Prypynili kryminalnuju spravu Bandarenki. Hienprakuratura nie moža znajści, chto jaho źbiŭ da śmierci
Jak stała viadoma «Našaj Nivie», Hienieralnaja prakuratura prypyniła kryminalnuju spravu pa fakcie śmierci Ramana Bandarenki, źbitaha na «Płoščy pieramien». Farmalnaja pryčyna — u suviazi z niemahčymaściu ŭstanavić asobu, datyčnuju da złačynstva. Sprava była zaviedzienaja pa fakcie naniasieńnia ciažkich cialesnych paškodžańniaŭ, u vyniku jakich Raman pamior.
Nahadajem, trahiedyja zdaryłasia ŭ listapadzie 2020 hoda. Raman Bandarenka vyjšaŭ u dvor, dzie sabralisia prychilniki Łukašenki, jakija zrazali bieła-čyrvona-biełyja stužki.
Zaviazaŭsia kanflikt, pryjechała milicyja, Ramana zabrali ŭ Centralnaje RUUS. Adtul jon trapiŭ u reanimacyju balnicy chutkaj dapamohi. Niahledziačy na vysiłki daktaroŭ, jany nie zmahli vyratavać pacyjenta. Na pachavańnie Bandarenki pryjšli tysiačy minčukoŭ.
Pieršymi ž zajavami ŭładaŭ było toje, što Raman byŭ u stanie ałkaholnaha apjanieńnia. Hety tezis byŭ chutka abvierhnuty na padstavie miedycynskich dakumientaŭ. Žurnalistku Tutbaj Kaciarynu Barysievič i doktara Arcioma Sarokina za heta sudzili.
U hetym vypadku Hienprakuratura spracavała nadzvyčaj chutka i represiŭna: Kaciaryna atrymała realny termin, Arciom vyjšaŭ u zale suda (atrymaŭ pakarańnie z adterminoŭkaj).
Spačatku rasśledavańniem zajmaŭsia Śledčy kamitet. Ale chutka pa zahadzie Łukašenki spravu pieradali Hienieralnaj prakuratury.
Łukašenka zajaŭlaŭ, što biare śledstva pad asabisty kantrol. Čym heta skončyłasia, my ciapier bačym — sprava prypynienaja.
Hetaksama siłaviki ŭžo bolš za 20 hadoŭ «rasśledujuć» źniknieńnie palityčnych apanientaŭ Łukašenki — Zacharanki, Hančara, Krasoŭskaha.
Byłyja siłaviki, jakija vystupili suprać katavańniaŭ i źbićcia demanstrantaŭ, apublikavali zapisy razmovaŭ pres-sakratarki Łukašenki Natalli Ejsmant i chakiejnaha funkcyjaniera Dźmitryja Baskava.
Z aŭdyja vynikaje, što aboje byli ŭ toj viečar na «Płoščy pieramien». Heta stała adnoj z pryčynaŭ, čamu Mižnarodnaja fiederacyja chakieja ŭviała abmiežavańni ŭ dačynieńni da Baskava.
Taksama śćviardžałasia, što na «Płoščy pieramien» byŭ spartsmien, blizki da siłavikoŭ, Dźmitryj Šakuta.
Pa č. 3 art. 147 KK termin pryciahnieńnia da kryminalnaj adkaznaści — 15 hadoŭ. Heta asabliva ciažkaje złačynstva, za jakoje pahražaje pakarańnie ad 5 da 15 hadoŭ pazbaŭleńnia svabody.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ129
Kamientary