Lidar amierykanskich nieanacystaŭ źjechaŭ u Rasiju. Adtul jon kaardynavaŭ złačynstvy ŭ ZŠA

46-hadovy amierykaniec Rynałda Nazara — nieanacyst sa stažam. Dla prapahandy ŭ internecie, u tym liku ŭ Telegram, jon vykarystaŭ psieŭdanimy «Norman Śpir» i «Raman Vulf». U 2018 hodzie Nazara stvaryŭ The Base («Asnova») — adnu z samych niebiaśpiečnych vajenizavanych arhanizacyj, jakija dziejničali da niadaŭniaha času ŭ ZŠA. Jak vyśvietliła Bi-bi-si, prykładna ŭ hety ž čas Nazara sa svajoj žonkaj, hramadziankaj Rasiei, pierajechaŭ ź Ńju-Jorka ŭ Sankt-Pieciarburh.

Zaraz arhanizacyjaj The Base zajmajecca FBR: siamiora jaje mierkavanych udzielnikaŭ aryštavanyja i abvinavačanyja ŭ roznych złačynstvach, u tym liku ŭ zmovie z metaj zabojstva.

FBR apisvaje The Base jak «rasava matyvavanuju vajenizavanuju ekstremisckuju hrupu», jakaja «imkniecca zrynuć urad ZŠA, spravakavać rasavuju vajnu i zasnavać etnadziaržavu dla biełaj rasy».

The Base nabirała udzielnikaŭ praź internet. Razmova prachodziła ŭ abaronienych miesiendžarach. Zatym jany vyjazdžali na vajennyja zbory.

Sapraŭdnaje imia lidara arhanizacyi doŭhi čas zastavałasia nieviadomym. Adnak 24 studzienia vydańnie Guardian zajaviła, što jaho zavuć Rynałda Nazara. Bi-bi-si pa vynikach ułasnaha rasśledavańnia pryjšła da anałahičnaj vysnovy.

Pavialičyć

U tvitary Nazara nazyvaŭ siabie «Norman Śpir», ale na avatarcy vykarystaŭ svajo sapraŭdnaje fota.

Toj ža mužčyna — časam z baradoj, časam biez — na fotazdymkach, jakija apublikavali žonka Rynałda Nazara i jaje svajaki ŭ rasijskich sacsietkach. Na adnym sa zdymkaŭ Nazara sa svajoj rasijskaj siamjoj, u centry stała — plaška harełki i sieladziec pad futram.

Žonka Nazara — rasijanka. U 2008 hodzie jana pierajechała ŭ Ńju-Jork i adzin čas, zhodna ź jaje reziume, pracavała ŭ banku JPMorgan Chase. U 2012 hodzie jana vyjšła zamuž za Nazara, para zaviała dvuch dziaciej.

Pavialičyć

U Sankt-Pieciarburhu Rynałda Nazara davaŭ pryvatnyja ŭroki anhlijskaj, abjavy raźmiaščaŭ u internecie.

Na adnym z publičnych videa siamiejstva Nazara jedzie ŭ kupejnym vahonie ŭ Čebaksary — da cieščy Rynałda. Jon apranuty ŭ čornuju futbołku z vyjavaj Uładzimira Pucina i nadpisam na anhlijskaj Russia, absolute power («Rasija, absalutnaja ŭłada»); dakładna takija ž pradajucca ŭ padziemnych pierachodach Maskvy.

U sacsietkach «Norman Śpir» publikavaŭ materyjały brytanskaj nieanacysckaj arhanizacyi «Nacyjanalnaje dziejańnie» (National Action), jakaja ŭ samoj Brytanii zabaronienaja.

«Norman Śpir» taksama zachaplaŭsia «Al-Kaidaj» — terarystyčnaj arhanizacyjaj, nazva jakoj z arabskaj pierakładajecca jak «Asnova», heta značyć hetak ža, jak The Base.

U kancy 2019 hoda FBR praduchiliła zamach na zabojstva šlubnaj pary antyfašystaŭ i ich dziaciej. Zatrymanyja byli try čałavieki — usie jany byli mierkavanymi členami The Base.

Paśla niadaŭniaha aryštu ŭdzielnikaŭ The Base «Raman Vulf» (jon ža «Norman Śpir», jon ža Rynałda Nazara) zajaviŭ u Telegram-kanale hrupoŭki: «My nie sumieŭšysia praciahniem svaju baraćbu za vyžyvańnie».

• 0
• 0
• 0
• 0
• 0
• 0
• 0
• 0