U kancy 2017 hoda finski kancern Fazer pačaŭ prodaž «chleba z cvyrkunoŭ». Partał Delfi vyrašyŭ pakaštavać novy pradukt, jaki ŭ Chielsinki raźbirajuć jak haračyja piražki — u litaralnym sensie.
U listapadzie Finlandyja admianiła zabaronu na vykarystańnie nasiakomych u vytvorčaści praduktaŭ charčavańnia. Zabaronu admianili jašče ŭ piaci krainach ES — Vialikabrytanii, Niderłandach, Bielhii, Aŭstryi i Danii. Nieŭzabavie paśla hetaha na pryłaŭkach finskich kram źjaviŭsia chleb Sirkkaleipa (litaralna — «cvyrkunovy chleb»).
Dla jaho vytvorčaści, akramia zvyčajnych inhredyjentaŭ, vykarystoŭvajecca muka z sušanych chatnich cvyrkunoŭ (kala 70 štuk na 1 bochan). Cvyrkuny składajuć prykładna 3% ad vahi hatovaha vyrabu.
Bochan takoha chleba kaštuje 3,99 jeŭra (za 250 hramaŭ, cana za kiłahram — 16 jeŭra). Heta krychu daražej za zvyčajny chleb, adnak kupić Sirkkaleipa nie tak i prosta: chleb z cvyrkunami raźbirajuć na suvieniry.
Pa prośbie Delfi žurnalist Kanstancin Ranks pryvioz bochan «cvyrkunovaha chleba» ŭ łatvijskuju redakcyju partała ŭ Ryzie. Žurnalisty padzialili chleb na niekalki častak i sumlenna źjeli — z syram, viandlinaj, džemam, miodam i prosta tak.
Jakija ŭražańni? Voś niekatoryja ź ich.
«Chrabuścieńnie kalenak na zubach vyklikała lohki chaładok pa skury. Sahravali tolki dumki pra toje, što Jan Chryściciel — voś hetak ža…»
«Spačatku ja padumała, što chleb z cvyrkunami — heta žart. Jon čymści padobny na samy prosty italjanski šery chleb, tolki bolš suchi ŭnutry, ale taki ž chrumstki. Jość adčuvańnie, što ŭ jaho dadali zmołatyja ŭ parašok sušanyja travy (mahčyma, mienavita tamu asacyjacyja ź Italijaj). Na smak absalutna zvykły pradukt, nijakich nasiakomych abo čahości dziŭnaha nie zaŭvažyš, kali nie viedaješ».
«Mnie dastaŭsia akrajčyk. Rehularna ŭžyvać taki chleb ja b nie staŭ, jon suchavaty. Moža, ź vinom jon byŭ by smačniejšym. A naohuł čałaviek źjadaje da 430 nasiakomych za hod, jany vypadkova traplajuć u pradukty charčavańnia padčas vytvorčaści. Tamu cvyrkunoŭ u chlebie bajacca nie treba».
«Zvyčajnaja» čyabata» — skarynačka, šeraja miakać, zvonku prysypany mukoj. Kali nie viedać, što tam try pracenty sušanych cvyrkunoŭ — nijakaj roźnicy z pradukcyjaj Rimi nie zaŭvažyš. Vielmi padobna, što heta vydatny markietynhavy truk Fazer: zusim zvyčajny chleb, ledź daražejšy, i pra jaho napisali».
Prychilniki ŭžyvańnia nasiakomych u ježu pryvodziać adrazu niekalki arhumientaŭ na karyść svajoj pazicyi. Tak, kazurki mohuć być zdarovaj alternatyvaj miasu, ptušcy ci rybie, pryčym jany dazvalajuć atrymlivać nie tolki pratein, ale i kalcyj, žaleza i cynk. Raźviadzieńnie nasiakomych patencyjna moža nanieści mienš škody navakolnamu asiarodździu (u tym liku dziakujučy mienšym abjomam vykidaŭ mietanu ŭ paraŭnańni z travajednymi žyviołami). Pakolki nasiakomyja nie źjaŭlajucca ciepłakroŭnymi žyvymi istotami, jany našmat bolš efiektyŭnyja z punktu hledžańnia kanviertacyi kormu ŭ pratein (u 12 razoŭ efiektyŭniejšyja za karoŭ i napałovu — za śviniej abo brojleraŭ). Akramia taho, ich možna karmić arhaničnymi adchodami.
Čytajcie taksama:
Biełarus choča adkryć fiermu cvyrkunoŭ i prapanuje ŭžyvać ich u ježu
Cvyrkunovaja fierma dy inšyja najlepšyja startapy 2017 hoda ŭ Biełarusi
Ciapier čytajuć
Redaktara niezaležnaj baranavickaj haziety «Inteks-Pres» Janukieviča prysudzili da 14 hadoŭ kałonii, jaho namieśnika Pakalenku — da 12 hadoŭ9
Kamientary