Biełarusy mohuć kansultavacca z daktarami anłajn. Raskazvajem pra ŭnikalny miedycynski prajekt

Prajekt dapamoža i pacyjentam, i zvolnienym miedykam

Dla Biełarusi farmat anłajn-miedycyny ŭ navinku. A voś u śviecie, śćviardžajuć stvaralniki «jeZdaroŭja», nazirajecca litaralna bum anałahičnych prajektaŭ. Čamu?

«Z-za karanavirusa vizity da daktaroŭ niebiaśpiečnyja, — tłumačyć Mikita Sałaviej, doktar-infiekcynijanist. — U Biełarusi na heta hladziać skroź palcy. Ale ŭ inšych krainach treba stelefanavacca z doktaram, jaki vyrašyć, treba vaša asabistaja prysutnaść na pryjomie ci nie».

Prajekt prydumaŭ Pavieł Libier, u minułym adzin z kiraŭnikoŭ EPAM, zasnavalnik płatformy «Hołas». Jak pracuje płatforma i ŭ čym jaje admietnaść?

Pieršaje — prajekt maje na mecie dapamahčy nie tolki biełaruskim pacyjentam atrymlivać jakasnyja kansultacyi, ale i samim daktaram, jakija paśla vybaraŭ trapili pad represii i ciapier vymušanyja šukać pracu.

Druhaja admietnaść — ananimnaść. Suzasnavalnik prajekta, doktar anastazijołah-reanimatołah Uładzimir Śvirkoŭ kaža, što ŭ śfiery telemiedycyny niama prykładaŭ ananimnaha kansultavańnia.

«Na hałoŭnaj staroncy jość link: «Stać doktaram», — tłumačyć Uładzimir. — Kali nacisnuć jaho, vy zmožacie padać zajaŭku. U adkaz pryjdzie list, jakija ŭmovy treba vykanać: pradstavić dakumienty, jakija paćviardžajuć asobu, miedycynskija dakumienty i jašče niekotoryja. Potym pačynajecca pravierka. My aceńvajem čałavieka pa troch hrupach kryteryjaŭ. Ci sapraŭdny heta čałaviek (ci nie bot jon)? Ci śpiecyjalist jon u svajoj śfiery? Ci maje takija etyčnyja ŭstanoŭki, kab sapraŭdy dapamahčy na płatformie, a nie naškodzić. Kali ŭsio ok, my dadajem vas u płatformu i vydalajem vašyja dadzienyja. Bolš u nas ich niama». 

U vyniku pacyjent i doktar ničoha nie viedajuć adzin pra adnaho.

Jašče adna admietnaść biełaruskaha prajekta — mikrakansultacyja ŭ čatach.

Naohuł pacyjenty mohuć zapisacca da peŭnaha śpiecyjalista na peŭny čas. Ale bolš zapatrabavany varyjant — zadać pytańnie ŭ čacie. Heta zroblena dziela dadatkovaj biaśpieki daktaroŭ.

«Pieršy doktar pa śpiecyjalnaści, jaki ŭbačyć pytańnie, adkaža na jaho. Pamiž im i pacyjentam utvarycca čat. I tady možna vieści sa śpiecyjalistam asinchronnuju hutarku. Zrešty, ciapier biełarusy raskidanyja pa ŭsim śviecie, a daktary i pacyjenty — pa roznych hadzińnikavych pajasach. Kožny adkazvaje, kali maje mahčymaść», — kaža Uładzimir Śvirkoŭ.

Jak tłumačać stvaralniki prajekta, kali pacyjent źviartaŭsia da doktara i jany parazmaŭlali, jon moža pakinuć hety čat aktyŭnym. I nastupny raz zadać inšaje pytańnie hetamu ž doktaru.

Kali jon napiša ŭ čat z nula, to moža znoŭ trapić da jaho. Ale budzie ŭžo inšy čat, ź inšymi, prydumanymi parami imionaŭ. Doktar moža ŭbačyć, što ŭžo kantaktavaŭ z hetym pacyjentam — jon moža bačyć zaklučeńni inšych śpiecyjalistaŭ, a voś pacyjajent — nie.

Zaraz stvaralniki kamandy pracujuć nad palapšeńniem servisu, kab u daktaroŭ była paŭnavartasnaja elektronnaja miedycynskaja kartka pacyjenta.

