U Polščy dva śpieleołahi zajšli ŭ piačoru i piaty dzień nie mohuć adtul vyjści
U Vialikaj śniežnaj piačory ŭ Tatrach akazalisia ŭ pałonie dva śpieleołahi, jakim vada pierakryła zvarotny šlach na pavierchniu. Pošukava-vyratavalnaja apieracyja praciahvajecca ŭžo druhija sutki. Śpieleołahaŭ pastajanna šukajuć bolš za 20 ratavalnikaŭ, paviedamlaje Radyjo Polšča.
Usiu minułuju noč ratavalniki z dapamohaj vybuchoŭki pašyrali vuzkija prachody ŭ piačory. Raboty ŭskładniała adsutnaść dostupu pavietra, z-za čaho paśla kožnaha vybuchu prychodziłasia padoŭhu čakać, pakul ź piačory nie vyvietracca škodnyja hazy. Da ŭsiaho, druz paśla vybuchaŭ nieabchodna razhrabać uručnuju, — rastłumačyŭ kiraŭnik ratavalnikaŭ Jan Kšyštaf.
«Na miescy pracujuć piratechniki, jakija rujnujuć nievialikija frahmienty skały, kab pašyryć prachod u toje miesca, dzie, jak my miarkujem, znachodziacca źnikłyja. Paśla hetaha ŭvachodzić vyratavalnik, rasčyščajuć miesca vybuchu, zatym znoŭ pracujuć piratechniki. Bolš ludziej tudy nie mohuć uvajści — heta vielmi vuzkaja ščylina», — skazaŭ kiraŭnik ratavalnikaŭ.
Miarkujecca, što źnikłyja zatrymalisia na hłybini 500 mietraŭ nižej za ŭvachod u piačoru. Kab pieraadoleć adlehłaść da miesca, dzie ź imi była stračana suviaź, spatrebicca pryblizna 4—5 hadzin.
U čaćvier, 15 žniŭnia, dvoje źnikłych ŭvajšli ŭ Vialikuju śniežnuju piačoru razam z čatyrma siabrami. Jany byli adrezanyja ad astatnich vadoj, jakaja zatapiła častku kalidora ŭ nadzvyčaj vuzkaj ciaśninie. Apošni hałasavy kantakt z tavaryšami byŭ zafiksavany ŭ noč na subotu, 16 žniŭnia.
«Dali 3600 rubloŭ štrafu». Na biełarusku napisaŭ palityčny danos chłopiec, ź jakim jana chadziła na spatkańni i jakoha złaviła na zdradzie31
Kamientary