U Niderłandach ledźvie nie skrali karcinu Mane, jakaja kaštuje amal 1,5 miljona dalaraŭ
Jak pieradaje niderłandskaja palicyja, dva čałavieki sprabavali vynieści z Zaanskaha muzieja karcinu Kłoda Mane «Farzaan i Viesterchien». Ale sproba kradziažu akazałasia biespaśpiachovaj i złačyncy byli vymušanyja pakinuć muziej z pustymi rukami.
Dvoje mužčyn pryjšli ŭ muziej z metaj skraści karcinu ranicaj 15 žniŭnia. Kala 10-30 jany sprabavali jaje vynieści, ale ŭ spravu ŭmiašalisia supracoŭniki muzieja, prachožyja i palicyja. U vyniku hrabiežniki vykinuli karcinu i źbiehli ad palicyi na čornym skutary, jaki paźniej byŭ znojdzieny niedaloka ad muzieja, pieradaje CNN.
Na nastupny dzień paśla incydenta muziej byŭ zakryty, ale ciapier ekspazicyja znoŭ pracuje. Karcinu «Farzaan i Viesterchien», adnak, pakul što nielha pabačyć u muziei — ekśpierty praviarajuć pałatno na najaŭnaść paškodžańniaŭ.
Mane namalavaŭ hety tvor u 1871 hodzie, kali pryjechaŭ na čatyry miesiacy z žonkaj i synam i niderłandski horad Zandam. Hety horad akazaŭsia dla mastaka krynicaj natchnieńnia — u Zandamie Mane namalavaŭ 25 karcin i 9 eskizaŭ horada. Na pałatnie «Farzaan i Viesterchien» jakraz adlustravany adzin ź vidaŭ Zandama — łodki, što płyvuć pa race Zan. Miascovy muziej nabyŭ hety tvor u 2015 hodzie prykładna za 1,4 miljona dalaraŭ.
Kamientary