U lipieni 2022 hoda rynak prodažaŭ novych aŭtamabilaŭ upaŭ u 5 razoŭ u paraŭnańni z anałahičnym pieryjadam minułaha hoda — 837 aŭtamabilaŭ suprać amal 5000 letaś, pavodle źviestak Biełaruskaj aŭtamabilnaj asacyjacyi. Što adbyvajecca na rynku ciapier, ci nie zastaniemsia my naohuł biez aŭtamabilaŭ, vydańniu myfin.by raspavioŭ vykanaŭčy dyrektar kampanii «Atłant-M» Siarhiej Samojła. Pryvodzim cikavaje.
Siarhiej Samojła kaža, što kampanija sutyknułasia z mnostvam faktaraŭ, jakija ŭ sukupnaści akazali značny ŭpłyŭ na biznes-asiarodździe. Heta i suśvietny deficyt aŭtamabilaŭ, i sankcyi, i častkovaja admova niekatorych suśvietnych brendaŭ ad pastavak napramuju ŭ rehijon.
— Dadajcie da hetaha chaos na valutnym rynku, abhruntavanuju niavyznačanaść u budučyni ŭ našych klijentaŭ, jakaja prymušaje adkłaści kuplu da lepšych časoŭ, fizičny adjezd z krainy aktyŭnaha i płaciežazdolnaha nasielnictva i «vymyvańnie» aŭtamabilaŭ kłasa V na rynku prapanovy (a ŭ nas heta fłahmanskija i samyja pradavanyja madeli Volkswagen Polo i Kia Rio, pastavak jakich prosta niama i nie pradbačycca ŭ najbližejšaj budučyni). Faktary nastolki nietypovyja i niečakanyja, što možna skazać: «Žyćcio nas da hetaha sapraŭdy nie rychtavała!» Ale tym cikaviej užyć tvorčy padychod da rašeńnia najskładaniejšych zadač. 2022 stanie antyrekordnym u śfiery prodažaŭ novych aŭto: pa vynikach 7 miesiacaŭ rynak skłaŭsia na ŭzroŭni 12,7 tysiačy mašyn, — raspaviadaje jon.
Kala 80% pradukcyi, pavodle top-mieniedžara, pastaŭlałasia da nas z Rasii. I ciapier hetuju pradukcyju my niedaatrymlivajem z-za taho, što stajać zavody i kampanii. Heta pieršy momant. Druhi — heta źmiena ŭsioj łahistyki.
— My adbudoŭvali pracu z zavodami i pradstaŭnictvami na praciahu 30 hadoŭ: naładžvali suviazi, sistemu pastavak, arhanizoŭvali składy, navučali piersanał, arhanizoŭvali pracu ŭ pravavym poli. Siońnia treba ŭsio pieranaładžvać, pryčym časam davoli kruta i apieratyŭna. Bo my viedajem, jak heta pavinna pracavać efektyŭna, i imkniomsia mienavita da hetaha vyniku, — kaža jon.
Samojła zaznačaje, što zadavoleny tym, jak ruchajecca kampanija i jak znachodzić vyjście. Naprykład, Ford abviaściŭ, što sychodzić z našaha rynka.
— Možna było i nam skazać, što my bolš nie padtrymlivajem harantyjnyja abaviazki (bo ich kampiensavaŭ zaŭsiody dyleru sam zavod). Heta značyć, jurydyčna my majem na heta prava. Ale my robim absalutna naadvarot: padtrymlivajem usie abaviazacielstvy za svoj košt, tamu što być sumlennym i klijentaaryjentavanym — taksama naša kaštoŭnaść, — raspaviadaje jon.
Košt zaležyć nie tolki ad «kursu dalara»
Adkazvajučy na pytańnie, na kolki padaraželi zapčastki, Siarhiej Samojła zaznačaje, što jak i ŭ vypadku z aŭtamabilem, ceny zaležać nie tolki ad «kursu dalara».
— Tut zakładzienaja cana na materyjały, vyrab, dastaŭku, padatki… Da prykładu, u minułym hodzie ceny na škło vyraśli na 70%, na mietał — bolš čym na 100%, na dreva — za 300%. Chto buduje dom ci robić ramont — napeŭna, mianie zrazumiejuć. Uśled za hetym zavod-vytvorca pavyšaje canu hatovaj detali abo aŭtamabila, i da nas pradukcyja pryjazdžaje ŭžo pa zusim inšaj canie.
U apošni čas adnym z faktaraŭ padaražańnia stała jašče i prynaležnaść da «biełych» ci «čornych» sankcyjnych śpisaŭ. I kali kazać pra «čorny» śpis, kudy patrapili, da prykładu, navat padšypniki, ci pra brendy, pa jakich nie zachavalisia pramyja pastaŭki i źmianiłasia łahistyka, to havorka idzie pra padaražańnie na 15-25%. Hetaje padaražańnie zakranuła ŭsich na rynku.
