Niervozny «Nieśmiarotny połk» u Kazachstanie: pasły Rasii i jaje azijackich sajuźnikaŭ udzielničali, ambasadar Biełarusi — nie
Dziasiatki tysiač čałaviek vyjšli na «Nieśmiarotny połk» u Ałmaty, niekalki tysiač — u stalicy krainy, Nur-Sułtanie. Dziaržaŭnyja ŚMI Kazachstana repartažaŭ pra heta nie dali, aficyjnyja ŭłady ŭdziełu ŭ akcyi nie brali.
Zatoje ŭ stalicy razam z demanstrantami prajšli pasoł Rasii ŭ Kazachstanie i kiraŭnik pradstaŭnictva «Rassupracoŭnictva». Da ich dałučylisia pasły Armienii, Kyrhyzstana, Tadžykistana, Uźbiekistana i Turkmienistana, paviedamlaje kazachski «Sputnik» sa spasyłkaj na fejsbuk pasolstva Rasii. Pasła Biełarusi ŭ liku ŭdzielnikaŭ jon nie nazyvaje. Nie brali ŭdziełu i pradstaŭniki aficyjnych uładaŭ Kazachstana.
«Sputnik» aceńvaje ličbu ŭdzielnikaŭ u Ałmaty ŭ 130 tysiač čałaviek. Foty z drona takich acenak nie paćviardžajuć: havorka, chutčej, pra niekalki dziasiatkaŭ tysiač.
«Nieśmiarotnyja pałki» byli arhanizavanyja taksama ŭ bolšaści abłasnych centraŭ Kazachstana. Tam jany sabrali pa niekalki socień udzielnikaŭ.
Šeści ŭ Kazachstanie prajšli ŭ atmaśfiery niervoznaści. 7—9 maja ŭ krainie byli zabłakavanyja sacsietki: fejsbuk, Jutub, instahram.
Ułady zahłušyli mabilny internet na maršrucie šeścia ŭ Ałmaty. U krainie źnik dostup da dziasiatka internet-resursaŭ ŚMI i hramadskich arhanizacyj, ad radyjo «Svaboda» da «The Village Kazachstan». Na šeści ŭ Ałmaty zatrymali šerah aktyvistaŭ kazachskaj apazicyi. Zatrymańni adbylisia taksama ŭ Nur-Sułtanie i Atyrau.
Dziaržaŭnyja i praŭładnyja kazachskija ŚMI nie dali ni repartažaŭ, ni fotaŭ z šeściaŭ «Nieśmiarotnaha pałka».
Ahienctva Kazinform abmiežavałasia paviedamleńniami pra śviatkavańnie Dnia Pieramohi ŭ Karahandzie i Bajkanury i padkreśliła, što «karahandzincy pranieśli pa haradskich vulicach partrety nie tolki svaich prodkaŭ, ale i kazachskich batyraŭ: Batyr-Bajana, Žydebaj-Batyra, Arałbaj-Batyra dy inšych».
Napružanaść u Ałmaty tłumačyłasia tym, što apazicyjny ruch «Demakratyčny vybar Kazachstana», pryznany ŭładami krainy ekstremisckim, zaklikaŭ dałučycca da šeściaŭ «Nieśmiarotny połk» z łozunhami pratestu.
1 Maja akcyi pratestu suprać Nazarbajeva i adsutnaści ŭ krainie demakratyi sabrali sotni ludziej u roznych haradach krainy. Dla Kazachstana heta rekord, pryčym ułady vystavili siabie na paśmiešyšča, kali ŭ prysutnaści reparcioraŭ zatrymali navat chłopca z čystym arkušam papiery, jaki vyjšaŭ na płošču va Uralsku. Usiaho 1 maja było zatrymana nie mienš za 80 čałaviek.
Jak i ŭ Biełarusi, Dzień Pieramohi ŭ Kazachstanie — śviatočny dzień, pry hetym kazachskija ŭłady niezadavolenyja sprobami Rasii vykarystać pieramohu ŭ vajnie ŭ svaich palityčnych metach. Tamu aficyjnaja Astana pastarałasia minimizavać śviatkavańnie i ŭziać jaho pad kantrol. Aficyjnyja asoby ŭziali ŭdzieł va ŭskładańni kvietak da pomnikaŭ.
Rasijskija pradstaŭnictvy i prarasijskija arhanizacyi 9 Maja praviali akcyju «Nieśmiarotny połk» u 90 krainach śvietu.
Ciapier čytajuć
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1616
Kamientary