Žychary Bresckaj vobłaści ŭ siaredzinie studzienia mohuć ubačyć pieralotnych ptušak, paviedamiŭ BiełTA namieśnik dyrektara pa navukovaj rabocie Paleskaha ahrarna-ekałahičnaha instytuta Nacyjanalnaj akademii navuk Viktar Dziamiančyk.
Vučony źviarnuŭ uvahu, što źmianieńnie klimatu ŭpłyvaje na pavodziny žyvioł. U pryvatnaści, 11 i 12 studzienia možna było ŭbačyć nad Brestam čarody biełałobych husiej. Zvyčajna taki pieralot jany robiać u sakaviku. «Dla mnohich ptušak charakterna, što jany viartajucca z poŭdnia na poŭnač. Biełałobyja ž husi zimujuć u rajonie Bałtyjskaha mora. Da miescaŭ hniezdavańnia ŭ tundry jany laciać jak by pa kole praź Biełaruś, Ukrainu, — rastłumačyŭ Viktar Dziamiančyk. — Šeryja žuravy ŭsio čaściej zamiest poŭdnia zimujuć u Zachodniaj Jeŭropie. U apošnija hadoŭ piać takija vypadki adznačajucca i ŭ Biełarusi. Akramia małaśniežnych zim hetamu spryjaje raźvićcio sielskaj haspadarki: ptuški mohuć znajści sabie spažyvu na kukuruznych, rapsavych palach. Šeryja žuravy byli zaŭvažanyja nad Brestam 11 studzienia». Pa słovach surazmoŭcy, pry śniezie žuravy zmohuć prakarmicca. Adnak kali ŭdarać marazy, im budzie składaniej, bo nazad na zimoŭku jany ŭžo nie palatuć.
U siaredzinie studzienia prylacieli ŭ Brest i pieršyja pary sokała-pustalhi, jany viarnulisia ŭ svaje hniozdy i navat pačali takavać. Čyrvonaknižniki sielacca ŭ haradach u šmatpaviarchovych budynkach, a zimujuć u rajonie Mižziemnamorja.
Asablivy dyskamfort z-za ciopłaj i daždžlivaj zimy adčuvajuć kažany. Mnohija miescy ich zimoŭki padtoplenyja. Rukakryłyja vymušany pračynacca i šukać novyja prytułki. Jany dezaryjentavanyja, asłablenyja i asabliva ŭraźlivyja, tamu niaredka traŭmirujucca i hinuć.
Niekatoryja ptuški, jakija prylatajuć u Bresckuju vobłaść u chałodnuju paru hoda, sioleta, naadvarot, zastalisia zimavać u paŭnočnych rehijonach. Havorka idzie pra hrakoŭ. Zvyčajna na zimu ŭ Brest prylatała čarada, u jakoj było da 300 tys. hetych ptušak. Upieršyniu za dva dziesiacihodździ ŭ horadzie niama hrakoŭ-mihrantaŭ.
Były vykładčyk Iniaza pierajšoŭ na biełaruskuju ŭ emihracyi. Jon razvažaje pra los univiersiteta, biełarusaŭ za miažoj i adroźnieńnie nas ad palakaŭ4
Kamientary