Jak adjezd tysiačaŭ biełarusaŭ adbiŭsia na rynku žylla?

Ukraina vydała 4,8 tysiačy dazvołaŭ na žycharstva, jašče častka hramadzian znachodzicca tam biez prava na pracu.

Dadatkova Polšča ź lipienia 2020-ha vydała biełarusam bolš za 12 tysiač humanitarnych viz, jakija dazvalajuć žyć i pracavać na jaje terytoryi.

Kolki źjechała ŭ Rasiju — naohuł tajamnica, pakolki vidavočnych prablem z pracaŭładkavańniem našych hramadzian tam niama, jak niama miažy i viz.

Pavodle prybliznych padlikaŭ, za apošnija dva hady krainu pakinuła ad 100 tysiač biełarusaŭ. Taki adtok nasielnictva pavinien upłyvać i na rynak nieruchomaści.

Chto źjechaŭ i pakinuŭ?

U apošniuju chvalu źjechali sa svaimi siemjami pradprymalniki, ajcišniki, kreatyŭny kłas, miedyki i inšyja. Nie ŭsie jany mieli nieruchomaść u Biełarusi, ale častka dakładna vałodała kvaterami, zaharadnymi damami, leciščami.

Tut składana vyznačyć — a kolki «hetaha ŭsiaho»? Piaćdziasiat tysiač abjektaŭ? Dvaccać piać? Navat dziesiać tysiač abjektaŭ, źjavisia jany ciapier u bazach prodažaŭ nieruchomaści, užo paŭpłyvali b na rynak. Ale ŭpłyŭ, kali i jość, u vočy nie kidajecca.

Pradajuć damy i leciščy

Z kvateraj u šmatkvaternym domie ničoha nie zdarycca i za try-čatyry hady. Składaniej z žyllom za horadam. Za ziamloj i damami treba sačyć. Rabić heta dystancyjna doraha i nieefiektyŭna. Na prodaž takija damy i leciščy vystaŭlajuć, kali niama svajakoŭ, zdolnych pakłapacicca pra nieruchomaść — abkasić, padłatać, a kali dom aciaplajecca ceły hod — pierajechać tudy na zimu.

Kali pahartać bazu vystaŭlenaha na prodaž, možna pa fota niekatorych damoŭ i leciščaŭ zrazumieć: pradajucca tamu, što haspadary źjechali. Zastalisia mebla, posud, interjernyja rečy. Ci vidać, što azdableńnie rychtavałasia pad siabie, ale praca była kinutaja na siaredzinie. Zrešty, pracent takoj nieruchomaści vielmi i vielmi niaznačny. A ceńnik całkam rynkavy.

Kali ŭładalniku niebiaśpiečna pryjazdžać u krainu, jaho dom pradajecca pa davieranaści, vypisanaj na svajaka abo blizkaha siabra siamji.

Kali biaśpiečna — pradajuć ahienctvy, a ŭładalnik pryjazdžaje na ździełku, kali ŭžo jość pakupnik.

Pakul ahienctvy zapeŭnivajuć: siarod źjechaŭšych pradaŭcoŭ damoŭ i leciščaŭ apošnich — bolšaść. Tych, chto pierajechaŭ prosta dziela spakoju.

Jak tłumačyŭ u pryvatnaj hutarcy adzin ajcišnik, jon pierajechaŭ u Polšču «na niapeŭny čas, pakul usio nie naładzicca, kab dzieci chadzili ŭ narmalnuju škołu». Minskuju kvateru zdaje, a dom u pryharadzie pryjšłosia pradać. Pryčym chutka i pa całkam prystojnaj canie. Dom kupiła siamja, jakaja maje svoj biznes, źviazany z handlem budmateryjałami.

«Cikavilisia domam aktyŭna, adrazu hatovaja była kupić hetaja siamja. Vieryć, što ŭsio ŭ ich budzie dobra pry lubym raskładzie», — reziumavaŭ ajcišnik.

Arenda — prapanova dla znajomych i radni

Što jašče bačna na rynku — dyk heta kolkaść upieršyniu vystaŭlenych dla arendy kvater. Pryčym źjechaŭšyja čaściej za ŭsio šukajuć kvatarantaŭ pa znajomych i dalokaj radni. Ceny nie załomvajuć: hałoŭnaje žadańnie — zachavać interjery da viartańnia. Nu i kamunałku kab arandatar spraŭna apłačvaŭ.

Mabyć tamu ŭ tych, chto šukaje zdymnuju kvateru, u hałovach dysanans. Na śpiecyjalizavanych sajtach adnapakajovaja kvatera sa śviežym azdableńniem u novym domie la pieršaj łnii mietro — 400-450 dalaraŭ za miesiac, a va ŭtulnych fejsbučykach i miascovych čatach — 300-350.

Dvuchpakajovaja ŭtulnaja «stalinka» ŭ centry praz sajty — ad 500, ad tych, chto źjechaŭ — 350. Kali zdaje dobry znajomy — to i mienš.

U abłasnych centrach — tyja ž praporcyi, tolki košty nižejšyja.

Dyk što, tannych kvater nie budzie?

Jość katehoryja ludziej, jakija zastajucca ŭ Biełarusi i čakajuć rasprodažaŭ ad «źjechaŭšych». Bo adčuvajuć — heta mahčyma. Pakiniem za dužkami maral, prykiniem, što padsiłkoŭvaje čakańni.

A padsiłkoŭvajuć adzinkavyja vypadki vystaŭleńnia kvater pa koštach, nižejšych za rynak z paznakaj «terminova». Haspadary kvater pryjazdžajuć na ździełku čaściej za ŭsio z Rasii. Vyvučeńnie ich historyj pakazvaje — ludzi daŭno žyvuć u inšaj krainie, u Biełaruś viartacca nie płanujuć, abstaviny źmianilisia, paŭstała patreba kupić žyllo abo palepšyć žyllovyja ŭmovy tam. Pra toje, što rynak u Minsku padaje, čuli. Vystaŭlajuć canu na 7-10% nižej za siaredniuju na anałahičnaje žyllo, i pakupnik znachodzicca za dva tydni.

Kali anałahičnym sposabam pačnuć dziejničać tysiačy ŭładalnikaŭ žylla, jakija źjechali ŭ apošnija paru hadoŭ u Polšču, Litvu, Ukrainu?

Kali prymuć rašeńnie, što nie płanujuć viartacca. Dla pryniaćcia hetaha rašeńnia siamji treba atrymać (arhanizavać) pracu i stabilny dachod, vyznačycca ź pierśpiektyvami. Na heta sychodziać nie hod i nie dva. Jak minimum — čatyry hady. Za hetyja čatyry hady i abstaviny ŭ Biełarusi mohuć źmianicca, znoŭ źjaviacca pierśpiektyvy — ludzi pačnuć viartacca.

Vidavočna, jość niemały adsotak hramadzian, jakija daŭno płanavali pierabracca žyć za miažu i ich adjezd prosta paskoryli postvybarčyja padziei. Takija ŭžo pradajuć žyllo (kvatery, damy, leciščy).

Ale — nie śpiašajučysia, spadziejučysia atrymać maksimum — bo ŭ novaj krainie im taksama patrebnyja hrošy na ŭładkavańnie.

Tak što kali kvatery tych, «chto źjechaŭ», i pačnuć masava vystaŭlacca pa dempinhavych koštach, to navat nie ŭ nastupnym hodzie.

• 0
• 0
• 0
• 0
• 0
• 0
• 0
• 0