Šatłandskaha aktyvista čarnobylskaha ruchu asudzili za seksualnyja damahańni
Były kiraŭnik arhanizacyi skaŭtaŭ Lochardil Scout Group, sakratar dabračynnaj inicyjatyvy «Chernobyl Children Lifeline Sharity» ŭ šatlandzkim miastečku Invernes Ałan Uiłsan asudžany na čatyry hady za seksualny hvałt nad tryma chłopčykami.
Jak pišuć miascovyja vydańni, hetaja navina šakavała žycharoŭ nievialikaha haradka. Invernes, jaki znachodzicca za 260 km na poŭnač ad Edynburhu, dahetul mieŭ zusim inšuju reputacyju jak u Šatlandyi, tak i pa‑za jaje miežami. Adsiul pachodzić bolšaść staražytnych šatlandzskich rodaŭ. Invernes ličycca radzimaj aŭsianki, viski, šatlandzkaj dudy.
Apošnim časam siudy pryjaždžajuć adpačyć u harach paciarpiełyja ad čarnobylskaj katastrofy dzieci ź Biełarusi. 65‑hadovy Ałan Uiłsan — adzin z arhanizataraŭ takoha adpačynku.
Jak zajaviła ŭ interviju kampanii VVS hałoŭny vykanaŭčy dyrektar mižnarodnaj dabračynnaj arhanizacyi «Chernobyl Childrens' Project International» Edzi Roŭč, «biznesoŭca Ałana Ŭiłsana dobra viedali ŭ Invernesie dziakujučy jaho ŭdziełu ŭ čarnobylskim dabračynnym ruchu. A jon vykarystoŭvaŭ svoj status, kab uvachodzić u davier da baćkoŭ svaich achviaraŭ, i złoŭžyvaŭ hetym davieram».
Sam Ałan Uiłsan, jaki mieŭ reputacyju dobraha muža i baćki dvuch dziaciej, pryznaŭ piać vystaŭlenych suprać jaho abvinavačańniaŭ, jakija tyčylisia nieprystojnych dziejańniaŭ i seksualnaha hvałtu ŭ dačynieńni da niepaŭnaletnich chłopčykaŭ. Usie hetyja dzieci — ź Invernesu. Jak zajaviŭ na sudovym pracesie kiraŭnik «Chernobyl Children Lifeline Charity», aktyvisty hetaj arhanizacyi praviali ŭłasnaje raśśledavańnie i ŭpeŭnienyja, što biełaruskija dzieci padobnaha abychodžańnia nie zaznali.
Treba adznačyć, što skandał vakoł nieprystojnych dziejańniaŭ Ałana Ŭiłsana — daloka nia pieršy z tych, jakija zakranuli mižnarodny čarnobylski ruch.
Pazaletaś akružny sud Uoterfordu (Irlandyja) asudziŭ 52‑hadovaha čarnobylskaha valantera Džona Peparda na 18 miesiacaŭ turmy za parnahrafičnyja zdymki niepaŭnaletnich dziaciej z Homielščyny i zanios jaho ŭ śpis asobaŭ, za jakimi pavinny rehularna nazirać psycholahi‑kryminalisty.
Na pačatku hetaha miesiaca prakuratura Baden‑Viurtemberhu vystaviła Jorhu Taŭsu, 56‑hadovamu deputatu Bundestahu, dobra viadomamu ŭ dabračynnych čarnobylskich kołach Biełarusi i Niamieččyny, abvinavačańnie ŭ zachoŭvańni i raspaŭsiudžvańni dziciačaj parnahrafii.
Kamientary