Kancler Hiermanii Anhieła Mierkiel i prezident Francyi Emaniuel Makron zaklikali Rasiju i Ukrainu prykłaści bolš namahańniaŭ dla poŭnaha spynieńnia ahniu na ŭschodzie Ukrainy.
Pra heta havorycca ŭ sumiesnaj zajavie dvuch lidaraŭ, tekst jakoj raspaŭsiudziła pres-słužba niamieckaha ŭrada, paviedamlaje UP.
Lidary kanstatujuć, što paśla telefonnaj razmovy ŭ «narmandskim farmacie», jakaja adbyłasia 22 žniŭnia, situacyja ź biaśpiekaj na ŭschodzie Ukrainy, na žal, istotna nie palepšyłasia, a ŭzhodnienaje na minułym tydni spynieńnie ahniu «nie vykonvajecca ŭ poŭnym abjomie».
«Da hetaha času adbyvajucca šmatlikija parušeńni režymu cišyni, u tym liku z vykarystańniem ciažkaj zbroi. Naziralnaja misija ABSE praciahvaje paviedamlać pra pahrozy dla jaje piersanału i abmiežavańnie svabody pieramiaščeńnia, asabliva na niepadkantrolnych ukrainskamu ŭradu terytoryjach», — padkreślivajuć Mierkiel i Makron.
«My nastojliva zaklikajem prezidentaŭ Pucina i Parašenku poŭnaściu vykanać dadzienyja imi abaviazacielstvy, adkryta i vyrazna padtrymać pieramirje i zabiaśpiečyć pieradaču adpaviednych instrukcyj vajennym i siłam na miescach», — havorycca ŭ zajavie.
Mierkiel i Makron padkreślili nieabchodnaść uzajemadziejańnia bakoŭ kanfliktu ŭ ramkach Ahulnaha centra pa kantroli i kaardynacyi i zaklikali zabiaśpiečyć svabodny i biaśpiečny dostup dla naziralnikaŭ ABSE.
Nahadajem, pa vynikach telefonnych pieramoŭ lidaraŭ dziaržaŭ «narmandskaha farmatu», 22 žniŭnia lidary Ukrainy, Hiermanii, Francyi i Rasii vykazalisia ŭ padtrymku pieramirja na ŭschodzie Ukrainy z nahody pačatku novaha navučalnaha hoda.
Drukujecca ŭ miežach śpiecyjalnaj rubryki «Naviny Hiermanii»
Kamientary