Aktyvista z Horadni Alaksandra Łaŭrenćjeva i rasiejskaha aktyvista Aleha Savina źbili ŭ Biełastoku. Abodva byli ŭ majkach z vyjavaj Pahoni i nadpisam Belarus, piša «Radyjo Svaboda».
Mužčyny ciapier časova pracujuć u Polščy. Padziei adbyvalisia pobač ź internatam, dzie jany žyvuć.
Jak raskazaŭ Alaksandr Łaŭrenćjeŭ, napad adbyŭsia ŭviečary 29 červienia. Jany ź siabram adpačyvali kala internata. Raptam padyšła kampanija nieviadomych maładych ludziej i biez bačnaj pryčyny pačała źbivać inšych maładzionaŭ, jakija byli pobač.
Kali tyja ŭciakli, napadniki pieraklučylisia na Łaŭrenćjeva i Savina. Bili pa tułavie, tvary, hałavie. Napadniki — mužčyny va ŭzroście 25—30 hadoŭ, ich było 4 abo 5. Padčas bojki chłopcy paŭtarali: «Jedźcie dadomu. My jašče vierniemsia». Niechta pahražaŭ parvać majku z Pahoniaj.
U zhadanych internatach na vulicy Źviarynieckaj žyvuć inšaziemcy, što pryjechali ŭ Biełastok na zarobki.
Zaviali kryminalnuju spravu. Ci znajšli napadnikaŭ, paciarpiełyja chłopcy pakul nie viedajuć.
Pa ichnich słovach, raniej pra bojki na nacyjanalnaj hlebie ŭ hetym rajonie Biełastoka nie było čuvać.
Alaksandar Łaŭreńćjeŭ viadomy perfomansami ŭ Horadni, kali jon apranaŭsia ŭ turemnuju robu, kab zajavić pra abmiežavańnie svaich pravoŭ, i staviŭ namiot pierad haradzkoj administracyjaj, kab pryciahnuć uvahu da žyllovych prablemaŭ u horadzie.
Aleh Savin paśla aneksii Krymu zładziŭ akcyju ŭ Kalininhradzie pierad miascovaj administracyjaj, uźniaŭšy niamiecki ściah.
Kamientary