Jak chutka my možam sutyknucca ź niedachopam zapčastak u Biełarusi i jak doŭha treba ich čakać?
— Sankcyi Vialikabrytanii i ZŠA pa zapčastkach dziejničajuć adnosna i Rasii, i Biełarusi. Jeŭrasajuza — tolki ŭ dačynieńni da Rasii. Zavody sprabujuć naładzić svaje pastaŭki napramuju ź ES. Nie ŭsio tak hładka, jak chaciełasia. Jość prablemy z prachodžańniem apłaty, łahistykaj, — adkazvaje Siarhiej Samojła.
Jon kaža, što na składach kampanii jość zapasy na šeść miesiacaŭ pa niekatorych markach. Heta dazvalaje pieražyć siońniašnija «pracesy transfarmacyi». Pavodle jaho, jak i raniej, kali detal śpiecyfičnaja, jana vyrablajecca da troch miesiacaŭ, plus pastaŭka zajmaje kala 2-3 tydniaŭ.
Byvaje, što zapčastka pastaŭlajecca nie naŭprost z zavoda, a praz pasrednikaŭ — tady plačo pavialičvajecca. Treba pravieści płaciažy, kab nie patrapić pad druhasnyja sankcyi i pastavić detal. Plus jość abaviazacielstvy pa siertyfikacyi ŭ Biełarusi.
Sutykajecca kampanija i z prablemami z płaciažami ŭ jeŭrapiejskich bankach.
— Kali zavod zacikaŭleny ŭ naładžvańni biznes-pracesu ź Biełaruśsiu, to jon pracuje napramuju sa svaimi jeŭrapiejskimi bankami. A my šukajem banki, u jakich płaciažy chutka prachodziać, ale jość i tyja, chto admaŭlaje, — raspaviadaje surazmoŭca.
Ci mahčyma naładzić impartazamiaščeńnie? Siarhiej Samojła miarkuje, što naładzić možna, ale dla hetaha moža spatrebicca nie adzin hod.
— Akramia ŭźviadzieńnia budynka jašče treba pastavić linii i adpracavać technałohii. U Biełarusi pa zapčastkach paśla razvału SSSR byŭ vielmi vialiki patencyjał, i jon niedzie zachoŭvajecca. Prykład hetamu — padšypnikavy zavod u Minsku, zavody ŭ Barysavie, Babrujsku, Mahilovie. Dla ich adradžeńnia patrebnyja inviestycyi i kamanda, jakaja budzie dakładna ŭjaŭlać sabie ŭvieś biznes-praces: za košt jakich resursaŭ buduć vyrašacca zadačy, što heta buduć za zadačy i jak kamanda pavinna ich realizoŭvać. Pytańnie jašče i ŭ rentabielnaści vytvorčaści. Raniej hetyja zavody byli zatočanyja pad masavuju vytvorčaść dla SSSR. Ciapier niama patreby ŭ takich hihantach i ŭ takoj kolkaści pradukcyi, patrebnyja nievialikija zavodziki, jakija možna raźmiaścić u rehijonach, — kaža jon.
Na pytańnie pra raźvićcio elektratranspartu Siarhiej Samojła adkazvaje, što ŭ cełym, vidać, hety kirunak paskoryć svajo raźvićcio, ale kazać pra toje, što śviet pierachodzić na elektratranspart, na jaho pohlad, zaŭčasna.
— My ŭsie bačym, što suśvietny aŭtamabilny rynak pieražyvaje transfarmacyju pamiž ruchavikami ŭnutranaha zharańnia, elektramabilami, vadarodnymi i hibrydnymi ruchavikami. Ale my zabyvajemsia pra važny momant: my viedajem, jak utylizavać aŭtamabili z ruchavikami ŭnutranaha zharańnia, a voś jak pravilna i ź minimalnymi nastupstvami ŭtylizavać elektrabatareju — pakul hetaje pytańnie nie vyrašanaje.
- Aŭtamabilny chołdynh «Atłant-M» zajmajecca prodažam i absłuhoŭvańniem aŭtamabilaŭ. Kampanija zasnavanaja ŭ 1991 hodzie: jana pačała handlavać aŭtamabilami VAZ i MAZ. Pieršaje dylerskaje pahadnieńnie zaklučanaje ŭ 1994 z karparacyjaj Volkswagen.
- Na siońniašni dzień u partfieli «Atłant-M» znachodziacca dzieviać suśvietnych aŭtamabilnych brendaŭ: VW, Mazda, Ford, Kia, Toyota, Lexus, Geely, Jaguar, Land Rover. Pa dvuch ź ich — Volkswagen i Kia — Atłant-M — ekskluziŭny imparcior u Biełarusi, jaki raźvivaje maštabnuju dylerskuju sietku.
Ciapier čytajuć
«Hanna adkazała: «Tak!» Vital Hurkoŭ zrabiŭ prapanovu ruki i serca. Chto ž niaviesta?8
Kamientary