Dziaržaŭny telekanał ANT na svajoj staroncy ŭ internecie daŭ recept, jak zmahacca z karanavirusam. «Praryŭny» mietad paraiła rasijski dyjetołah Maryjat Muchina. Jana śćviardžaje, što karysnaj u zmahańni z karanavirusam budzie… soda.
«Śpiecyjalist pa charčavańni patłumačyła, što karanavirus dziejničaje ŭ sukupnaści z štučna stvoranaj bakteryjaj u ZŠA «Sincija», jakaja była stvorana paśla maštabnaha raźlivu nafty ŭ Mieksikanskim zalivie. Zvykłymi mietadami sabrać jaje było niemahčyma. Bakteryja źjadaje vuhlarodnyja złučeńni», — havorycca ŭ publikacyi.
Zrazumieła, što heta psieŭdamietady narodnaj miedycyny, jakija nie majuć ničoha supolnaha z realnym stanam rečaŭ. Miedyki z usiaho śvietu pakul nie znajšli lekaŭ ad karanavirusa, a na padobnych receptach zarablajuć tolki šarłatany.
Vyhladaje, što navina była pieradrukavanaja ź niejkaha treciaradnaha rasijskaha sajta, jaki štampuje fejki.
Pres-sakratarki ANT Iryny Rambalskaj na pracy nie było, kab jana mahła prakamientavać hety incydent.
Hienieralny dyrektar telekanała Marat Markaŭ spačatku paabiacaŭ rastłumačyć, jak na sajcie ANT apynułasia fejkavaja navina, a paśla prosta zabłakavaŭ numar karespandenta «NN».
U chutkim časie paśla taho, jak navinu raściahnuli telehram-kanały i karystalniki sacyjalnych sietak, jana źnikła z sajta ANT, ale keš pamiataje hety artykuł.
Kamientary