Palicyjanty nie zmahli vyvieźci z Andamanskich vyspaŭ u Bienhalskaj zatocy cieła hramadzianina ZŠA Alena Čau, zabitaha abaryhienami. Jak paviedamlaje telekanał NDTV, palicejskaja kamanda na łodcy padyšła ŭ subotu da Paŭnočnaha Sientynielskaha vostrava na adlehłaść prykładna 400 mietraŭ, ale była sustretaja hrupaj tubylcaŭ, uzbrojenych łukami i strełami, i vyrašyła nie ŭstupać u kanflikt.
Hramadzianin ZŠA Džon Alen Čau byŭ zabity 17 listapada pradstaŭnikami plemia, jakoje nasialaje Paŭnočny Sientynielski vostraŭ. Usiaho na Andamanach žyvuć dzieviać astraŭnych plamionaŭ, sientynielcy — samyja zakrytyja ad śvietu, ich kolkaść aceńvajecca ŭsiaho ŭ 40-150 čałaviek. Hetyja ludzi nie dazvalajuć starońnim prychodzić na ich terytoryju i rašuča supraciviacca lubym sprobam kantaktaŭ ź imi. Zakon zabaraniaje naviedvać plamiony astraŭnych narodaŭ bieź śpiecyjalnaha dazvołu.
Siamiora miascovych rybakoŭ pahadzilisia za hrošy ŭ parušeńnie zakanadaŭstva pieravieźci 27-hadovaha amierykanca na vostraŭ. Rybaki zatrymanyja, jany paviedamili, što bačyli, jak abaryhieny zabili Čau strełami i potym zakapali jaho cieła ŭ prybiarežnym piasku. Jak vynikaje ź dziońnika Čau, jaki toj pakinuŭ rybakam, amierykaniec źbiraŭsia prapaviedavać abaryhienam chryścijanstva, pry hetym jon nie byŭ prafiesijnym śviatarom.
Palicyja indyjskich Andamanskich vyspaŭ ciapier pravodzić kansultacyi z prafiesijnymi antrapołahami, kab daviedacca pra asablivaści pachavalnaha rytuału sientynielcaŭ, jakija zabili Čau. Pravaachoŭniki raźličvajuć, što heta moža dapamahčy znajści biaśpiečnuju, i dla palicyi, i dla tubylcaŭ mahčymaść evakuacyi jaho cieła.
Kamientary