Kala chałodnaj zorki znojdziena vielmi padobnaja da Ziamli płanieta
Navukoŭcy vyjavili 15 novych płaniet, na adnoj ź jakich moža być vada i žyćcio. Jany kruciacca vakoł čyrvonych karlikaŭ — zorak, u niekalki razoŭ mienšych i chaładniejšych za Sonca. Daśledavańnie apublikavanaje ŭ časopisie The Astronomical Journal.
Usie hetyja ekzapłanietnyja sistemy vyjaviŭ kaśmičny aparat Kepler. Samy jarki z čyrvonych karlikaŭ — K2-155 — raźmieščany za 200 śvietłavych hadoŭ ad Ziamli.
Navukoŭcy miarkujuć, što na pavierchni ekzapłaniety, jakaja atrymała nazvu K2-155d, moža być vada, pryčym u vadkim vyhladzie. Takuju vysnovu daśledčyki zrabili dziakujučy kampjutarnamu madelavańniu na asnovie dadzienych «Kieplera» i naziemnych teleskapičnych nazirańniaŭ. Zhodna z kampjutarnaj simulacyjaj, na K2-155d moža być atmaśfiera, a klimatyčnyja ŭmovy na joj mohuć być padobnyja na ziamnyja.
Ciapier nieabchodna pravieści bolš dakładnyja daśledavańni, vyznačyć pamier i tempieraturu płaniety. Dla hetaha spatrebicca zadziejničać bolš składanyja mietodyki vymiareńnia hetych paramietraŭ.
Akramia hetaha, astranomy daśledavali zaležnaść pamieru płaniet zornaj sistemy ad kolkaści mietału ŭ zorcy. Ličycca, što čym bolš jaho ŭ zorcy, tym bolšy pamier płaniet, što kruciacca vakoł jaje. Novyja dadzienyja paćvierdzili hetuju hipotezu. Samaja bujnaja płanieta z znojdzienych (jaje radyus ŭ try razy pieravyšaje radyus Ziamli) krucicca vakoł zorki z najbolšym utrymańniem mietału.
Kamientary