Prostyja praviły dla baćkoŭ pieršakłaśnika

Fota Siarhieja Hudzilina

Jašče niekalki ščaślivych volnych tydniaŭ — i tysiačy dziaciej znoŭ siaduć za party. Siarod ich — 115 tysiač pieršakłaśnikaŭ, dla jakich hety hod u škole — čas adaptacyi i niaprostych vyprabavańniaŭ. «Źviazda» pastarałasia sfarmulavać niekalki praviłaŭ, jakija pavinny viedać i vykonvać usie baćki, kab zachavać zdaroŭje dziciaci. Dapamahła ŭ hetym urač-piedyjatr, zahadčyk 3-ha piedyjatryčnaha adździaleńnia 3-j haradskoj dziciačaj kliničnaj palikliniki Minska Ludmiła Kipcevič.

— Pačatak navučańnia ŭ škole — heta vialikija nahruzki: psichałahičnyja, intelektualnyja, funkcyjanalnyja i fizičnyja. Za ich arhanizm dziciaci płacić časam samaj vysokaj canoj — zdaroŭjem, a my, darosłyja, nie zaŭsiody heta ŭśviedamlajem, — nahadvaje Ludmiła Ivanaŭna.

Praviła 1

Nikoli nie adpraŭlajcie dzicia adnačasova ŭ pieršy kłas i ŭ peŭnuju siekcyju ci hurtok.

Sam pačatak školnaha žyćcia ličycca ciažkim stresam dla 6—7 hadovych dziaciej. Kali małoje nie budzie mieć mahčymaści hulać, adpačyvać, rabić damašnija zadańni bieź śpieški, to ŭ jaho mohuć uźniknuć prablemy sa zdaroŭjem, moža navat pačacca nieŭroz.

Tamu kali zaniatki muzykaj ci sportam zdajucca vam nieadjemnaj častkaj vychavańnia vašaha dziciaci, pačnicie vadzić jaho tudy za hod da pačatku vučoby ci z druhoha kłasa.

Praviła 2

Pamiatajcie, što dzicia moža kancentravać uvahu nie bolš za 10—15 chvilin.

Tamu kali vy budziecie ź im zajmacca, praz kožnyja 10—15 chvilin rabicie pierapynak i davajcie małomu fizičnuju razradku. Možacie prosta paprasić jaho paskakać na miescy, pabiehać ci patancavać pad muzyku.

Praviła 3

Bolš za ŭsio na śviecie padčas pieršaha navučalnaha hoda vaša dzicia maje patrebu ŭ padtrymcy.

Jano nie tolki farmiruje svaje stasunki z adnakłaśnikami i nastaŭnikami, ale i ŭpieršyniu razumieje, što ź im samim chtości choča siabravać, a chtości — nie. Mienavita ŭ hety čas u małoha składvajecca svoj ułasny pohlad na siabie. I kali vy chočacie, kab ź jaho vyras spakojny i ŭpeŭnieny ŭ sabie čałaviek, abaviazkova chvalicie jaho, padtrymlivajcie, nie svaryciesia za pamyłki i brud u sšytku. Usio heta drobiazi ŭ paraŭnańni z tym, što ad biaskoncych paprokaŭ i pakarańniaŭ vaša dzicia stracić vieru ŭ siabie.

I jašče niekalki parad

• Pakazvajcie dziciaci, što jaho lubiać takim, jakoje jano jość, a nie za jaho dasiahnieńni.
• Nielha nikoli (navat sa złości) kazać dziciaci, što jano horšaje za ŭsich.
• Vučycie dzicia svabodna i niazmušana kantaktavać nie tolki sa svaimi ravieśnikami, ale i z darosłymi.
• Nie saromiejciesia padkreślivać, što vy im hanaryciesia.
• Budźcie ščyryja ŭ acency svaich pačućciaŭ da dziciaci.
• Aceńvajcie tolki ŭčynki, a nie samo dzicia.
• Nie imkniciesia dasiahnuć pośpiechu siłaj. Prymus — najhoršy varyjant duchoŭnaha vychavańnia. Jon stvaraje ŭ siamji atmaśfieru razbureńnia asoby dziciaci.
• Pryznavajcie prava dziciaci na pamyłki.
• Pamiatajcie pra dziciačy «bank» ščaślivych uspaminaŭ.
• Viedajcie, što dzicia stavicca da siabie tak, jak da jaho staviacca darosłyja.

I ŭvohule choć kali-nikali staŭcie siabie na miesca svajho dziciaci, i tady budzie bolš zrazumieła, jak siabie ź im pavodzić.

• 0
• 0
• 0
• 0
• 0
• 0
• 0
• 0