Amal 5 miljonaŭ rubloŭ tolki na vajenrukach. Na čym moža było b sekanomić biudžetnyja hrošy?
Siońnia Łukašenka źviazaŭ budučy padatak na kvatery z karanavirusnymi vydatkami. «Na kaniec hoda $2 młrd niepradbačanych vydatkaŭ, kab ratavać ludziej», — pryvioŭ jon ličby. «Naša Niva» sabrała prykłady, na čym možna było b sekanomić u epidemiju. Niekatoryja hrafy raschodaŭ vas mocna ździviać.
Šmat hrošaj pajšło na roznyja zabaŭlalnyja i ideałahičnyja mierapryjemstvy.
Naprykład, na biełaruski «Ch-faktar». Kolki dakładna syšło na zdymki šou, nieviadoma. Možna padličyć tolki častku raschodaŭ — a heta kala 900 tysiač rubloŭ.
Hanarar Buzavaj, pa słovach jaje kalehi pa žury Sasiedava, składaje kala 200-250 tysiač dalaraŭ. Na masoŭku ź biudžetu było zapłanavana 57 tysiač rubloŭ, na apieratarskuju rabotu — amal 80 tysiač, na dekaracyi — amal 158 tysiač.
Śviatkavańnie Dnia Niezaležnaści sioleta kaštavała bolš za 670 tysiač rubloŭ. Na hałakancert u Minsku pajšło 345 tysiač rubloŭ, na piratechničnaje šou — 265 tysiač. Jašče dva śviatočnyja kancerty ŭ stalicy abyšlisia ŭ 63 tysiačy. Heta biez uliku drobnych raschodaŭ u rajonach.
Na mierapryjemstvy da Dnia narodnaha adzinstva pajšło nie mienš za 170 tysiač rubloŭ. Ź ich 85 tysiač — na stvareńnie vystavy, 15 tysiač — na łaziernaje šou, amal 33 tysiačy — na kancert. Častka sumy była zapłanavana na pracu ideołahaŭ.
Usiebiełaruski narodny schod moh abyścisia bolš jak u miljon rubloŭ. Pa padlikach «Radyjo Svabody», mienavita stolki spatrebiłasia b na padvoz i pražyvańnie delehataŭ, kulturnuju prahramu. Raspracavali taksama sajt da Dnia narodnaha adzinstva — płanavałasia, što na heta pojdzie 143 tysiačy rubloŭ.
Na śviatkavańnie «Dažynak», zhodna z abjavami ab dziaržzakupkach, u krainie vydatkavali nie mienš za 130 tysiač rubloŭ.
Z pačatku navučalnaha hoda ŭ škołach źjavilisia vajenruki. Kolki paciahnie heta hrafa raschodaŭ? U Biełarusi 2,5 tysiačy škoł i himnazij, siaredni zarobak u adukacyi składaje 948,5 rubla. Atrymlivajecca, na apłatu pracy vajenrukoŭ za dva miesiacy ŭžo syšło kala 4,8 miljona rubloŭ!
Taksama sioleta zapłanavana pieraličyć 613,5 miljona rubloŭ u reziervovy fond prezidenta. Cikava, što z 2017 pa 2020 hod u hety fond było nakiravana 1,8 miljarda biudžetnych rubloŭ.
Alaksandr Łukašenka 19 kastryčnika zajaviŭ, što vydzielić hrošy z reziervovaha fonda prezidenta na baraćbu z karanavirusam. Havorka išła pra 250 miljonaŭ rubloŭ.
-
U ekanamičnym płanie siaredniestatystyčny biełarus ciapier žyvie lepš, čym 6 hadoŭ tamu, a niemiec — nie. Jak takoje mahčyma?
-
Biełaruskija dalnaboi ŭ Jeŭropie: haračaja dyskusija ŭ sacsietkach pra toje, u jakoj krainie jany zarablajuć najbolš i majuć najlepšyja ŭmovy pracy
-
Kastryčnik, a fiermiery pad Hrodnam na ŭsiu moc źbirajuć kłubnicy. Dziakujučy novamu sortu
Ciapier čytajuć
«Pieraapranuŭsia ŭ amapaŭca i dyryžyravaŭ čornaj dubinkaj». Adzin z zasnavalnikaŭ «Volnaha choru» — pra akcyi ŭ handlovych centrach u 2020‑m i pracu ŭ fiłarmonii ŭ Litvie2
Kamientary