyjałohu. Našy partniory zaklikajuć vyvučać i achoŭvać sumiesnuju historyka-kulturnuju spadčynu. Jany pavinny razumieć, što dla nas pamiać pra tuju vajnu i pomniki hierojam-vyzvalicielam — nieadjemnaja častka spadčyny, jakaja padlahaje achovie», — ličać u biełaruskim źniešniepalityčnym viedamstvie.
22 červienia nižniaja pałata polskaha parłamientu ŭchvaliła demantaž pomnikaŭ savieckim sałdatam pa ŭsioj krainie. Mohiłki, sałdackija pachavańni i pomniki, jakija majuć mastackuju abo navukovuju kaštoŭnaść, znosić nie buduć. Demantaž zakranie abjekty, jakija «vystaŭlenyja na hramadski ahlad u metach prapahandy tatalitarnaha režymu». Demantavanyja buduć pa mienšaj miery 469 savieckich pomnikaŭ pa ŭsioj krainie.
U rasijskaj Dziarždumie z hetaj nahody ŭžo prapanavali razarvać dypłamatyčnyja adnosiny z Polščaj.
Ciapier čytajuć
Ajcišnika z «Varhiejminha» sudzili pa rasstrelnym artykule. Padobna, za padtrymku Ukrainy — praŭda, zrabić jon ničoha nie paśpieŭ2
Kamientary