65-hadovaha pravaabaroncu i palitviaźnia Michaiła Žamčužnaha vyzvalili z Horackaj papraŭčaj kałonii № 9. Ranicaj 19 lutaha jaho pasadzili pad kanvojem u pryharadny ciahnik z Horak na Oršu, piša Radyjo Svaboda.
U Horackaj papraŭčaj kalonii jaho trymali ad 13 lipienia 2017 hodu, a naahuł u kalonijach strohaha režymu Žamčužny prabyŭ šeść z pałovaj hadoŭ.
10 červienia 2015 hodu Viciebski abłasny sud pryznaŭ jaho vinavatym u padbuchtorvańni da naŭmysnaha vydavańnia źviestak, jakija składajuć słužbovuju tajamnicu, niezakonnym nabyćci srodkaŭ dla sakretnaha atrymańnia infarmacyi, a taksama ŭ davańni chabaru. Pravaabaroncy ličać pakarańnie Žamčužnaha palityčna matyvavanym.
Chto taki Michaił Žamčužny
Dacent, kandydat technalahičnych navuk. Pracavaŭ u Viciebskim technalahičnym universytecie i kiravaŭ u im labaratoryjaj, jakaja zajmałasia prablemami pramysłovaha vyrabu vadarodu.
Aŭtar šerahu navukovych manahrafijaŭ i raspracovak. Pieršym u Biełarusi zarehistravaŭ samarobny aŭtamabil na alternatyŭnym palivie.
U 2006 hodzie suprać jaho pačali kryminalnuju spravu, inicyjavanuju, jak śćviardžajuć pravaabaroncy, KDB. Jamu prapanoŭvali dać pakazańni suprać načalstva, a kali jon admoviŭsia, asudzili na 5 hadoŭ za «kradziež šlacham złoŭžyvańnia słužbovymi paŭnamoctvami».
Pa vyzvaleńni jon zaniaŭsia abaronaj pravoŭ źniavolenych. Staŭ siabram pravaabarončaj arhanizacyi «Platforma», a paźniej suzasnavalnikam novaj arhanizacyi «Platforma inavejšn».
Druhi raz jaho aryštavali ŭ 2015 hodzie paśla taho, jak asudzili kiraŭnika «Platformy inavejšn» Andreja Bandarenku. Pavodle źviestak pravaabaroncaŭ, epizody złačynnaj dziejnaści pravodzilisia ŭ ramkach aperatyŭnaha eksperymentu pad kantrolem KDB dziela vyjaŭleńnia jaho suviazi z zamiežnymi hramadzianami.
Pravaabaroncy davodziać, što dziejnaść Žamčužnaha nie była skiravanaja na atrymańnie vyhady, a papiaredniaje śledztva i sudovy razhlad spravy suprać jaho byli zakrytymi i nieprazrystymi. Prysud jamu nazvali nieabhruntavanym i palityčna matyvavanym.
Adbyvaŭ pakarańnie ŭ kalonijach Navasadaŭ, Ivacevič i Horak. Šmat času ŭ Horackaj kalonii asudžany pravioŭ u štrafnym izalatary i pamiaškańni kamernaha typu za, nibyta, niepadparadkavańnie administracyi. Svaje dziejańni, sa słovaŭ jahonaha advakata, arhumentavaŭ žadańniem papiaredzić pahrozu asabistaj biaśpiecy, a taksama zamacham na čałaviečyja honar i hodnaść. Pavodle jaho, pahroza sychodziła ad inšych asudžanych.
Kamientary