Kiroŭca taksi, jaki ŭčyniŭ śmiarotnuju avaryju na vulicy Mirašničenki ŭ Minsku, atrymaŭ 10 hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach ahulnaha režymu, piša Tut.by.
9 krasavika sud Savieckaha rajona Minska pryznaŭ mužčynu vinavatym pa č. 5 art. 317 KK Biełarusi (Parušeńnie PDR abo ekspłuatacyi transpartnych srodkaŭ asobaj, jakaja kiruje transpartnym srodkam u stanie ałkaholnaha apjanieńnia, što paciahnuła pa nieaściarožnaści śmierć dvuch čałaviek) i prysudziŭ da dziesiaci hadoŭ pazbaŭleńnia voli ŭ kałonii ahulnaha režymu z pazbaŭleńniem prava zajmacca dziejnaściu, źviazanaj z kiravańniem transpartnymi srodkami, terminam na 5 hadoŭ.
Prysud u zakonnuju siłu nie ŭstupiŭ i moža być abskardžany i apratestavany va ŭstanoŭlenym zakanadaŭstvam paradku.
Avaryja adbyłasia 17 žniŭnia 2017 hoda kala 7.00 na vulicy Mirašničenki ŭ Minsku: sutyknulisia «Reno Łohan» słužby taksi «7788» i rejsavy aŭtobus MAZ, jaki ruchaŭsia pa maršrucie № 24. Taksi zajazdžała ŭ horad pa vulicy Mirašničenki, aŭtobus u hety ž čas vykonvaŭ levy pavarot na DS «Zialony Łuh — 6» pa vulicy Mirašničenki z boku vulicy Hamarnika.
Paśla sutyknieńnia ŭ Renault byli zabłakavanyja čatyry čałavieki, jany byli biez prytomnaści. Ich vyciahnuli ratavalniki pry dapamozie admysłovaj pryłady i pieradali miedykam. 19-hadovaja dziaŭčyna-pasažyr zahinuła, z kiroŭcam aŭtamabila taksi i jašče dvuma pasažyrami pravodzilisia reanimacyjnyja mierapryjemstvy. Paźniej u balnicy pamior jašče adzin pasažyr taksi.
Ekśpiertyza ŭstanaviła, što ŭ kryvi kiroŭcy ŭtrymlivałasia 1,54 pramile ałkaholu.
U chodzie śledstva i ŭ sudzie abvinavačvany svaju vinu całkam pryznaŭ i raskajaŭsia.
Ciapier čytajuć
Na svoj dzień naradžeńnia Zialenski z Naŭrockim, Naŭsiedam i Cichanoŭskaj u Vilni ŭšanuje pamiać Kastusia Kalinoŭskaha5
Kamientary