Minčanka vyrašyła zarabić u siecivie na brokierskich apieracyjach i, trapiŭšy na machlaroŭ, straciła 114 tysiač rubloŭ, paviedamlajuć «Minsk-Naviny».
Niadaŭna ŭ milicyju źviarnułasia 53-hadovaja minčanka. Jana patłumačyła, što ŭ lutym hetaha hoda, kab padzarabić, zarehistravałasia na sajcie fxamo.by. Partał nibyta ažyćciaŭlaŭ biržavuju brokierskuju dziejnaść. Hramadzianam prapanoŭvałasia paŭdzielničać u handli mietałami i akcyjami, a taksama zarabić na źmienach kursaŭ valut. Dla hetaha nieabchodna było ŭnieści hrošy na virtualny rachunak arhanizacyi.
Naŭrad ci žančyna była vialikim śpiecyjalistam u brokierskich apieracyjach. Jana, jak i mnohija inšyja, paddałasia na chitryki machlaroŭ. Dama pieraličyła 400 rubloŭ, a paśla ź joj uvieś čas źviazvaŭsia pradstaŭnik i pierakonvaŭ, što jana zmoža prymnožyć svoj kapitał u samyja karotkija terminy. Zrazumieła, finansavyja apieracyi, u jakija jana ŭkładzie hrošy, buduć tolki paśpiachovymi.
Brokier papiaredziŭ, što pieršapačatkova za jaje hrošy buduć nabytyja bitkoiny, a ŭžo paśla hetaha kryptavaluta budzie pieraviedzienaja na virtualny rachunak, praŭda, u dalaravym ekvivalencie. Padčas dopytu minčanka raspaviała śledčym, što čałaviek, jaki telefanavaŭ, byŭ nastolki pierakanaŭčym, što jana amal adrazu pieradała jamu parol i łahin ad svajho ŭlikovaha zapisu.
Žančyna rehularna papaŭniała rachunki, jakija joj davaŭ supracoŭnik płatformy. U adzin ź dzion joj pryjšło paviedamleńnie ab naličeńni bonusa — ažno 30 tysiač dalaraŭ! Ale kab atrymać niečakany padarunak, pryjšłosia vykanać adnu ŭmovu — papoŭnić rachunak na hetuju ž sumu. Žančyna ryzyknuła nie razdumvajučy.
Praź niekatory čas minčanka vyrašyła vyvieści hrošy. Ale, pačuŭšy prośbu, supracoŭniki płatformy pierastali vychodzić na suviaź.
Jak vyśvietliła śledstva, ź lutaha pa krasavik 2020 hoda paciarpiełaja pieraličyła nieviadomym bolš za 114 tysiač rubloŭ. Kab znajści takija hrošy, jana ŭziała niekalki kredytaŭ i pazyk.
Zaviali kryminalnuju spravu.
Kamientary