Za palityku zatrymali jašče adnaho traktarazavodca. Aryštavanych užo jak minimum 12
Alaksandru Dziarbinskamu 27 hadoŭ. Na Minskim traktarnym zavodzie jon adpracavaŭ elektramancioram bolš za 8 hadoŭ.
Łukašysty ŭ svaich kanałach pościać fota sa žniŭnia 2020 hoda, na jakich aryštavany idzie ŭ kałonie demanstrantaŭ ź minskich zavodaŭ.
My zapytalisia ŭ adnaho z zavadataraŭ strajku na MTZ Siarhieja Dyleŭskaha, jakaja ciapier situacyja na zavodzie:
«Pa maich źviestkach, zatrymali jak minimum 12 pracaŭnikoŭ zavoda.
Chodziać čutki, što začystka źviazanaja z padrychtoŭkaj mabilizacyi i ustupleńnia ŭ Łukašenki ŭ vajnu z Ukrainaj, ale heta tolki čutki.
Na šmat jakich inšych pradpryjemstvach Biełarusi zatrymlivajuć ludziej, jakija prajavili aktyŭnaść padčas tak zvanych «vybaraŭ».
Jany namahajucca vykaranić z pradpryjemstvaŭ luboje inšadumstva, kab ludzi chadzili, apuściŭšy hałavu i ŭładam usio sychodziła z ruk.
Situacyja na zavodzie ciapier składanaja. Ludzi nie pačuvajucca ŭ biaśpiecy, bo nichto nie zastrachavany ad turmy».
Na MTZ pracuje amal 16 tysiač čałaviek, u apošnija čatyry hady za hod tut vypuskali ŭ siarednim kala 33 tysiač traktaraŭ. Dla paraŭnańnia: u 2006 hodzie vypuskali bolš za 50 tysiač adzinak technik. Niahledziačy na toje, što štat pradpryjemstva i kolkaść adzinak techniki apošnija dziesiacihodździ ŭvieś čas skaračalisia i časta zavod bałansavaŭ na miažy stratnaści, MTZ zastajecca adnym z najbolšych pradpryjemstvaŭ Biełarusi, najbolšym vytvorcam traktaraŭ u krainach byłoha SSSR, a traktar «Biełarus» — adnym ź simvałaŭ krainy.
U 2020 hodzie rabotniki zavoda, jak i inšych pradpryjemstvaŭ, patrabavali adstaŭki Alaksandra Łukašenki šlacham demanstracyj i mitynhaŭ, ale nie bastavali.
Pratesty vyklikali šalonyja represii. Nie mienš za 45 tysiač čałaviek prajšli praz zatrymańni, u turmach zastajucca tysiačy palitźniavolenych, dziasiatki tysiač ludziej pakinuli Biełaruś, ratujučysia ad masavych represij. Prava ludziej na svabodu schodu i zabastoŭku ŭ krainie pierastali isnavać.
Pra Alaksandra Dziarbinskaha viadoma, što ŭ jaho jość maleńki syn.
Kamientary