U Rymie zakryli znakamituju kaviarniu, jakaja pracavała z XVIII stahodździa

Zakryćcio stała vynikam siamihadovaha kanfliktu pamiž ułaśnikam pamiaškańnia, Izraelickaj balnicaj (Ospedale Israelitico), i byłym arandataram Karła Pielehryni, jaki kiravaŭ kaviarniaj.

Sprečka pačałasia jašče ŭ 2017 hodzie, kali pamiž bakami ŭźnikli roznahałośsi nakont umoŭ arendy. Pielehryni praciahvaŭ utrymlivać kaviarniu, niahledziačy na sudovyja rašeńni i šmatlikija papiaredžańni, tamu ŭ kastryčniku 2025 hoda sudovy prystaŭ vykanaŭ rašeńnie ab prymusovym vysialeńni.

Padčas apiačatvańnia pamiaškańnia vyjaviłasia, što niekatoryja ścieny i mebla paškodžanyja, a častka kaštoŭnych pradmietaŭ interjeru i tvoraŭ mastactva była vyviezienaja. Hetyja rečy niadaŭna znajšli na składzie, jaki naležyć Pielehryni, i pryniali ich na dziaržaŭnaje zachavańnie.

Ciapier budynak čakaje kapitalny ramont za košt ułaśnika. Dalejšy los kaviarni zastajecca adkrytym: pavinny pravieści publičny konkurs na novaha arendatara. Pa nieaficyjnych danych, užo pastupili prapanovy ad bujnych madelnych damoŭ i brendaŭ, jakija majuć svaje buciki na Vija-dei-Kandoci (Gucci, Bulgari, Prada i inšyja). Adnyja ź ich nibyta hatovyja płacić da 1,5 miljona jeŭra ŭ hod, što mahło b dapamahčy balnicy pakryć svaje daŭhi i zachavać finansavuju stabilnaść.

Tym nie mienš, kamisar Izraelickaj balnicy, Antonia Maryja Leazapa, zapeŭniŭ žurnalistaŭ, što hałoŭnaja meta — adnavić pracu kaviarni, a nie pieratvaryć jaje ŭ kramu ci ofis brenda. Jon adznačyŭ, što ŭłaśnik «budzie intensiŭna pracavać nad tym, kab Antico Caffè Greco znoŭ adkryłasia».

Karła Pielehryni, u svaju čarhu nazyvaje situacyju «vialikaj niespraviadlivaściu». Jon nastojvaje, što Antico Caffè Greco źjaŭlajecca hramadskim i kulturnym abjektam, abaronienym zakonam, i što Ministerstva kultury Italii nie prykłali dastatkovych namahańniaŭ, kab jaho abaranić. Advakaty Pielehryni abvinavačvajuć ministerstva u «biaździejańni» i rychtujuć novyja sudovyja pazovy.

U 2024 hodzie dziaržaŭny status achovy kulturnaj spadčyny dla hetaha miesca byŭ paćvierdžany i abnoŭleny, ale jurysty śćviardžajuć, što heta nie pieraškodziła ŭładalnikam pravieści vysialeńnie.

Kaviarnia Antico Caffè Greco, zasnavanaja ŭ 1760 hodzie ŭ centry Ryma, zaŭsiody było papularnaja ŭ piśmieńnikaŭ, fiłosafaŭ i mastakoŭ. Tut byvali Džordž Hordan Bajran, Artur Šapienhaŭer, Johan Volfhanh fon Hiote, Stendal, Mark Tvien, Ivan Turhienieŭ i inšyja suśvietnyja znakamitaści. Piśmieńnik Mikałaj Hohal pisaŭ tut svaje znakamityja «Miortvyja dušy».

• 3
• 0
• 0
• 2
• 1
• 3
• 0
• 0