Razhlad apielacyjnaj skarhi pa spravie Kaciaryny Barysievič pryznačany na 20 krasavika
20 krasavika ŭ Minskim haradskim sudzie projdzie razhlad apielacyi pa spravie žurnalistki Tut.by Kaciaryny Barysievič i doktara BCHMD Arcioma Sarokina, jakija 2 sakavika byli pryznanyja vinavatymi ŭ vydavańni miedycynskaj tajamnicy. Sud pryznačyŭ Barysievič paŭhoda pazbaŭleńnia voli, Sarokinu — dva hady, ale z adterminoŭkaj na hod, jon vyjšaŭ na volu, nahadvaje Tut.by.
Sankcyja artykuła praduhledžvała tolki adno pakarańnie: pazbaŭleńnie voli sa štrafam. Termin — ad 6 miesiacaŭ da 3 hadoŭ. Jak vidać z prysudu suda Maskoŭskaha rajona, Barysievič dali minimalnaje pakarańnie, pry hetym Sarokin atrymaŭ adterminoŭku na hod, heta značyć vyjšaŭ na volu adrazu paśla abviaščeńnia prysudu. I kali ciaham hoda jon nie budzie parušać zakon, adbyvać pakarańnie nie daviadziecca.
Kaciaryna Barysievič, pakul prysud nie ŭstupiŭ u siłu, znachodzicca ŭ śledčym izalatary № 1 na vulicy Vaładarskaha ŭ Minsku. Pad vartaj naša kaleha ŭžo čatyry miesiacy.
Adnak prakuratura horada Minska padała pratest na prysud u dačynieńni da Barysievič «z-za miakkaści pryznačanaha pakarańnia». Słuchańnie spravy prachodziła ŭ zakrytym režymie, usie ŭdzielniki pracesu byli papiaredžanyja ab kryminalnaj adkaznaści za ahučvańnie danych sudovaha śledstva.
Ale zajava prakuratury dazvalaje zrabić vysnovu ab tym, što dziaržabvinavaŭca prasiŭ pakarańnie žurnalistcy vyšej za toje, što pryznačana ŭ prysudzie. Što tyčycca pakarańnia doktaru, to hety momant nie asprečvajecca, heta daje padstavy vykazać zdahadku, što ŭ hetaj častcy patrabavańni abvinavačvańnia byli zadavolenyja. Sam Sarokin zajaviŭ, što abskardžvać prysud nie budzie, jon užo viarnuŭsia na pracu ŭ balnicu.
Kaciaryna Barysievič i Arciom Sarokin byli zatrymanyja 19 listapada.
Kamientary