Šmatrazovy čempijon śvietu pa kikboksinhu i tajskim boksie, śpiavak rok-hurtu Brutto Vital Hurkoŭ staŭ suviadoŭcam pieradačy «Tydzień sportu» na dziaržaŭnym telekanale STB. Pieršy vypusk vyjšaŭ u efir 20 kastryčnika, piša Radyjo Svaboda.
Jak kaža Svabodzie Vital Hurkoŭ, pieršaja pieradača była testavaj, ale ciapier padpisanaja damova z telekanałam na paŭhoda. Prapanova paŭdzielničać u pieradačy pastupiła da jaho niečakana.
«Zaprasili pasprabavać — ja zajšoŭ, pasprabavaŭ razok, a praź litaralna dni čatyry rabili ŭžo zapis prahramy, — raskazvaje jon. — Pieršy zapis byŭ taki šokavy, bo biez padrychtoŭki, adrazu ŭ novym śviecie, novym amplua. Ščyra kažučy, ja asabliva nie spadziavaŭsia, i ŭvohule ździviŭsia, što takaja prapanova pastupiła da mianie. Matuli spadabałasia — siadžu ŭ televizary ŭsio ž taki».
Hurkoŭ kaža, na rolu suviadoŭcy sprabavali roznych spartoŭcaŭ, bo chacieli, kab čałaviek byŭ naŭprost źviazany sa sportam — niaredka ŭ pieradaču prychodziać u jakaści haściej spartoŭcy i trenery.
«Historyja była takaja, što da mianie ŭ zalu pryjechała zdymačnaja hrupa STV, jakaja zdymała rolik da čempijanatu Eŭropy, jaki budzie adbyvacca ŭ nas u Miensku, — zhadvaje Hurkoŭ. — Vyrašyli zdymać u mianie, bo ŭ mianie samaja pryhožaja zala. I tam chłopcy sa zdymačnaj hrupy raskazali, što jość takaja prapanova. Spytali, ci chaciełasia b mnie pasprabavać. Ja padumaŭ — čamu b nie».
Spartoviec kaža, što ździviŭsia ŭ tym liku tamu, što ličyŭ siabie «personaj non-hrata» na dziaržaŭnaj televizii. Ale ŭ razmovie z pradstaŭnikom kanału Hurkovu nia stavili nijakich asablivych umovaŭ kštałtu zabarony na nacyjanalnuju symboliku, «usio vielmi prazrysta, dobra». Chiba paprasili vieści pieradaču pa-rasiejsku:
«Ja pry pieršaj ža sustrečy prapanavaŭ: davajcie, mabyć, vieści efir pa-biełarusku, było b cikava, ja tady adčuvaŭ by, što vartuju reč rablu, — kaža Hurkoŭ. — Mnie skazali, što ŭsio razumiejuć, što klasna, kali buduć biełaruskamoŭnyja hości, — možna i tak, i tak. Ale heta ŭsio ž heta biznes, rynak, a bolšaść hledačoŭ rasiejskamoŭnaja».
Na pytańnie ab tym, ci chopić času i na sport, i na muzyku, i na pracu na TV, Hurkoŭ upeŭniena adkazvaje, što chopić:
«Zapis zvyčajna prachodzić raz na tydzień, ja mahu vydatkavać na heta čas, tym bolš, mnie heta cikava».
Babaryka try chviliny adkazvaŭ na pytańnie, čyj Krym. Tak i nie adkazaŭ89
Kamientary