Suprać rehijanalnaha vydańnia «Miedyja-Paleśsie» zaviali novuju spravu za «pahrozu nacyjanalnaj biaśpiecy krainy»
Zajavu ŭ milicyju napisała nastaŭnica Mikaševickaj SŠ №2, dzie vučyłasia kandydatka ŭ prezidenty Śviatłana Cichanoŭskaja, paviedamlaje BAŽ.
Na «Miedyja-Paleśsie» vyjšła publikacyja «Nastaŭnik Cichanoŭskaj: «Heta jana za mužam, jak za dziekabrystam pajšła. Nie tolki charaktar, ale i luboŭ svaju prajaviła». Nastaŭnica Ina Kucharava, imia jakoj zhadvałasia ŭ artykule, zapatrabavała abvierhnuć infarmacyju pra toje, što jana vučyła Cichanoŭskuju i paraŭnoŭvała jaje z dekabrystkaj.
Jak vyśvietliłasia, karespandent Anatol Krejdzič, apytaŭšy mnohich ludziej na radzimie Śviatłany Cichanoŭskaj u Mikaševičach — nastaŭnikaŭ, susiedziaŭ, adnakłaśnikaŭ, — cytatu, skazanuju inšym nastaŭnikam, pamyłkova prypisaŭ Kucharavaj.
Pra zajavu redaktar sajta Śviatłana Harda daviedałasia pa telefonie ad supracoŭnika Mikaševickaha adździaleńnia milicyi.
«Źviazaŭšysia z nastaŭnicaj i vyśvietliŭšy patrabavańni zajaŭnicy, apublikavali abviaržeńnie i ŭnieśli praŭku ŭ artykuł ab Cichanoŭskaj, — raspaviała Śviatłana Harda słužbie manitorynhu HA «BAŽ». — Ale heta nie dapamahło. Milicyja pačała administracyjny praces suprać AAT «MP kompani», uładalnika sajta».
Milicyjant pryjechaŭ apytvać dyrektara TAA «MP kompani» Maksima Harda z hatovym addrukavanych pratakołam.
Zhodna ź inkryminavanym artykułam (č. 3-1 art. 22.9 KaAP «Raspaŭsiud srodkam masavaj infarmacyi infarmacyi, raspaŭsiudžvańnie jakoj zabaroniena ŭ srodkach masavaj infarmacyi…»), publikacyja ŭ «Miedyja-Paleśsie» naniesła škodu nacyjanalnym intaresam Respubliki Biełaruś, spryjała nahniatańniu sacyjalnaj napružanaści ŭ hramadstvie, stvareńniu paničnych nastrojaŭ, viadzie da masavaha dezynfarmavańnia nasielnictva i parušaje kanstytucyjnaje prava hramadzian na atrymańnie poŭnaj, dakładnaj i svoječasovaj infarmacyi.
Śviedkam pryznany Anatol Krejdzič. Paciarpiełych niama.
Anatol Krejdzič u štat redakcyi pryniaty niadaŭna, žurnalist i redaktar bolš čym z 30-hadovym stažam, aŭtar šerahu knih, namieśnik staršyni Sajuza piśmieńnikaŭ Biełarusi.
«Heta čarhovy krok uładaŭ zadušyć niezaležny resurs, u tym liku ekanamičnymi sankcyjami», — padkreśliła Śviatłana Harda.
Nahadajem, pa rašeńni suda Łuninieckaha rajona, redakcyja ŭ lipieni vypłaciła štraf u pamiery 120 bazavych vieličyń — 3240 rubloŭ.
«Anlifanščyca ź Pinska» kaža, što jana nie anlifanščyca i nie ŭ rabstvie ŭ Mjanmie6
Kamientary