«Nie karmisia za košt ruskaha naroda bolš!» U Rasii na Karža spuścili sabak
Pa Karžu ŭłupiła rasijskaja prapahanda. «Prostyja fanaty» taksama rasčaravanyja. Ale tut jość niuansy.
Na dniach biełaruski śpiavak Maks Korž vypuściŭ trek «Svoj dom», jaki pryśviaciŭ vajnie va Ukrainie. Hramadskaja dumka biełarusaŭ u sacsietkach raździaliłasia: chtości ličyć pieśniu adnaznačna praŭkrainskaj, a chtości — zanadta niejtralnaj i apalityčnaj, jakuju, pry žadańni, mohuć vykarystoŭvać i rasijanie. Tym časam u samoj Rasii pasył Karža ŭspryniali absalutna adnaznačna — pieśnia ŭ padtrymku Ukrainy.
Zahałoŭki prapahandysckich vydańniaŭ taksama havorać sami za siabie.
Režysior i scenaryst Saryk Andreasian, jakoha cytujuć rasijskija prapahandysty, aburany płanami Karža vystupać u Rasii.
«Rastłumačcie mnie, jak takoje moža naohuł być! Čamu hetyja ludzi dajuć kancerty ŭ Rasii!» — hnieŭna vykazvajecca Andreasian.
Padpisanty scenarysta ŭ sacsietkach padtrymali jaho pazycyju.
Piersanaž rasijskich prapahandysckich šou Michaił Šachnazaraŭ u svaim telehram-kanale napisaŭ, što pravaachoŭnyja orhany naohuł pavinny zabaranić Karžu ŭjazdžać u Rasiju.
«Kab heta dazvolić, treba być apošnimi debiłami. Zabarona na ŭjezd, i chaj jedzie vymolvać prabačeńnie va Ukrainie i zarablaje ŭ Polščy», — piša Šachnazaraŭ.
«Biełaruski śpiavak Maks Korž hruba abyłhaŭ Rasiju, abvinavaciŭšy ŭ ahresii. Adnak ad kancertaŭ u «ahresara» admaŭlacca nie staŭ — vystupleńni zapłanavanyja adrazu ŭ troch haradach našaj krainy», — piša čarnasociennaje vydańnie «Caŕhrad» (na toj momant pra admienu kancertaŭ jašče nie było viadoma).
«Čym adkažuć žychary Rasii čarhovamu nienaviśniku našaj krainy, pakažuć najbližejšyja dni. Kancert u Jekaciarynburhu zapłanavany na 25 červienia», — aburajecca miedyja.
Praz dva dni paśla zapisu treka Korž paviedamiŭ, što jahonyja zapłanavanyja kancerty ŭ Rasii nie adbuducca.
Miarkujučy pa dopisach kamientataraŭ na staronkach Karža ŭ sacsietkach, pieśnia nie spadabałasia i mnohim zvyčajnym prychilnikam Karža z Rasii.
«Och, Maks, jak ža ty pamylaješsia. Och, jak… Nie varty hety trek taho, što ty budavaŭ tak doŭha i ŭparta», — napisaŭ karystalnik.
«Atrymlivajecca, Danbas maje racyju, kali abaraniaje svoj dom? Ci heta inšaje, Maks?» — zadaŭ pytańnie śpievaku adzin z prychilnikaŭ, robiačy adsyłku da tekstu.
«Mnie padabajecca tvorčaść Maksa, ale ja zusim nie padzialaju pazicyju Karža i ŭsie słovy ŭ hetaj kampazicyi — asudžaju. Čałaviek nie razumieje, pra što śpiavaje», — piša inšaja prychilnica.
«Spadziajusia, ciapier Maksimu zabaroniać vystupać u Rasii. Nie karmisia za košt ruskaha naroda bolš. My abaraniajem svoj dom i svoj narod», — kaža inšy kamientatar.
Ale tut jość niuansy. Varta adznačyć, što ŭ rasijskich sacyjalnych sietkach my majem dačynieńnie z efiektam maŭčańnia. Šavinistyčna nastrojenyja kamientatary vystupajuć adkryta i hučna, tady jak praciŭniki vajny vymušanyja maŭčać, bo za antyvajennyja vykazvańni ŭ Rasii ciapier karajuć.
Za praŭkrainskuju pazicyju Karža ŭ Rasii krytykujuć nie ŭpieršyniu. Maks Korž asudziŭ ahresiju Rasii ŭ pieršy ž dzień vajny, 24 lutaha, napisaŭšy, što «asudžaje ŭvarvańnie i bambavańnie suvierennaj dziaržavy».
Rasijski piśmieńnik-čarasocieniec Zachar Prylepin tady adkamientavaŭ heta tak: «Darosłyja ludzi admachnucca: my ich [takich jak Korž. — «NN»] nikoha nie viedajem. Dy jakaja roźnica, viedajecie vy ich ci nie. Zatoje ich viedajuć 99 adsotkaŭ padletkaŭ u Rasii. I ludzi, jakija adkazvajuć za moładzievuju palityku ŭ Rasii, taksama pavinny byli ich viedać i ź imi daŭno ŭžo pracavać. Jak vy dumajecie, jany ź imi pracavali?» — aburaŭsia Prylepin.
Niezaležnyja rasijskija ŚMI pakul na trek nie adhuknulisia.
U svaju čarhu, ukrainskaja publika i bujnyja ŭkrainskija miedyja ŭspryniali pieśniu chutčej jak praŭkrainskuju. U servisie Apple Music pieśnia stała samaj papularnaj siarod ukrainskich słuchačoŭ.
Pradprymalnik Ivan Šyła adhuknuŭsia ŭ Fejsbuku na supiarečlivuju reakcyju ŭ sacyjalnych sietkach na novuju pieśniu Maksa Karža tak:
Kamientary