Zaparožskaja AES — najbujniejšaja ŭ Jeŭropie, avaryja na joj moža pryvieści da žudasnaj ekałahičnaj katastrofy.
U horadzie Enierhadary Zaparožskaj vobłaści adbyvaŭsia načny boj, padčas jakoha niedzie ŭ 1.30 pavodle ŭkrainskaha času rasijskimi vojskami była abstralanaja Zaparožskaja AES.
U vyniku abstrełu na AES pačaŭsia pažar, na kadrach z kamiery nazirańnia byli vidać połymia i dym.
Viecier dźmuŭ u napramku paŭdniova-ŭschodnich abłaściej Ukrainy i rasijskich Rastova-na-Donie i Krasnadara.
Na tranślacyi z kamiery videanazirańnia na Zaparožskaj AES pieryjadyčna byli bačnyja ŭspyški vybuchaŭ i kłuby dymu sprava.
Śćviardžałasia, što snarady patrapili ŭ pieršy enierhabłok, ratavalniki doŭha nie mahli pačać likvidacyju pažaru, bo abstreły praciahvalisia.
Kiraŭnik departamienta pres-słužby Zaparožskaj AES Andrej Tuz u efiry telekanała «Rada» raspavioŭ, što 100 adzinak ciažkaj techniki Rasii zajšli ŭ horad 3 sakavika. A 9-j hadzinie jany prarvalisia praz błok-post horada i prasunulisia da pramysłovaj placoŭki stancyi.
«Prosta zaraz viaducca abstreły z boku vajskovaj techniki prosta na AES. Traplajuć snarady. Možacie bačyć na videakamiery — jana na prachadnoj AES, nakiravanaja na horad. Varožaja technika ruchajecca i stralaje prosta pa stancyi. Vy bačycie dym. Ja telefanavaŭ kaleham, jakija pracujuć na enierhabłokach. Jany kažuć, što snarady traplajuć prosta pa błokach, pobač ź niebiaśpiečnaj vytvorčaściu. U nas taksama znachodzicca schovišča adpracavanaha jadziernaha paliva. Dobra, što jano jašče nie patrapiła pad ahoń voraha», — adznačyŭ Tuz.
Andrej Tuz taksama dadaŭ, što kamiera, adkul viadziecca anłajn-tranślacyja, raźmieščanaja na administracyjnym budynku atamnaj stancyi, pobač ź pieršym enierhabłokam. Mienavita na hetym pamiaškańni bačny dym. Ci haryć dzieści jašče, supracoŭniki AES zaraz vyśviatlajuć.
Infarmacyi pra parušeńnie radyjacyjnaha fonu, pavodle Tuza, pakul niama, ale ŭ luby momant moža zdarycca što zaŭhodna, kali abstreły praciahnucca:
«U pieršuju čarhu treba spynić ahoń i pačać likvidavać tyja nastupstvy, što jość. Jany abaviazkova buduć vykonvać rehłamienty i praviaduć apieracyi, kab pieravieści enierhabłoki ŭ biaśpiečny stan. Ale z praciaham abstrełaŭ nichto nie moža prahnazavać, čym heta skončycca. Heta atamny abjekt, samy vialiki i mahutny ŭ Jeŭropie. I nastupstvy mohuć być transhraničnymi, jany vyjduć za miežy Ukrainy i Jeŭropy», — padkreśliŭ Andrej Tuz.
Ministr zamiežnych spraŭ Ukrainy Dźmitryj Kuleba zaklikaŭ rasijskuju armiju spynić abstreł Zaparožskaj AES:
«Rasijskaja armija abstrelvaje z usich bakoŭ Zaparožskuju AES, najbujniejšuju atamnuju elektrastancyju ŭ Jeŭropie. Ahoń užo ŭspychnuŭ. Kali stancyja vybuchnie, heta budzie ŭ 10 razoŭ mahutniej za Čarnobyl! Rasijanie pavinny nieadkładna spynić ahoń, dapuścić pažarnych i ŭstalavać zonu biaśpieki!»
Kala 3.00 ukrainskaha času (4.00 pavodle biełaruskaha) pažarnikaŭ narešcie puścili da AES, paviedamiŭ kiraŭnik Zaparožskaj abłasnoj vajskovaj administracyi Alaksandr Staruch. Vyśvietliłasia, što pažar adbyvaŭsia pa-za terytoryjaj niepasredna AES, u vučebna-trenirovačnym centry.
Pieršy enierhabłok padčas abstrełu znachodziŭsia na ramoncie, ale jadziernaje paliva ź jaho nie vyvozili.
U suviazi ź situacyjaj na AES ekstranny zvarot siarod nočy zapisaŭ prezident Ukrainy Uładzimir Zialenski.
Miž tym na AES paśla taho ničoha nie skončyłasia. Ukrainskija ŚMI paviedamlali, što nieŭzabavie tudy ŭvarvalisia čačency-kadyraŭcy, jakija viali boj z ukrainskimi nachvardziejcami. Taksama abstrełami rasijskija vojski zaminali pracy pažarnikaŭ.
Apieratyŭnaja infarmacyja pa načnoj rasijskaj atacy na Zaparožskuju AES, stan na 4:00 pavodle ŭkrainskaha času ️ ️
U vyniku abstrełaŭ za terytoryjaj AES praciahvaje hareć adzin z budynkaŭ vučebna-trenirovačnaha kompleksa. Ahniom achoplenyja 3, 4, 5 pavierchi piacipaviarchovaha budynka.
Rasijskija vajskoŭcy abstrełami nie davali mahčymaści ratavalnikam prystupić da likvidacyi nastupstvaŭ pažaru.
Na Zaparožskaj AES pracuje adzin enierhabłok z šaści. Supraćpažarny stan AES u normie.
Pa stanie na 5:30 pa ŭkrainskamu času abstreły spynilisia. Padraździaleńni ratavalnikaŭ vyjechali na tušeńnie pažaru ŭ vučebna-trenirovačnym korpusie.
Žyvaja tranślacyja z kamiery nazirańnia na stancyi — tut:
Amierykancy dabilisia vyzvaleńnia Juryja Ziankoviča. Jon byŭ prysudžany da 11 hadoŭ źniavoleńnia18
Kamientary