«Vyrvali z kantekstu». Matolka atrymaŭ adkaz ź Minabarony na skarhu pra «naščadkaŭ Kube»
Błohier Anton Matolka atrymaŭ adkaz ź Ministerstva abarony nakont zajavaŭ presavaha sakratara Ŭładzimiera Makarava, zroblenych niezadoŭha da paradu na aficyjny Dzień niezaležnaści 3 lipienia.
U svaim zvarocie Matolka nahadaŭ, što paśla incydentu z tankam, jaki padčas repetycyi na vialikaj chutkaści straciŭ kiravańnie i źnios słup na staličnym praspekcie Niezaležnaści, u internecie pačaŭsia zbor podpisaŭ suprać praviadzieńnia vajskovaha paradu ci za toje, kab vynieści jaho za miežy horadu. Za heta na toj momant vykazalisia bolš za 3500 čałaviek.
Pa haračych śladach u pradstaŭnika Ministerstva abarony pałkoŭnika Ŭładzimiera Makarava žurnalisty spytali, ci źbirajecca Minabarony prysłuchacca da hetych ludziej. Na heta presavy sakratar adkazaŭ:
«Vajskovyja parady ŭ Dzień niezaležnaści pravodziacca i buduć pravodzicca nadalej. Ale hetaje śviata nia stała śviatam biełaruskich radykałaŭ, tych, chto jość idejnymi naščadkami Vilhielma fon Kube».
U hetym źviazku Antona Matolku cikaviła: ci heta pazycyja Ministerstva abarony, ci asabistaja dumka presavaha sakratara?
U adkazie ź viedamstva, pad jakim pastaviŭ podpis načalnik upraŭleńnia maralna-psychalahičnaha zabieśpiačeńnia hałoŭnaha ŭpraŭleńnia idealahičnaj pracy pałkoŭnik Kasinski, paviedamlajecca, što zvarot razhledžany, detalova vyvučany aŭdyjozapis materyjałaŭ pres-kanferencyi.
Pa jaho słovach, ekspertyza pakazała, što z kantekstu vystupu pałkoŭnika Makarava «niekatorymi ŚMI vyrvany asobnyja frahmenty, jakija volna interpretavanyja adpaviednymi aŭtarami».
«Pryviedzienyja tezisy nie raskryvajuć usie aspekty adkazu na pytańnie žurnalista, tamu prapanuju aznajomicca z raźmieščanym na internet-partale Minabarony 29 červienia materyjałam pad nazvaj «Infarmacyjnyja akcyi, razhornutyja «niezaležnymi ŚMI», pakazali samaje hałoŭnaje — hramadzianie našaj krainy, u tym liku tyja, chto maje ŭłasnuju dumku nakont praviadzieńnia paradaŭ vojskaŭ, byli i zastajucca patryjotami svajoj krainy i ŭ pryncypie nie prymajuć idei radykałaŭ», — padsumavaŭ Kasinski.
Takim čynam, uciamnaha adkazu na svajo pytańnie Matolka tak i nie atrymaŭ, a ideolah Kasinski faktyčna pradublavaŭ tekst Makarava, źmieščany na sajcie abaronnaha viedamstva. A tamu budzie zvarot u prakuraturu, skazaŭ Matolka Svabodzie:
«List byŭ na imia ministra, adpaviedna, niezrazumieła, čamu adkaz na takim uzroŭni. Bo faktyčna list ni pra što. Tamu, jak minimum, budzie nakiravany list u prakuraturu za parušeńnie zakonu ab zvarotach hramadzian — heta i parušeńnie formy, i adkaz nie pa sutnaści, i h.d. Zrešty, heta ž Ministerstva abarony, jany apošnim časam arhumentavana adkazvać nia mohuć. Abo nia chočuć».
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza19
Kamientary