Karabiel dla zdymak pieršaha ŭ śviecie filma ŭ kosmasie startavaŭ da MKS
Karabiel zapuścili z kasmadroma Bajkanur. Rasijskija aktrysa Julija Pierasild i režysior Klim Šypienka ŭpieršyniu ŭ historyi buduć zdymać mastacki film u kosmasie. Im udałosia apiaredzić u realizacyi hetaj idei Toma Kruza, paviedamlaje RBK.
Rakieta «Sajuz-2.1 a» z karablom «Sajuz MS-19», na borcie jakoha znachodziacca režysior Klim Šypienka i aktrysa Julija Pierasild, startavaŭ da Mižnarodnaj kaśmičnaj stancyi (MKS) z kasmadroma Bajkanur. Šypienka i Pierasild adpravilisia ŭ kosmas amal na dva tydni, da 17 kastryčnika, dla zdymak filma z pracoŭnaj nazvaj «Vyklik».
Rakietu-nośbit nazvali ŭ honar druhoha kasmanaŭta płaniety Hiermana Citova. Uznačalvaje ekipaž kasmanaŭt Anton Škapleraŭ. Stykoŭka z MKS pavinna adbycca paśla 15-j hadziny.
Cikava, što biełarus Aleh Navicki, jaki ciapier znachodzicca na arbicie, sastupić svaju kajutu ŭ moduli Julii, a sam časova budzie načavać u bytavym adsieku «Sajuz MS-18» u spalnym miašku. A Šypienka budzie načavać u novaj kajucie ŭ moduli «Navuka» (albo ŭ kajucie Navickaha, a ŭ «Navuku» adpravicca Pierasild — kančatkova ŭsio budzie vyrašana na arbicie). Pryčym paviedamlajecca, što Aleh Navicki navat syhraje paciarpiełaha kasmanaŭta.
Pra namier źniać mastackuju stužku ŭ kosmasie ŭ vieraśni 2020 hoda zajaviŭ «Raskosmas». Film-drama «Vyklik» źjaŭlajecca sumiesnym prajektam kaśmičnaha ahienctva «Pieršaha kanała» i studyi Yellow, Black and White.
Da hetaha, u mai, stała viadoma ab padrychtoŭcy kinazdymak na MKS z udziełam amierykancaŭ: akciora Toma Kruza i režysiora Daha Łajmana.
Kamientary