Šajhu: Budzie pryniataja novaja vajennaja daktryna Rasii i Biełarusi. Što heta i čamu važna?
Ministr abarony Rasijskaj Fiederacyi Siarhiej Šajhu zajaviŭ, što novuju vajennuju daktrynu zaćvierdziać na bližejšym pasiadžeńni Rady sajuznaj dziaržavy. «Dakumient zaklikany kaardynavać vysiłki dźviuch krain nie tolki ŭ adkaz na vajennyja pahrozy, ale i na palityčny i ekanamičny cisk z boku «tak zvanaha kalektyŭnaha Zachadu», — kaža Šajhu. Što adbyvajecca, «Našaj Nivie» rastłumačyŭ vajenny ekśpiert Alaksandr Alesin.
«Vajennaja daktryna — dakumient najvyšejšaha stratehičnaha značeńnia, jaki pakazvaje, jak dziaržava ci hrupa dziaržaŭ budzie rychtavacca da patencyjnaj vajny, jakija mierapryjemstvy buduć pravodzicca ŭ struktury vojska, u pieraŭzbrajeńni.
Daktryna farmuluje, jak dziaržavy buduć vieści vajnu ŭ vypadku jaje pačatku. Heta kvintesencyja ŭsich abaronnych dakumientaŭ dziaržavy ci dziaržaŭ, — kaža Alesin. — Hety dakumient moža mianiacca ŭ zaležnaści ad palityčnaj ci hieapalityčnaj situacyi.
Abo kali kraina ličyć, što vakoł jaje źjaŭlajucca novyja pahrozy, adkaz na jakija nie prapisany ŭ minułaj redakcyi Daktryny. Naprykład, kali źjaviłasia jadziernaja zbroja, heta źmianiła ŭsie sposaby viadzieńnia vajny i ŭniesła źmieny va ŭsie stratehii i padychody.
Siońnia isnuje Sajuznaja dziaržava Biełarusi i Rasii, pravodzicca sumiesnaje vajennaje płaniravańnie. My razam reahujem na pahrozy. Adpaviedna, stvareńnie sumiesnaj Daktryny naprošvajecca samo saboju».
Heta chiba nie najvyšejšaja stupień intehracyi dźviuch dziaržaŭ, miarkuje Alesin.
«Raniej vajennyja dakumienty nie mieli takoha pryjarytetu, jak siońniašni. Vajennaja intehracyja narastaje i heta treba razhladać razam z tymi darožnymi kartami. Uzajemazaležnaść tut vidavočnaja.
Rasija budzie zhodnaja pajści na ekanamičnyja ilhoty, kali Biełarusi pojdzie na dalejšuju intehracyju ŭ vajennaj śfiery. Nievypadkova pryniaćcie dakumienta budzie razhledžana vielmi chutka.
I hety dakumient budzie pakazčykam łajalnaści. Raniej ža Łukašenka, hruba kažučy, zaŭsiody namahaŭsia ŭziać pabolej, addavać pamieniej. Tamu niaredka ŭźnikali kanflikty ci supiarečnaści. Ale vidavočna, što znojdzienyja kampramisy, kali atrymajecca padpisać hety dakumient.
Hałoŭny bienieficyjar hetaha — Rasija, — miarkuje ekśpiert. — Bo heta svojeasablivy «strachavy polis» biaśpieki dla jaje. Chto vałodaje Biełaruśsiu — toj maje stratehičnyja pieravahi ŭ rehijonie. Strašny son rasijskich hienierałaŭ — rakiety NATA ŭ Biełarusi.
Kali Pucin kazaŭ pra čyrvonyja linii, za jakija nie moža puścić NATA, heta było i pra Biełaruś, kaniečnie. Zachavać pazicyi va Ukrainie nie atrymałasia, tamu ciapier tym bolš Rasija budzie zubami trymacca za Biełaruś. Dla jaje heta žyćciova važny abjekt.
Dy i sam Łukašenka heta razumieje, jon sam namiakaŭ, što, kali jaho nie stanie, Biełaruś budzie akupavanaja Rasijaj, bo ŭ Rasii nie budzie inšaha vyjścia.
Ale novaja daktryna nie aznačaje, što na biełaruskaj terytoryi aŭtamatyčna źjaviacca rasijskija vajskovyja bazy, chacia b tamu, što ŭ nas užo jość dva vielmi važnyja rasijskija abjekty. Heta vuzieł stancyi papiaredžvańnia ab rakietnym napadzie pad Baranavičami, radar «Vołha».
Jon naziraje za akvatoryjaj Atłantyki ad Skandynavii da Kanarskich vyspaŭ, jaho rola — zaŭvažyć pusk balistyčnych rakiet z padłodak. Druhi abjekt znachodzicca ŭ Vilejcy, stancyja «Antej», jaje funkcyja — suviaź z rasijskimi padłodkami, jakija znachodziacca na bajavym dziažurstvie.
I košt hetych abjektaŭ siońnia nie padaje, a tolki raście.
Mahčyma, ciapier źjaviacca abjekty sumiesnaha vykarystańnia, mienavita jak vajennyja bazy Sajuznaj dziaržavy, pryčym jak na terytoryi Biełarusi, tak i Rasii. Heta moža być novym momantam».
Ciapier čytajuć
«Ja ich ni pra što nie prasiŭ i tym bolš — vysyłać mianie z radzimy». Departavanyja palitviaźni rezka adkazali Kavaleŭskamu. Nie abyšłosia biez abrazaŭ3535
Kamientary