Najbolš zapatrabavanyja terapieŭty

Zaraz na płatformie «jeZdaroŭje» pracujuć daktary 25 roznych śpiecyjalnaściaŭ.

«Spačatku dumali, što budzie terapieŭt, psichołah, hiniekołah, dermatołah, — kaža Uładzimir. — Ale pačali hrukacca daktary i ź inšych śpiecyjalnaściaŭ».

Siarod ich ahulnyja piedyjatary, piedyjatary z vuzkaj kvalifikacyjaj (piedyjatar-alerhołah, piedyjatr-kardyjołah, piedyjatr-niefrołah), niefrołah, artapied-traŭmatołah dermatołah, alerhołah, endakrynołah, hastraenterołah, chirurhi roznaha profilu, daktary ahulnaj praktyki, jakija dapamahajuć terapieŭtu.

«Jość doktar, jakomu pacyjenty mohuć adpravić svaje zdymki MRT i atrymać rasšyfroŭku. Anałahična pracuje doktar ultrahukavoj dyjahnostyki», — tłumačyć Śvirkoŭ.

Jość navat dva patołahaanatamy. Navošta jany?

«Kali skazać zusim prosta, jany mohuć pierakłaści ź lačebnaj na čałaviečuju movu i skazać, što dalej rabić z zaklučeńniem», — kaža Uładzimir.

Čaściej za ŭsio pacyjenty źviartajucca da terapieŭtaŭ. Potym pa rejtynhu zapatrabavanaści iduć piedyjatary, hiniekołahi i traŭmatołah-artapied.

«Terapieŭty lidzirujuć jašče i tamu, što ludzi nie viedajuć, da kaho źviarnucca. — tłumačyć Śvirkoŭ. — Časta hetyja śpiecyjalisty potym dajuć paradu, da kaho źviarnucca dalej. Spadziemsia źniać nahruzku praz daktaroŭ ahulnaj praktyki i fieldšaraŭ-terapieŭtaŭ».

«Chočam inehravać prajekt u sistemu achovy zdaroŭja novaj Biełarusi»

Ale ŭsio roŭna uźnikajuć pytańni: jak možna kansultavać pacyjentaŭ na adlehłaści?

«Telemiedycyna — śpiecyfičnaja śfiera, — zhodny Uładzimir Śvirkoŭ. — U jaje jość pakazańni i supraćpakazańni. Jość peŭnaja miaža: kali doktaru nie treba dakranacca da pacyjenta, jon moža prakansultavać na dystancyi. Pytańnie ŭ jakaści dadzienych, jakija pradastaŭlaje pacyjent. Ale kali treba dakranucca, to bok vykanać peŭnyja dziejańni, telemiedycyna skančvajecca. Kožny doktar viedaje: jość pytańni, pa jakich treba adpravić da śpiecyjalista ofłajn».

Ź im zhodny i Mikita Sałoviej: 

«Padčas kavidu lepš naadvarot skaracić naviedvańni paliklinik i centraŭ. Bo pacyjenty vielmi časta inficyrujucca mienavita tam».

Sałaviej pryvodzić prykład: kala 30% pacyjajentaŭ, jakija traplajuć u pryjomnaje adździaleńnie ź infiekcyjaj, nasamreč majuć karanavirus, jaki tak prajaŭlajecca. Na dumku śpiecyjalista, u takich vypadkach pieršyja ałharytmy dziejańniaŭ možna raśpisać dystancyjna.

Nad čym jašče pracujuć stvaralniki «jeZdaroŭja» i jakija u ich płany? Zaraz płatforma biaspłatnaja, pacyjenty mohuć pakinuć achviarvańnie. 

«Ale my chacieli b raźvivać płatformu, kab praca daktaroŭ apłočvałasia. Kab śpiecylisty mahli być niezaležnymi ad sistemy Ministerstva zdaroŭja», — kaža Pavieł Libier. 

A jašče jon maryć, kab płatformu možna było intehravać u sistemu achovy zdaroŭja novaj Biełarusi: «My chočam, kab taki pradukt isnavaŭ na dziaržaŭnym uzroŭni».

• 0
• 0
• 0
• 0
• 0
• 0
• 0
• 0