Rasijski apazicyjanier Alaksiej Navalny zajaviŭ, što kryminalny pieraśled biełaruski Nastaśsi Vašukievič, viadomaj jak Naścia Rybka, adbyvajecca z padačy miljardera Aleha Dzierypaski, jaki pomścić eskortnicy za razhałašeńnie tajamnic jaho asabistaha žyćcia.
U paćvierdžańnie svaich słoŭ apazicyjanier apublikavaŭ na svaim sajcie aŭdyjozapisy pierachoplenych telefonnych razmoŭ aliharcha i ludziej ź jaho atačeńnia, jakija abmiarkoŭvali los Rybki.
«My možam asudžać jaje rod zaniatkaŭ, ale pahadziciesia, u hetaj historyi jana dakładna nie hałoŭny złydzień. I nieadekvatnaja žorstkaść da jaje, a taksama jurydyčnyja anamalii (trymali hod u Tajłandzie, ciapier zatrymali ŭ tranzitnaj zonie) prosta pakazvajuć, što heta ŭsio zakaz Dzierypaski, jaki choča adpomścić Rybcy, marynujučy jaje ŭ turmie», — napisaŭ Navalny.
Pa słovach palityka, u adnym z prasłuchoŭvańniaŭ fihurujuć hienieralny sakratar rasijskaha adździaleńnia «Mižnarodnaj handlovaj pałaty», zasnavanaha Dzierypaskam, Taćciana Moniehien; Hieorhij Ahanaŭ — były dypłamat, a ciapier siabra Rady dyrektaraŭ «Bazavaha elemienta» i daradca prezidenta kampanii — Dzierypaski. Zamiežnamu jurystu jany raspaviadajuć pra aryšt Rybki, Ahanaŭ kaža pra zacikaŭlenaść u tym, kab dziaŭčynu prysudzili da realnaha turemnaha terminu ŭ Tajłandzie.
U druhoj pierachoplenaj telefonnaj razmovie, praciahvaje Navalny, čuvać hołas samoha Dzierypaski, jaki razmaŭlaje ź Jaŭhienam Aharkovym. Na jaho aformlenyja niekatoryja aktyvy aliharcha. Akramia taho, Aharkoŭ fihuruje ŭ dźviuch apublikavanych knihach Naści Rybki pad imiem «Vicia».
«Jon razam z Rybkaj, Dzierypaskam, Prychodźkam i šaściu prastytutkami byŭ na łodcy ŭ Narviehii», — kaža Navalny.
Kamientary