Chto viadzie telehram-kanał «Puł pieršaha», jaki staŭ samaj apieratyŭnaj krynicaj infarmacyi pra Łukašenku?

Moda na telehram-kanały kančatkova dabrałasia da biełaruskich uładnych struktur. Śviežyja naviny milicyi spačatku źjaŭlajucca ŭ kanale pres-sakratarki Volhi Čamadanavaj (amal 10 tysiač padpisantaŭ), paviedamleńni ad Śledčaha kamiteta — u ich kanale (amal 8 tysiač padpisantaŭ).

7 listapada 2019 hoda ŭ telehramie źjaviŭsia kanał «Puł pieršaha». Heta «čałaviečyja» naviny pra dziejnaść Alaksandra Łukašenki. Ciapier u kanała bolš za 4600 padpisantaŭ. Farmalna kanał ananimny. Ale heta nie pieraškadžaje spasyłacca na jaho dziaržaŭnym ŚMI, jakija dahetul ihnaravali ananimnyja kanały i niepaćvierdžanuju infarmacyju.

Pavialičyć

Kanał z zachapleńniem piša pra padarunki Łukašenki, zamiłavana pieradaje jaho žarty padčas aficyjnych sustreč, cytuje vystupleńni.

Ale chto viadzie kanał, dahetul nieviadoma. Chto ž hety zahadkavyja ananimy, blizkija da kiraŭnika krainy?

Spačatku varta patłumačyć, što takoje «prezidencki puł». Heta karespandenty i apieratary dziaržaŭnych ŚMI, jakija jeździać uśled za Alaksandram Łukašenkam i aśviatlajuć jaho dziejnaść.

Nivodnaha pradstaŭnika niedziaržaŭnych ŚMI — ni «Našaj Nivy», ni Tut.by, ni Onliner.by — u pule niama.

Zatoje jość pradstaŭniki BT, ANT, STB, BiełTA, «Sovietskoj Biełoruśsii»… Siarod dziaržaŭnych žurnalistaŭ heta praca ličycca prestyžnaj, choć i składanaj — pastajannyja pajezdki, pilny kantrol kožnaha skazanaha słova. Ale praca ŭ pule moža być dobrym płacdarmam dla karjernaha rostu.

Što ŭjaŭlaje saboj kantent «Puła pieršaha»? Heta tekst, fotazdymki i videa.

Tekstavy styl «Puła pieršaha» padobny da stylu pres-sakratara Łukašenki Natalli Ejsmant (možna paraŭnać ź jaje instahramam): šmat emodzi, kličnikaŭ, pafasu.

Niama sumnieńniaŭ, što dopisy stvarajucca pad jaje pilnym nahladam (žarty pra bieła-čyrvona-bieły ściah biez dazvołu vyšej pułaŭskija žurnalisty naŭrad ci apublikavali b), ale, chutčej za ŭsio, čužymi rukami.

Fatahrafii dla kanała robić niechta, chto staić za apieratarami. Heta mohuć być jak žurnalisty puła, tak i rabotniki słužby pratakoła. Zdymki atrymlivajucca amatarskija, zroblenyja na prosty mabilnik, a nie na prafiesijnuju kamieru.

A voś videa, naadvarot, prafiesijnaje, časam źniataje na niekalki kamier i zmantavanaje.

Da napaŭnieńnia kanała, najchutčej, datyčnyja rabotniki BiełTA i Biełteleradyjokampanii.

Pa-pieršaje, pra heta kažuć spasyłki, jakija sustrakajucca ŭnutry kanała. To tam anansujecca, što BiełTA voś-voś napiša pra novaha kiraŭnika Administracyi prezidenta, to raskazvajecca, što MZS Šviecyi aficyjna pierachodizić na nazvu «Biełaruś» zamiest «Biełaj Rasii», ale sa spasyłkaj na telehram Ahienctva telenavinaŭ, a nie naŭprost na akaŭnt ministra An Linde.

Pa-druhoje, videa. Naprykład, toje, dzie Łukašenka padčas vizitu na Viciebščynu pachvaliŭ zimovyja narodnyja kaściumy navučenak Viciebskaha kaledža kultury i mastactva. Paźniej jano źjaviłasia ŭ aryhinale na BiełTA z łahatypam ahienctva.

Toje ž było i z karotkim rolikam ź Białhrada, dzie Łukašenka razam z prezidentam Sierbii Alaksandram Vučyčam idzie pa alei i abmiarkoŭvaje sierbskija jełki.

Pa-treciaje, cytaty. Niekatoryja ź ich adzin u adzin paŭtarajuć naviny, jakija publikuje BiełTA, navat zaŭvahi redakcyi rasstaŭleny ŭ tych ža miescach.

Ad BiełTA na mierapryjemstvach z udziełam Łukašenki zvyčajna prysutničajuć Uładzimir Maćviejeŭ i Michaił Macijeŭski. Maćviejeŭ kiruje adździełam pa aśviatleńni dziejnaści prezidenta. Macijeŭski pracuje ahladalnikam. Za jaho aŭtarstvam u 2017-m vychodziła adyjoznaja kałonka «Vałtuźnia na Dzień Voli».

• 0
• 0
• 1
• 2
• 0
• 0
• 1
• 0