Chto taja ŭkrainka, jakuju zabiŭ Bołduin, i jak joj udałosia zrabić ašałamlalnuju karjeru ŭ Halivudzie
Halina Hatčynz stała zorkaj u prafiesii, jakaja da jaje ličyłasia mužčynskaj, — apieratary-pastanoŭščyki.
«The Mad Hatter» i «Blindfire» — dźvie apošnija pracy 42-hadovaj Haliny Hatčynz (Halyna Hutchins). Viestern «Rust» zdymali ŭ kinošna-pustynnych vakolicach horada Albukierkie na zachadzie ZŠA, i jon staŭ dla jaje fatalnym.
«Chałastyja!» (‘Cold Gun!' pa-anhlijsku) — kryknuŭ Bołduinu pamočnik režysiora. Tak pryniata ŭ Halivudzie padčas zdymak epizodaŭ sa stralboj. Akcior nacisnuŭ na kurok. Čamu ŭ adnym z butaforskich pistaletaŭ — usiaho ich było try — apynuŭsia bajavy patron, vyśvietlić śledstva.
Režysior byŭ paranieny, a Halina pamierła pa darozie ŭ špital.
«Niama słoŭ, kab vyrazić moj šok i smutak z pryčyny trahičnaha zdareńnia, jakoje zabrała žyćcio Haliny Hatčynz, žonki, mamy i vydatnaj kalehi, — napisaŭ u siabie ŭ Tvitary Alek Bołduin (Alec Baldwin) — adzin z samych zornych akcioraŭ Halivuda. — Ja supracoŭničaju sa śledstvam, jakoje vyśviatlaje, što pryviało da hetaj trahiedyi».
Šakujučaje navat pa halivudskich mierkach zdareńnie źviarnuła ŭvahu na postać Haliny. Niezvyčajnaść nie tolki ŭ tym, što jana prabiłasia ŭ prafiesiju, jakaja tradycyjna ličyłasia mužčynskaj, i dasiahnuła ŭ joj viaršyń. Jana ŭznačalvała apieratarskija kamandy ŭ topavych filmach. Bolš za toje, Halina pryjšła ŭ hetuju prafiesiju pa ŭsich mierkach pozna. Jana skončyła Amierykanski instytut kiniematahrafii ŭ 2015 hodzie, kali joj było 36 hadoŭ.
Jana naradziłasia ŭ vioscy Haradziec Žytomirskaj vobłaści, ale rasła na Krajniaj Poŭnačy Rasii. Jaje baćka słužyŭ u savieckaj impieryi vajennym marakom, i jaje malenstva prajšło, jak jana sama kazała, «siarod paŭnočnych aleniaŭ i atamnych padłodak».
Pieršaja adukacyja ŭ Haliny — žurnalisckaja, Kijeŭski nacyjanalny ŭniviersitet imia Tarasa Šaŭčenki. Paśla jana pracavała žurnalistkaj u Jeŭropie i pierajechała ŭ Amieryku ŭžo nie junaj. I ŭsiaho praz čatyry hady paśla skančeńnia kinaškoły časopis American Cinematographer nazvaŭ jaje «ŭzychodziačaj zorkaj» u svajoj prafiesii.
Tak Halina Hatčynz stała ŭvasableńniem «amierykanskaj mary» i, adnačasova, napaminam, što «nievyviednyja šlachi Haspodnija».
Ciapier čytajuć
Na pieradśmiarotnym videa z kałonii nasamreč byŭ nie Vitold Ašurak. Źjavilisia novyja padrabiaznaści śmierci palitviaźnia26
Kamientary