Deputat rasijskaj Dziarždumy Kanstancin Zatulin daŭ razhornutaje intervju tatarstanskamu vydańniu «Biźnies Onłajn», u jakim parazvažaŭ pra ciapierašnija biełaruska-rasijskija adnosiny.
Zatulin ličyć, što na praciahu dziasiatkaŭ hadoŭ prajekt Sajuznaj dziaržavy nie ruchajecca ź miesca.
«Vopyt pakazvaje, što albo intehracyjnyja prajekty pavinny raźvivacca pa šlachu bolšaha pahłybleńnia, abo situacyja pačynaje raskručvacca ŭ inšy bok», — skazaŭ deputat.
Zatulin miarkuje, što ludzi, jakija damahajucca palapšeńnia adnosin Biełarusi i Zachadu, sprabujuć dystancyjavacca ad Rasii i chočuć prademanstravać niezaležnaść Minska ad Maskvy, siońnia vyjšli na pieršy płan u atačeńni Alaksandra Łukašenki.
«Ja maju na ŭvazie pierš za ŭsio ministra zamiežnych spraŭ [Uładzimira] Makieja», — adznačyŭ rasijski parłamientaryj.
A voś ludzi, jakija chacieli b bolšaj intehracyi, pastupova syšli ŭ cień.
Zatulin kaža, što ŭ Alaksandra Łukašenki «jak by razdvajeńnie asoby».
«Łukašenka za mnohija hady asvoiŭ taktyku, u ramkach jakoj jon pavodzić siabie jak vialikaje dzicia: kapryzić i kryŭdzić mamu, a zatym znoŭ łaščycca da jaje, tamu što jana jaho lubić, jano dla jaje rodnaje», — kaža deputat.
Pry hetym, na jaho dumku, palityčnaja intehracyja Rasii i Biełarusi štučna zamarožanaja.
«Takoje farmiravańnie ahulnaha palityčnaha pola było b najvažniejšym krokam u raźvićci Sajuznaj dziaržavy. Ale Alaksandr Ryhoravič hetaha nie choča», — śćviardžaje Zatulin.
U toj ža čas rasijski palityk ličyć, što vina ŭ takoj situacyi nie tolki na Łukašenku. U 90-ja hady ŭ Rasii byli vielmi dalokija ad intehracyjnych pracesaŭ i padtrymlivali farmalnaje pierapisvańnie dakumientaŭ zamiest taho, kab realna budavać Sajuznuju dziaržavu.
Deputat paskardziŭsia, što Łukašenka nie padtrymaŭ jaho «ahulnasłavianskuju» hramadskuju strukturu ŭ Biełarusi.
«Stvaryć jačejki ruchu ŭ Biełarusi nie ŭdałosia, tamu što Alaksandr Ryhoravič, niahledziačy na svaje abiacańni, asabista mnie dadzienyja, usio sabatavaŭ», — zapeŭnivaje Zatulin.
Rasijski parłamientaryj zapeŭnivaje, što ŭ našaj krainie ciapier u modzie biełarusizacyja.
«Dy boh ź joj, ale jana razhladajecca ź psieŭdanavukovych pazicyj. Ahulnyja z Rasijaj histaryčnyja padziei traktujucca inakš», — aburajecca Zatulin.
Taksama jon zapeŭnivaje, što ŭ Biełarusi źnikli mnohija šyldy na ruskaj movie, a šyldaŭ na anhlijskaj i kitajskaj stała bolš, čym na ruskaj.
«Heta niadobry simptom. Tym bolš što jon nie moža być prajavaj smakavych pieravah nasielnictva», — skazaŭ Zatulin.
Deputat pryznaŭ, što ŭ Biełarusi na pieršym etapie prezidenctva Łukašenki i dziakujučy jamu byli pryniatyja važnyja rašeńni ab dziaržaŭnaści ruskaj movy.
«Hetyja dasiahnieńni 90-ch hadoŭ źjaŭlajucca stoparnymi jakarami, tarmaznymi čaravikami na šlachu dehradacyi Sajuznaj dziaržavy», — pryznaŭ Zatulin.
Prakamientavaŭ rasijski parłamientaryj i situacyju ź Michaiłam Babičam:
«Biełaruski bok prosta nie pryvyk da taho, što jamu adkazvajuć», — skazaŭ Zatulin.
Na dumku deputata Dziarždumy, novy rasijski pasoł Mieziencaŭ nie budzie leźci na ražon. Ale paradak dnia ŭ rasijska-biełaruskich adnosinach budzie takim samym, što i ŭ Babiča.
Kamientary